AYUB 18 - KITAB NU TUMPU ALLA LELE MA'IMAI'

Bildad

^1-2 Sahingga tinaamanmo i Bildad, “O Ayub, hipianje na beleyum madi'mo motatae? Pomohokotmo, ka' potombihingmo na kami aiya kahanda'mo motatae.

³ Kadaka' nu sangka na kami aiya ponga', ka' opokakanakonmo nu beleyum na kami aiya susumo sapi'?

⁴ Beleyum motambuha ola da monsakiti butong nu beleyum. Kalana kapentingan nu beleyum sahingga dunia madi'mo ko miannyo, ka' bungkutnyo iwi-iwi' olalinmo?

⁵ Sulu' nu mian anu ma'idek na kinyonyoanyo madi' ka' madi' tionyo ahi' opoho'mo; apunyo madi'mo daagi' toho' otutungi.

⁶ Jingka i uno nu kemahnyo pintungmo; sulu' anu monjingkai madi'mo daagi' ko majingka.

⁷ Lajangnyo anu ma'ima' hondo timbalimo maha sungonan na lumajang; apa-apaa na anu nu tanga'i monsaduakonmo ia tosumpun.

⁸ Ia i lumajangmo nokiijo' i so'o sahingga kinonanyomo na tengkenyo.

⁹ Pantigannyo kinonamo nu talong sahingga ia i hakopmo.

¹⁰ Pinosuluk, i tano' na kahohon nu talong; i jalan, pinokonamo na bau pompagala, ka' pohakop.

¹¹ Mian anu ma'idek na kinyonyoanyo pinotolokengkengmo nu anu okabuhuk hondo anu nolengkat mae iyaya; anu okabuhuk me saja' mombatuki ia maumo moyamo na molangkasakon tengke.

¹² U'utu mae ia mahoson, uuka aiya ia nagesukmo; balaa' anu nonsakisamo ia saja'mo nombaya'i ia maumo pa' moyaya.

¹³ Kilitnyo kinekedanmo nu panyakit anu talalomo tinadok, lima ka' tengkenyo nabusikmo kahomo nana'.

¹⁴ Ia ihahimbitakonmu lengkat mae aijo' i kemahnyo, tampat anu nu oa'i sanang ka' madi' ko anu mompoposia, lantas binoamo da mongahopimo kapatean.

¹⁵ Uuka aiya maumo pa' ihe timbalimo monjojoongi kemahnyo, ka' i kiijo' kinakambuhakonmo na belelang, da bau pompatei somoyu nu panyakitnyo.

¹⁶ Iwi-iwi' na bakatnyo nanggasmo ka' nakadampihi'mo; iwi-iwi' na panga'nyo toto ise-ise' nanggasmo ka' nakapimo.

¹⁷ Ia madi'mo sinumbu-sumbu' i unonyo kabai i sambiha' nu kota'; mau pe' samian madi'mo ko anu nonsumbu-sumbu' sanggonyo.

¹⁸ Ia i uno nu jingka i laa'mo namba i uno nu pintung; i uno nu dunia nu mian anu tumuu' ia pinateanmo.

¹⁹ Ia madi'mo ko lee' ka' anak; i kampung kinahampeannyo mau samian madi'mo kino tuha'nyo.

²⁰ Nohongo uki'nyo anu sinumo aijo'mo mian anu jojoong i sasu kinsoban tinolokengkengmo, ka' mian anu jojoong i sasu kabete'an i lakatnyomo kalana nabuhukmo.

²¹ Sumo aijo'mo na uki'nyo nu mian anu palaganta, aha anu madi' mompajuli Tumpu Allah.”