AYUB 27 - KITAB NU TUMPU ALLA LELE MA'IMAI'

Ayub

^1-2 I Ayub po'ule' mule' nontusakon potataenyo, ia notatae, “Juno nu sanggo sanggo nu Tumpu Allah anu tumuu', anu madi' mae nombee'i ka'adilan hi belengku,

³ aku basumpa': De daagi' Tumpu Allah mombee'i aku nyawa, de daagi' ko nyawa i uno nu butongku,

⁴ biwingku madi' timbali montaloakon potatae anu baleko', jila'ku madi' timbali montaloakon potatae anu mongakali.

⁵ Jadi, madi'mo aku mongka'oho' montaloakon tukoongku belemiu totu'u, sampe aku silaka sabole-bole ku akui na aku aiya memang susi'.

⁶ Aku sabole-bole ahi' montoongi kalakuanku anu saja' hondo tulu-tulutan, ka' suele kinyonyoangku saja' belesi'.

⁷ O'amalakon da mian anu mompisala'i aku o hukum susumo mian anu palaganta, ka' mian anu monggagakon mae aku mohumpak hukuman susumo mian anu saja' mombau anu ma'idek.

⁸ Te daagi' mule' ko anu nutaha'imani nu mian anu ma'idek na kinyonyoanyo, de tokamo na tempo'nyo Tumpu Allah mongalamo nyawanyo?

⁹ Te daagi' Tumpu Allah mohongo ia humang, de apa-apaa na anu monsusa'i montokaimo mae ia?

¹⁰ Sabenannyo ia saja' ahi' mongindi kasanangan anu lengkat mae hi Tumpu Allah, ka' balado'a hi Ia boli ma'osa.

¹¹ Belemiu ku pogulu'imo kuasa nu Tumpu Allah anu daka' hondo, ku poto'imo hi belemiu na tanga'an nu Anu Daka' hondo na kuasanyo.

¹² Panyo, pinosi toamo nu belemiu iwi-iwi'. Jadi, kadaka' belemiu nompokinde'imo mae pokinde' anu madi'ko alati'nyo?”

Zofar

¹³ Sahingga notataemo na i Zofar, “Sumo uuka na Tumpu Allah Anu Daka' hondo na kuasanyo mohukum mian anu uwesan ka' palaganta.

¹⁴ De anaknyo da'isan, aha silakamo i uno nu pahampatean ka' to maku-makumpunyo tumuu'mo i uno nu kasusa'an.

¹⁵ To julu-julunyo anu daagi' tutuu' silakamo nu panyakit anu molele, ka' to balu-balunyo madi'mo mohangi aha.

¹⁶ Timbali na salakanyo opunjuk na konjoo'nyo, ka' baju'nyo otambun jonjoo',

¹⁷ panyo salaka ka' baju' haha aijo' iwi-iwi', mianmo anu hodi' na kinyonyoanyo na montumpui.

¹⁸ Laigan nu mian anu ma'idek na kinyonyoanyo mahu'mo susumo peta nu loa', ola laigan anu madi' pin na o joongi susumo tahop nu mian anu monjaga.

¹⁹ Ia momale'akon butongnyo susumo mian anu kaya, panyo ia madi' moko ala po'ule' mongulit, salatan ia mobulamo aijo' mae ikahoyotannyo madi'mo daagi' ko kakaya'annyo.

²⁰ Nutuda'imo mae nu balaa' anu okabuhuk hondo susumo iyaba' anu talalo hondo daka' monti-montiik tinobuntunmo mae. Antong daka' anu tinoka mae tonga-tonga' pahu nontilahabakonmo ka' nomboamo ia.

²¹ Mombun nu kabete'an nohangkatmo ia, kia' nompuhakonmo ia lengkat aijo' i laigannyo.

²² Balaa' anu nontuda'imo ia aijo' madi'mo nonginau' kalibosan, jadi bemanau' sahanyo ahi' nopalaimo molio paninsulukan.

²³ Ia nohumpakmo balaa' ola mian nohapa'i lima; iyaya mae na tampat ola saja' mongalu ia.”