AYUB 31 - KITAB NU TUMPU ALLA LELE MA'IMAI'

¹ Sinumpa'kumo na palajanjianku madi'mo ko napisu na aku montoa to lalangkoyang.

² Apaa na anu nu bau nu Tumpu Allah hi kita? Mosia na Ia nombalosi kalakuan nu manusia anu ma'idek?

³ Balaa' ka' kalugi'an tionyo ahi' Nupotokamo mae hi mian anu nombaumo kalakuan anu ma'idek!

⁴ Tantu nusumbu' nu Tumpu Allah na anu binaungkumo iwi-iwi'; kolangka-langkasku iwi-iwi' tinoa-Nyomo.

⁵ Aku basumpa' saba' aku ma'isa toho' nombau anu toto tage-tageo'; aku mule' ma'isa toho' nongakali mian.

⁶ De timbali da Tumpu Allah montimbang aku i timbangan anu sahondo-hondonyo, da Nusumbu'je na aku taalu' madi' ko kasala'an.

⁷ De bisuannyo aku noselemo, madi'mo nontulu i jalan anu totu'u, kabai kinyonyoangku nongka'ima'imo han anu mahumimi', de limangku kino nodanyomo nu dosa'

⁸ bakasmo da mianje sangga'at na mongkaan anu ku su'an ka' iwi-iwi' na isi nu ale'ku ola timbali ma'idek.

⁹ De bisuannyo aku toho'mo nongka'ima'i bengkele' nu mian anu mompaha ohani na laigannyo tiba laiganku, ka' maninsuluk na aku ku siligi na ia i sambiha' nu tumban,

¹⁰ saba' bakasmo da bengkele'ku mongunjangakon anu nu kaan nu mian sangga'at; bakasmo da aita' i koi nu mo'anemo sangga'at, na mongkamale'imo ia.

¹¹ De dosa' anu mahumimi' aijo' binaungkumo aku pantasmo na montalima hukuman.

¹² Dosa' aijo' mompatei sumomo apu nu nalaka, iwi-iwi' na anu daagi' hi belengku nutoyo'imo iwi-iwi'.

¹³ Salatan posaihonku notusa'mo kalana haknyo gineguanankumo, kuhongo-hongomo ahi' na ia ka' ku baumo hodi-hodi' na kinyonyoangku.

¹⁴ De madi', mosia na aku mongahopi Tumpu Allah-ngku? Apaa na bau pontaamingku de Ia tokamo mae momputusi pa lakalangku?

¹⁵ Te misa' Tumpu Allah ahi' na nompotimbalimo aku, ka' suele nompotimbalimo to posa-posaihonku?

¹⁶ Ma'isa toho' aku madi' nontulungi mian anu kasiasi hondo, kabai ola lewa' nompojohok to balu-balu tumuu' susa' anu madi'mo ko anu nupitaha-taha'imani nu aha.

¹⁷ Ma'isa toho' aku ola lewa' nompojohok anak anu madi'mo ko tuumanyo ka' tinanyo da mo'ohop, padahan aku aiya manjoo' na anu o kaan.

¹⁸ Daagi' pe'e ise-ise' aha pinotuu'kumo; sampe toka iya na umunku sabole-bole ku palakai na aha.

¹⁹ De ku toa na mian anu susa', anu kasiasi hondo madi'mo moko oli pihude,

²⁰ ku pomamut na ia nu hude laken, posi bulu nu dombangku na tinonun binau laken, sahingga ia nompuji'mo aku, lengkat i uno nu kinyonyoanyo totu-totu'u.

²¹ De bisuannyo aku toho'mo nonsansalai anak anu madi'mo ko tuumanyo ka' tinanyo, kalana da aku untung i palakalangku,

²² bakasmo da mopato'mo na botokonku ohu-ohua' sahingga tongga'atmo aiya i bikoangku.

²³ Madi' hondo aku mombau sumo aijo', kalana hukuman nu Tumpu Allah na nompopobuhukmo hondo kinyonyoangku.

²⁴ Madi' toho' aku taha-tahahumo nontaha'imani halata'ku,

²⁵ kabai nombuulakonmo kakaya'anku.

²⁶ Madi' toho' aku nonsombah batu nu sinaa anu najingkamo ma'i-ma'ima' kabai bitu'on anu na'ima'mo hondo na jingkanyo.

²⁷ Madi' toho' aku taha-tahahumo na kinyonyoangku mongka'ima'i ia, kabai ku ooki na limangku susumo anu monsombamo salaku bau pongadati ia.

²⁸ Dosa' anu susumo aijo' konanyomo na mohumpak hukuman opatei, kalana madi'mo montapali Tumpu Allah Anu Daka' na kuasanyo.

²⁹ Ma'isa toho' ola sanang na kinyonyoangku de mian anu madi' ma'ima' hi belengku mohumpakmo kasansala'an kabai ola aku lame' kalana ia mohumpakmo balaa'.

³⁰ Aku madi' mondo'akon da silaka na mian anu mongka'ideki mae; madi' toho' aku nombau dosa' susumo aijo'.

³¹ Nusumbu' nu to mia-mian anu mokalaja hi belengku saba' maumo pa' ihe ku bee'i mongkaan i laiganku.

³² Laiganku madi' toho' montolak mian anu i lumbanan; madi' toho' pinojohoku na aha nale' i jalan.

³³ Mian sangga'at momposuluk dosa'nyo, panyo aku madi' toho' mombau susumo aha.

³⁴ Pikilan nu mian da'isan madi' ku kabuhuk, ka' mian mongalu mae madi'mo ku pajuli. Madi' toho' aku jinojoong i laigan kabai me ola momohokot, ola kalana nabuhukmo dumo saidi' mae o'alu.

³⁵ Pa' madi'mo ko mian anu mongka'oho' mompotombihing potataengku? Aku basumpa' saba' memang totu'u na iwi-iwi' aijo'. O'amalakon da Anuje Daka na kuasanyo na montaami mae aku. De bisuannyo sangka'an nu anu mongka'ideki mae aku tinulis iwi-iwi' sahingga tinoangku,

³⁶ saba' sanang hondo na ku pokona aiya i bikoangku, ka' salaku makota ku pokampa'mo i ubaku.

³⁷ Ku poto'ije hi Tumpu Allah na anu binaungkumo iwi-iwi'; ku bauje babaani na mangadap hi ia ka' ku langakakonje mokiita' na ubaku.

³⁸ De bisuannyo tano' anu pinajekoakon kumo aijo' binulingkumo, ka' ingagoankumo hi mian anu memang totu-totu'u ahi' tumpunyo,

³⁹ de bisuannyo isi nu ale'nyo ingingkotankumo kinaanku, ka' pinojohokumo da mo'ohop na tumpu nu ale' anu nosu'an,

⁴⁰ bakasmo da misa' jelai ka' gandum na tumuu' i ale', panyo hemput anu ko hi'nyo ka' padang.” Olamo sumo uuka na tinaeakon i Ayub.