AYUB 22 - KITAB NU TUMPU ALLA LELE MA'IMAI'

KINOPINTOLUNNYOMO NA BINASISIK 22:1–27:23 Elifas

^1-2 Lantas notataemo na i Elifas, “Iwi-iwi' na manusia, mau pe'e ola samian madi' ko anu mingkaliangan hi Tumpu Allah. Mian anu ma'ima' hondo na kinyonyoanyo ka' madi' toho' mombau anu ma'idek, ola mingkaliangan hi posi butongnyo.

³ Kabai pa' kogunanyo hi Tumpu Allah, de beleyum mombau apaa na koonyo nu Tumpu Allah? Kabai ko untungnyo hi Ia, de kantumuu'an nu beleyum talakana'?

⁴ Misa' kalana beleyum mabuhuk hi Tumpu Allah, beleyum opisala'i ka' osangka sinala'mo,

⁵ panyo kalana nanjoo'mo hondo na dosa' nu beleyum, ka'talalo ahi' ma'idek na kalakuan anu binaumo nu beleyum.

⁶ De utus nu beleyum madi'mo moko ala mombayan samaya'nyo, nu agoimo nu beleyum na baju'nyo iwi-iwi'.

⁷ Mian anu kainmo na mokalaja madi'mo nu po'inumi nu beleyum uee, anu mo'ohopmo madi' nu bee'i nu beleyum mongkaan.

⁸ Nupake na pangkat ka' kakuasa'an nu beleyum, mongala tano' songko-songko.

⁹ Misa' ola to mia-mian anu balumo na madi' nu tulungi, panyo anu ingunonmo madi'mo ko tinanyo ka' tuumanyo suele ahi' nusansala' nu beleyum.

¹⁰ Kalana aijo' beleyum tinikubanmo nu kasusa'an sumomo so'o anu kahanda'mo monsilakai beleyum, sahingga monti-montiik kinyonyoa nu beleyum nabuhukmo.

¹¹ Sinaa ko pintu-pintuangnyomo, madi'mo moko ala montoa na beleyum; beleyum molomosmo nu anjuhakonmo nu iyaba' anu daka' hondo.

¹² Te misa' Tumpu Allah jojoong ahi' aita' mae i langit anu matangkas hondo, ka' montudang mokaiyong, mandala' haha aijo' iwi-iwi' anu matangkas hondo?

¹³ Panyo pinokilawa nu beleyum, “Te ia apaa naanu pisumbu-sumbu'? Ia kiita' mae i sambiha' nu kundom jadi madi' ahi' moko ala mongulus palakalanto.”

¹⁴ Beleyum monsangka tukooyum Ia montoa mae nu ompo' nu kundom, ka' tukooyum Ia lumajang i olotnyo nu langit ka' tano'?

¹⁵ Jadi beleyum sabole-bolemo motululu, i jalan anu pinile'anmo nu to mia-mian anu ma'idek na kinyonyoanyo?

¹⁶ Aha ihahumbitakonmo maumo ma'isa pe'e tempo'nyo na silaka, ka' inganjuhakonmo nu iyaba'.

¹⁷ Ahamo aijo' na anu baani hondo madi' palesaya hi Anu Daka' hondo na kuasanyo, ka' monsangka Ia madi' moko ala mombau apa-apaa hi aha.

¹⁸ Padahan Tumpu Allah na anu nompokayamo aha! Aku totu-totu'u madi' hondo monsumbu-sumbu' pikilan nu mian anu ma'idek na kinyonyoanyo!

¹⁹ Mian anu ma'ima' na kinyonyoanyo, kumojo kalana i lame'mo, de montoa mian anu ma'idek na kinyonyoanyo o hukumo.

²⁰ Iwi-iwi' na kakaya'an nu mian anu ma'idek na kinyonyoanyo nagalismo, na'idek, ka' tinoyo'anmo nu apu na anu daagi' tinontuha'.

²¹ Jadi, O Ayub pompaha damemo tiba Tumpu, da bolimo saja' mangada' na kinyonyoa nu beleyum, De nubaumo nu beleyum sumo aijo', mohumpakmo ka'untungan na beleyum.

²² Talimamo apaa na anu pinokinde'akonmo nu Tumpu hi beleyum; boli okolilimi na aijo' iwi-iwi' i uno nu kinyonyoa nu beleyum.

²³ Po'ule'mo balatobat hi Tumpu ka' bolimo beleyum mindaka-daka' na kinyonyoa, ka' hahan anu ma'idek i uno nu laigan nu beleyum bolimo daagi' nu bau.

²⁴ Bahetakonmo na mosoni' nu beleyum anu madi' ko galo-galo'nyo aijo'; lumbu'akonmo mokiijo' itotonga' nu inanggasan nu kaunyo.

²⁵ Anumo Daka' na kuasanyo na timbali mosoni' nu beleyum, ka' salaka nu beleyum anu ma'ima' hondo.

²⁶ Sahingga beleyum timbalije saja' sabole-bole palesaya hi Tumpu Allah, ka' nusumbu'mo nu beleyum taalu' ia ahi' na pinolengkatan nu kasanangan nu beleyum.

²⁷ De beleyum balado'a nu taamimo na beleyum, ka' apaa na anu jinanji'mo nu beleyum hi Ia nubaumo nu beleyum.

²⁸ Apa-apaa na anu nubau saja'mo mingkaliangan, ka' jingka monjingkaimo kantumuu'an nu beleyum.

²⁹ Mian anu saja' mohangka-hakgat butongnyo nutauakon nu Tumpu, panyo anu madi' lewa' mohangka-hangkat butongnyo nu posalamat nu Tumpu.

³⁰ Nutulungi nu Tumpu na beleyum de beleyum madi'mo ko kasala'an, ka' de beleyum mombau apaa na anu nuka'ima'i nu Tumpu.”