AYUB 20 - KITAB NU TUMPU ALLA LELE MA'IMAI'

Zofar

^1-2 Lantas tinaamanmo i Zofar, “O Ayub, madi' sanang na kinyonyoangku mohongo potatae nu beleyum, uuka aiya sampamo ku taami.

³ Potatae nu beleyum atina' talalomo ahi' nompopo'ambang, panyo ku sumbu' mosia na montaami.

⁴ Madi' nusumbu' nu beleyum na tempo'nyo naipuan mae, salatanmo pe'e manusia momonanyo pinojoong i dunia,

⁵ kalame'an nu mian anu ma'idek na kinyonyoanyo ola sasaingoni', ka' kasanangan nu mian anu palaganta ola sangkinihap na mata?

⁶ Maumo ia talasanggo toka-tokamo aita' i langa, na kotangkasnyo, sahingga ubaknyo montokamo kundom,

⁷ panyo ia saidi' mae madi'mo otoa-toa sampe toka sidu-sidutu', madi'mo otoa-toa i dunia kalana han anu moko ambang hondo. To mia-mian anu monsumbu'mo ia, molelekimo, “E, pa' noyamo na ia?”

⁸ Ia madi'mo otoa-toa susumo anu ola ingipi, madi'mo otoa-toa susumo anu pinihimo.

⁹ Ia madi'mo otoa-toa nu mata; ia madi'mo daagi' ko anu kiijo' i kajojoongannyo.

¹⁰ Anu u'utu mae tinomangnyo hi miana nu kasiasi, tionyo ahi' nubolosi nu to ana-anaknyo.

¹¹ Maumo ia ma'isa langkai' ka' daagi' mahoson, panyo sasaidi' uuka ia timbalimo abu'.

^12-13 Talalo ahi' matami' na han anu ma'idek i uno nu nganga'nyo! Gagalannyo bolimo sampa nu lonyom; kalana aijo' me saja' nu omu'i nu jila'nyo, da pin na ia lewa' monyamit.

¹⁴ Panyo anu o kaan aijo' sanggalasanmo na balu-balu'nyo de kiijo'mo i kompong, timbalimo lasung anu mapakat anu momboamo kasilaka'an.

¹⁵ Halata' anu tinomangnyo ka' i lonyomnyomo madi' ka' madi' tantu nu lua'akonmo; Tumpu Allah na monsabatakon lengkat i uno nu kompongnyo.

¹⁶ Anu ma'idek na kinyonyoanyo monginumo lasung sahingga monsaduakonmo da mohumpak balaa', ia silakamo nu aijo' susumo anu nu bahe'mo nu ulo anu ko bisa'nyo.

¹⁷ Ia madi'mo monyamit lanya' nu zaitun anu molabi-labimo, kabai susu ka' juu' nu uwani' anu manjoo'mo hondo.

¹⁸ Iwi-iwi' na ka'untungannyo tionyo ahi' nu sule'akonmo; apa-apaa na anu i humpaknyomo madi'mo nu oa'i na kasanangannyo.

¹⁹ Kalana ia lewa'mo nonsakisa mian ka' nomopsusa'mo mian anu kasiasi; ia lewa'mo nongagoi laigan nu mian anu misa' ia na nombau.

²⁰ Kalana ia talalo ahi' mangoa, madi' ko kapa'osannyo, sahingga ia sabole-bole molio apa-apaa na anu nu kahanda'i.

²¹ De ia mongkaan iwi-iwi' nu ingkoti, kalana aijo' kasanangannyo madi' pinin.

²² Salatan kasanangannyo tinahahumo hondo, kasansala'an ka' kasusa'an nontokaimo mae.

²³ Salatan ia tinasiagamo mongisi kompongnyo, tinambuha'anmo hondo nu Tumpu Allah na ia ka' i hukum-Nyomo.

²⁴ De ia mopalai da boli nukona nu bajak anu ko aja'nyo, ia nubelaimo nu pana' tambaga.

²⁵ Ia kinonamo nu pana', sahingga binelaonmo; mata nu pana' anu joliotan nolampasmo butongnyo, sahingga nabuhukmo na kinyonyoanyo.

²⁶ Halata'nyo anu lewa' pino'una'nyo i ningkotmo; ia ka' iwi-iwi' na aha salaigan tinoyo'anmo nu apu anu madi' pinosun nu manusia.

²⁷ Langit nompotoamo kalakuannyo anu ma'i-ma'idek aijo'; tano' nobungkutmo nongewa ia.

²⁸ Iwi-iwi' na kakayannyo ningkotmo, kalana talalomo tinambuha'an nu Tumpu Allah.

²⁹ Aijo'mo na uki' nu mian anu madi' mompajuli Tumpu Allah, uki' anu tinantukanmo nu Tumpu Allah hi ia.”