AYUB 19 - KITAB NU TUMPU ALLA LELE MA'IMAI'

Ayub

^1-2 Panyo tinaaman i Ayub, “Kadaka' aku saja'mo opisala'i nu belemiu, ka' osakisamo nu belemiu na aku nu potatae?

³ Saja'mo belemiu mompopo'ambang aku, ka' madi' ma'ambang na belemiu monsakisa aku.

⁴ De bisuannyo sala' na anu ku bau aiya, aijo' madi' mompolugi' belemiu.

⁵ Otutugi nu belemiu, belemiumo na lebe ma'ima' molingkudui aku; kasusa'anku osangkamo nu belemiu aijo'mo na bukuti'nyo aku sinala'mo.

⁶ Osumbu'mo ahi' na aku aiya sinakisamo nu Tumpu Allah, ka' i hakop-Nyomo nu talong-Nyo.

⁷ Aku lewa'mo tinumatuhun kalana talalomo ahi' na pinonsakisa-Nyo aijo', panyo mau pe'e samian madi' ko anu nontoa mae aku. “Iya na ka'adilan,” koonyo nu loboo'ku, panyo madi' ko anu nohongo mae aku.

⁸ Tumpu Allah nongompomo jalanku, aku madi'mo moko ala motulu, kajalananku pinopikat-Nyomo.

⁹ Ingagoan-Nyomo na halata'ku iwi-iwi', ka' sanggongku anu tinalasanggomo binusikan-Nyomo.

¹⁰ Iyayamae na tampat sanggongku ingidean-Nyomo, sumomo kau' binubutmo nu mian na bakatnyo, lantas pinojohokmo da mateekmo ka' mangkalualemo, sumo aijo'mo na Ia nohahumbitakon iwi-iwi' na anu ku taha'imani.

¹¹ Pusa nu Tumpu Allah hi belengku nompaka moakmo; aku sinangka-Nyomo sumomo sampobali'-Nyo.

¹² Suludadu-Nyo nontumbuhimo mae madi'mo pinoko tewa'; kajalananku ingompok-Nyomo, ka' kemahku tiniku-Nyomo.

¹³ To utu-utusku pinojo'on-Nyomo hi belengku; iwi-iwi' na mian anu mompahasumbu' tiba aku madi'mo monsumbu' aku, aha montoa mae aku sumomo mian anu i salipu'an.

¹⁴ Aha anu sa'anakan mae tiba aku iwi-iwi' madi'mo mongohani mae; to sanga-sangalungku madi'mo mae monginau' aku.

¹⁵ Posaihonku boune kinoliliman-Nyomo na aku, tuan nu aha; sinangkanyo na aku, te mian anu ma'isa sinumbu'nyo.

¹⁶ Ilagangku na posaihonku aijo', panyo madi' tinaamannyo, maumo pagala sinale'anku ma'i-ma'ima' na ia.

¹⁷ Bengkele'ku nonguahimo na mongook sawongku, Utusku omput nu pusongku madi'mo sanang na mongohani aku.

¹⁸ Aku nu popo'ambang nu to ana-anak i jalan; de aku tuminjo, aku okokojoi.

¹⁹ To sanga-sangalungku anu mompahakona hondo aku, mongkahegatimo na montoa mae aku; aku pinala'ianmo nu aha anu kuku kalibosi.

²⁰ Butongku me kilit na kampi-kampit i buku; me ise-ise' aku sinilakamo ka' nyawangku nobotu'mo.

²¹ O belemiu to sanga-sangalungku, kalibosiakon mae na aku, kalana lima nu Tumpu Allah nondokemo aku.

²² Tumpu Allah sabole-bolemo monsakisa aku; kadaka' belemiu montihomo Ia? Ma'isa belemiu na'osa na nonsakisa?

²³ Ah de timbali, ku poita da potataengku o tulis, sahingga saja' o'inau';

²⁴ ku poita da besak na bau pompa'atakon i batu, da madi' sampa kangalinan sampe toka sidu-sidutu'.

²⁵ Ku sumbu' kiita' i suluga' daagi' ko anu monsangaja'i aku; ahennyo mae Ia na toka mae montulungi aku.

²⁶ Maumo kilitku kahomo bela ka' nobehe-behe'mo, panyo de daagi' ko butongku, Tumpu Allah saja' ku tonto'i.

²⁷ Posi matangku na pontonto'ingku Ia, ka' aiya hi belengku Iamo aijo' na bau bela'ku. Kinyonyoangku naidekanmo kalana belemiu notatae,

²⁸ ‘Mosia na kita mombau da okalakmo na Ia?’ Belemiu moliomo jalan da mahampalakalamo.

²⁹ Panyo, uuka aiya kabuhukmo na bajak! Kalana Tumpu Allah montambuha'i ka' mohukum mian anu baladosa'; Sahingga osumbu' miu, taalu' daagi' ko Tumpu Allah anu momputusi hukuman nu manusia.”