AYUB 35 - KITAB NU TUMPU ALLA LELE MA'IMAI'

^1-2 O Ayub, sangkalingamo na beleyum de monsangka tukooyum i mata nu Tumpu Allah beleyum madi' ko kasala'an.

³ Beleyum sala'mo de mompokilawa, dosa' nu beleyum monsaduakonmo apaa hi Ia; ka' ka'untungan apaa na nuhumpak nu beleyum, de beleyum madi' nombau dosa'.

⁴ Akumo na montaami beleyum ka' mule' hi to sanga-sangalu nu beleyum.

⁵ Sinda mokiita' i langit ka' jonohi ima-ima' mosia na kotangkasnyo na kundom haha aita'.

⁶ De beleyum binaladosa'mo, Tumpu Allah madi' lugi'. De kasala'an nu beleyum manjoo'mo, Ia madi' momosia.

⁷ Ka' mule' maumo mombau hahan anu ma'ima', Tumpu Allah madi' pa' otulungimo. Madi' hondo-hondo, Ia mompalalui apa-apaa hi beleyum.

⁸ Ola bubu'mo belemiu na monta'up kalugi'an kalana nusaduakon nu dosa' nu beleyum haha atina'. Ia mule' ahi' suele na mohumpak ka'untungan kalana ka'ima'an nu kalakuan nu beleyum.

⁹ To mia-mian anu pinosansalamo, motambuha'mo; aha noloboo'mo momoita da otulungi.

¹⁰ Panyo misa' toka hi Tumpu Allah, Anu nombau ia ka' anu timbali otaha'imani mombee'i apa-apaa de aha talalomo hondo susa',

¹¹ ka' anu mombee'i manusia kapandean bapikin molingkudui tomonsi' ka' binatang i dunia aiya.

¹² To mia-mian anu sinansalamo haha aijo', nomoitamo tulung, panyo Tumpu Allah nomohokotmo kalana aha mian anu madi' ma'ima' na kinyonyoa ka' saja' hondo mombuulakon butong nu aha.

¹³ Palasumo na aha moloboo' hoso-hoson; Anu Daka' hondo na kuasanyo madi' montoa kabai mompotombihing aha.

¹⁴ O Ayub, pakaluas mule' de beleyum motatae tukooyum beleyum madi' nontoa Ia, saba' han anu atina' hi beleyum hau-haunyomo i ahop-Nyo ka' beleyum montanda'imo Ia!

¹⁵ Pa' kooyum Tumpu Allah madi'mo mohukum ka' madi'mo mongina-inau' kasala'an anu binaumo nu beleyum.

¹⁶ Palasumamo na bisala nu beleyum atina' de sabole-bole otuusakon nu beleyum, nanasamo, taalu' anu tinaloakonumo atina' madi' nu sumbu-sumbu' na patuunyo.