AYUB 28 - KITAB NU TUMPU ALLA LELE MA'IMAI'

Mompuji' kapandean bapikin

¹ Daagi' ko tampat anu lewa' pongkekean salaka; daagi' ko tampat mule' lewa' pontapisan mosoni' da totu-totu'u ohumpak na mosoni' anu madi' ko galo'nyo.

² Besak okekei ka' ohumpak i uno nu tano'; batu opomoe' ka' otapis da ohumpak na tambaga.

³ Maumo pikat hondo panyo sabole-bole lumajang, tampat anu maleeng hondo mamba opalesa. Kiijo', i uno nu pintung, mian molio ngangahan nu batu.

⁴ I tampat anu majo'on hondo madi'mo ko miannyo anu jojoong, anu ma'isa toho' pineja' ka' kinajalanan, mian anu mokalaja maninsegot i kahohon i uno nu bolo' anu liing hondo.

⁵ Tano pohumpakan anu o kaan nu manusia, panyo kaiyong mae iuno nu tano' suele, iwi-iwi' obalik da obalik na mongkeke sahingga isi nu tano' mosungke-sungkehetmo.

⁶ Batu anu i uno nu tano' de o pomo'emo ka' otapis biasa pohumpakan anu obau mainan, anu mobilu' sumo langit, ka' abu'nyo na biasa pohumpakan mosoni' anu madi' kogalo'nyo.

⁷ Bonyia' madi' monsumbu' jalan mamba mokiijo', ka' mule' bonyia' ma'isa toho' i lumahap motulu aita' i buannyo.

⁸ Ma'isa toho' singa kabai binatang sangga'at anu mahangas, montului jalan anu liing hondo mokiijo'.

⁹ Maumo mosia na ko kuutnyo na batu nukeke nu mian, okekei ka' obali-balikakon na unonnyo nu bungkutnyo toka-toka mokaiyong i lananyo.

¹⁰ Salatan ia nongkekemo bolo' bau kalajangan i uno nu bungkutnyo nu batu, ia nohumpakmo batu mainan anu mahan hondo na olinyo.

¹¹ Tinoka-tokamo i bulakan nu uee na ia nongkekei, lantas tinabuka'mo apaa na anu kiijo' sulu-suluk.

¹² Panyo iya mae na timbali polioan kapandean bapikin? Iya mae na timbali balagulu'anto da osumbu'to?

¹³ Kapandean bapikin madi' ko anu hi manusia; madi' ko anu monsumbu' totu-totu'u angga'nyo anu sahondo-hondonyo.

¹⁴ Lananyo nu ambai ka' ndalangon notataemo tukoonyo kapandean bapikin madi' ko anu kiijo' hi ia.

¹⁵ Kapandean bapikin madi' opoko ala otolosi nu mosoni' anu madi' ko galo'nyo, ka' maumo suele salaka na bau pongoli madi' ahi' opoko ala.

¹⁶ Mosoni' ka' mainan anu mahan hondo na olinyo madi' moko ala mongkakanai angga'nyo.

¹⁷ Mosoni' kabai kasa anu ma'ima' hondo madi' moko ala mongkakanai ia, madi' opoko ala obayan nu tampat pongisian mosoni' anu mahan hondo na olinyo.

¹⁸ Kapandean bapikin na lebe matangkas na angga'nyo molingkudui manyi-manyi anu momea' na bau olo', kristal, kabai mutiara.

¹⁹ Batu mainan anu mokini ka' mosoni' anu madi' ko galo'nyo, sahanyo ahi' kapandean bapikin na ko angga'nyo.

²⁰ Iya mae na pinolengkatan nu kapandean bapikin? Iya mae na pohumpakan da kita monsumbu-sumbu'.

²¹ Anu tumuu' ko nyawanyo ma'isa toho' nontoa ia, ka' suele tomonsi' aita' i langa madi' montoa ia.

²² Kapatean ka' kasilakan suele notataemo, aha ola nohongo sisik anu ma'isa natantu.

²³ Ola Tumpu Allah na monsumbu' kajojoongan nu kapandean bapikin, ola ia na monsumbu' jalan mokiijo',

²⁴ kalana ia na montoa-toa puusnyo nu tano'; sinin na anu i patunyo nu langit timbali Nu potomatakon.

²⁵ Salatan mombun binee'an-Nyomo kahosonan ka' tinantukan-Nyomo na katokaannyo nu ambai;

²⁶ Salatan tinantukan-Nyomo na katudunan nu ujan, ka' katuluan nu kilat ka' gohung;

²⁷ aijo'je na tempo'nyo kapandean bapikin tinoa-Nyo, inguji'-Nyomo na angga'nyo, lantas pinotantu-Nyo je na katantuan-Nyo.

²⁸ Tumpu Allah nompoto'imo hi manusia, “Da ohumpak na kapandean bapikin, Tumpu Allah tionyo ahi' o'adati nu belemiu. Da timbali opangalati'i, kalakuan anu ma'idek tionyo ahi' opimpaliakon jo'o-jo'on.”