AYUB 2 - KITAB NU TUMPU ALLA LELE MA'IMAI'

Anu lewa' Monggoda nonsobai mule' i Ayub

¹ To mala-malaekat kiita' i suluga' po'ule' ninsusule' nangadap hi Tumpu, ka' Anu lewa' Monggoda kiijo'mo hi aha suele hingga-hinggat.

² Lantas pinokilawamo nu Tumpu hi ia, “Lengkat mae iya na beleyum?” Tinaaman nu Anu lewa' Monggoda, “Aku sala'je mae lewa' inamba nonsongkohi dunia aiya ka' nolajangi tinoka-toka iyayamae.”

³ Pinokilawa nu Tumpu, “Pa' totu-totu'u tinoamo nu beleyum na mian-Ku i Ayub? I dunia aiya songko-songko madi' ko mian anu ma'ima' na kinyonyoanyo sumo ia. Ia monsombah Aku ka' totu'u madi' lewa' mombau anu ma'idek. Ia daagi sabole-bole tulu-tulutan hi belengku, maumo oko pagalamo monsale'i Aku da opateimo na ia, mau madi' ia ko sala'nyo.”

⁴ Panyo Anu lewa' Monggoda nontaami, “Nyawa ka' butong mahoson na lebe ko angga'nyo molingkudui halata'. Manusia halala' na mongkolobanakon halata'nyo asan ia tataap sabole-bole tumuu'.

⁵ De maluannyo butongnyo dinokemo nu Belento, tantu tinotobi'akonnyo na belento!”

⁶ Jadi, notataemo na Tumpu hi Anu saja' Monggoda, “Yo ii', baumo pa'apaa na anu nuka'ima'i obau hi ia, asan boli nu patei na ia.”

⁷ Jadi Anu saja' Monggoda aijo' nambamo pinala'iannyomo na Tumpu, ka' pinokonannyomo na butongnyo i Ayub songko-songko kahomo bela nu kumahut, lengkat pe'e i pala nu tengkenyo tinoka-toka nokiita' i ubaknyo.

⁸ Lantas i Ayub sinumuhangmo koko tambulan nu duhehe ka' nongalamo kubeng nu lean bau lewa' pongkahutnyo butongnyo.

⁹ Bengkele'nyo notataemo hi ia, “Te daagi' mule' totobo' na beleyum sabole-bole montuluti Tumpu Allah? Donganmo o, totobi'akon na la, lantas mangkongmo!”

¹⁰ Tinaaman i Ayub, “Beleyum motatae sumomo mian anu ponga'! Te toho' mule' kita ola saja' mongka'oho' mongala anu ma'ima' hi Tumpu Allah, lantas anu madi' ma'ima' na madi'mo o'alanto?” Jadi maumo i Ayub nongoa'imo iwi-iwi' na balaa' anu susumo aijo' panyo ia madi' nontaloakon potatae anu mompisala'i Tumpu Allah.

To sanga-sangalu i Ayub tinokamo

¹¹ Balaa' anu nontokaimo i Ayub ihongomo nu aha totolu' na to sanga-sangalunyo, aijo'mo i Elifas lengkat mae i kota Teman, i Bildad mian nu Suah ka' i Zofar mian nu Naamah. Aha nosangaja'mo mae toka nontoa ka' mombee'i pikilan ia da tokolo' susa na kinyonyoanyo.

¹² Panyo daagi' mae jo'o-jo'on na aha nontoa, kinoboli' madi'mo sinumbu' nu aha na ia. Aha singkapmo i humang ka' nolokihis ka' binea-beakmo nu aha na baju' nu aha ka' nonsagakonmo abu' nokiita' i langa ka' aita' i ubak nu aha.

¹³ Pinitun sinaa ka' pinitunpahu na aha lewa' sinumuhang i tano', koko hi Ayub, santiok pe'e na potatae madi'mo ko anu tinaloakon nu aha, kalana aha nontoamo paya' talalomo ahi' sinansala na ia.