AYUB 32 - KITAB NU TUMPU ALLA LELE MA'IMAI'

Anu tinaeakon i Elihu

¹ Kalana nusumbu' ahi' i Ayub totu-totu'u na butongnyo madi' ko kasala'annyo, sahingga aha totolu' na bela'nyo haha aijo' madi'mo daagi' nontaami ia.

² Panyo hi aha aijo' daagi' ko samian sanggonyo i Elihu anak i Barakheel, tulunan mae i Bus aha mae sa'anakan i Ram. Madi'mo pinoko intimnyo na idek nu kinyonyoanyo, kalana i Ayub nosi pototu'umo butongnyo, ka' nompisala'imo Tumpu Allah.

³ Ia mule' nontambuha'imo aha totolu' na bela' i Ayub haha aijo' kalana aha madi' moko ala monggagakon potatae i Ayub, padahan aha lewa' mompisala'i ia.

⁴ I Elihu ma'isa talalo motu'a de opokakanakon tiba aha aijo', kalana aijo' tinanda'annyomo da aha iwi-iwi' lapas pe'e na motatae.

⁵ Salatan tinoanyo na aha aijo' toto-totolu' madi'mo noko ala nontaami, ia notambuha'mo,

⁶ lantas ia notataemo sumo uuka, “Aku daagi' olitau, panyo belemiu i langkai'mo, kalana aijo' aku mabuhuk ka' bata-bata na mompolubat pikilanku.

⁷ De o'ala hi belengku, belemiu ahi' na pantas motatae, anu ahi' lebemo motu'a na pantas mombagi-bagi kapandeannyo bapikin.

⁸ Panyo anu mombee'i kapandean bapikin hi manusia, ola Roh nu Tumpu Allah Anu Daka' hondo na kuasanyo.

⁹ Mian timbali pande na bapikin, misa' kalana anu langkai'mo; mian monsumbu' anu sahondo-hondonyo, misa' kalana anu natangkasmo na umunnyo.

¹⁰ Kalana aijo', potombihing mae na aku; pobee' mae na aku mompoto'i mosia na tanga'anku.

¹¹ Talalomo hondo sinabaan na aku nohongo belemiu notatae, ka' nontanda'i belemiu molio potatae anu minsoop i akan.

¹² Tinoangkumo totu-totu'u; pinotombihingkumo na belemiu madi'mo noko ala nontaami. Kasala'an i Ayub notatae madi' pinoko ala nu belemiu nomponyata' hi ia.

¹³ Mosia sahingga tinaloakonmo nu belemiu belemiu notataemo au'aitu kapandean bapikin kinabotmo nu belemiu? Kalana aijo' sahanyo ahi' belemiu nangakumo kinalamo. Anu timbali montaami i Ayub ola Tumpu Allah.

¹⁴ Hi belentomo na pompotokan potatae i Ayub, misa' hi belengku, panyo aku madi' montaami susumo pontaami nu belemiu.

¹⁵ O Ayub, aha ilingumo madi'mo moko ala montaami mae; madi'mo ko anu timbali daagi' nutaloakon mae nu aha.

¹⁶ Aha sinaintinjomo madi'mo daagi' noko ala notatae. Pa' daagi' ku tanda'i maumo aha aijo' nomohokotmo?

¹⁷ Madi', uuka aiya ku taamimo; apaa na anu uutu ku tutugi, ku poto'imo.

¹⁸ Madi'mo sabaan na aku montanda'i. Madi'mo daagi' ku poko ala ku intim na potataengku.

¹⁹ De ola ku hokotakon mobehe'mo na kinyonyoangku, sumomo botutu nu anggur anu ingisianmo buke-buke' nu anggur anu sala'je ingunjang.

²⁰ Aku tionyomo ahi' motatae, da kinyonyoangku bolimo mangada'; aku tionyomo ahi' monganga'akon nganga'ku ka' montaami.

²¹ Madi' ko anu ku tinjohi maumo pa' ihe na aha anu painggaga aijo' ka' madi' ko anu lewa' ku puji'.

²² Maumo pa' lewa' nohangka-hangkat sanggonyo aku madi' monsumbu', ka' de bisuannyo ku bau na aijo', Tumpu Allah tantu sampamo mohukum aku.