AYUB 15 - KITAB NU TUMPU ALLA LELE MA'IMAI'

KINOPINDUANNYOMO NA BINASISIK 15:1–21:34 Elifas

^1-3 Sahingga tinaamanmo i Elifas, “Baleko' hondo, na potatae nu beleyum Ayub, madi' hondo-hondo ko patunyo! Madi' toho' kino mian anu pande hondo na bapikin montaami sumo beleyum aiya, madi' ia mosi pototu'u butongnyo nu potatae anu madi' ko kaliangannyo.

⁴ De bisuannyo potatae nu beleyum atina otuluti, madi'mo ko anu mabuhuk kabai balado'a hi Tumpu Allah.

⁵ Potatae nu beleyum atina' timbalimo sa'angu' na bukuti' saba' beleyum memang ahi' sala', panyo kalakuan nu beleyum anu ma'idek atina' nu kulubi nu potatae nu beleyum anu toto ima-ima'.

⁶ Madi'mo pilenje ku tuuk na beleyum ka' kupisala'i kalana posi potataemo nu beleyum atina' na mongkalak beleyum.

⁷ Pa' kooyum beleyumo na manusia anu momona pinohampe? Pa' polo-polo'mo ko beleyum salatan sinin na bungkutnyo pinotimbalimo?

⁸ Te i hongo nu beleyum na Tumpu Allah binatanga'mo? Te ola beleyum na ko kapandean nu manusia bapikin?

⁹ Iwi-iwi' na anu nusumbu' nu beleyum suele osumbu' mami; iwi-iwi' na anu nu pangalati'i nu beleyum suele talaang ahi' hi kami.

¹⁰ Kapandean bapikin aiya i humpak mami hi mian anu uwanonmo; aha polo-polo'mo daagi' ma'isa pe'e kino tuuma nu beleyum i hampe!

¹¹ Kadaka' Tumpu Allah mohase' madi' nuka'oho' nu beleyum? Kalana sanggonyo sahingga kami motatae sabaan hondo ka' madi' ko pesa-pesa.

¹² Panyo beleyum notambuha'mo, mata nu beleyum tinolo jolimo;

¹³ beleyum notambuha'mo hi Tumpu Allah ka' nonggagakonmo Ia.

¹⁴ Pa totu'u na manusia madi' toho' ko kasala'annyo? Te timbali na ia opototu'u i ahop nu Tumpu Allah?

¹⁵ Sadang pe'e malaekat suele madi' nu palesaya nu Tumpu Allah; aha madi' susi' na nutoa nu Tumpu Allah.

¹⁶ Apaa mule' manusia anu palaganta ka' anu ko kasala'annyo, anu monggotup kalakuan anu ma'idek susumo uee.

¹⁷ Potombihing mae Ayub, da ku tutuahakon hi beleyum na apa-apaa,

¹⁸ anu pinogulu'mo nu mian anu pande na bapikin hi belengku. Pangajalan aijo' i humpaknyo hi mompolee'nyo, ka' sabole-bole osisikakon iwi-iwi' hi lee'nyo.

¹⁹ Tempo'nyo aitu madi' ko anu lengkat mae i salipu'an jojoong i lipu' nu aha; madi' ko anu nombee'i pangajalan anu sala' sahingga aha madi' ahi' nompalingakon Tumpu Allah.

²⁰ Mian anu uwesan na monsakisa bubuu' sangko miannyo, saja' mongoa'i bata-bata i uno nu kantumuu'annyo.

²¹ Onyi' anu okabuhuk hondo momposiingmo bihingnyo; de madi'mo ko anu lewa' o'inau' na apa-apaa an mompopobuhuk, tololang tokamo mae montongkali.

²² Ia madi'mo ko popalaiannyo da monggoliliakon kantumuu'an anu pinintungmo, kalana bajak anu mompatei nololoi'mo ia maumo pa' moya na ia.

²³ Tomonsi' bonyia' nontanda'imo pa' hipian na tempo'nyo ia silaka, aha majo'ko'mo na mongkaan bangke'nyo. Jadi sininsumbu'mo na ia taalu' pinintungmo na kantumuu'annyo anu aiya mae i ahopnyo.

²⁴ Balaa' sumomo tomundo anu baani hondo, anu kahanda'mo molambani mae mahampate.

²⁵ Sumo aijo'mo na ukun nu manusia anu panggaga, ka' monggagakon Tumpu Allah; ka' baani na mongewa Anu Daka' hondo na kuasanyo.

^26-27 Kalana talalo na ia buulon ia nolambanimo ka' nongewamo Tumpu Allah; i hangkatnyomo na kantanyo, ia madi' hondo-hondo mangaku mabuhuk.

²⁸ Ia jinojoongmo i kota' anu singkapmo na'idek, i laigan anu singkapmo madi' ko anu nonjojoongi. Kota' haha aijo' tinantukanmo da sabole-bolemo timbali kota' anu nohobo-hobo'mo.

²⁹ Kakaya'an nu mian aijo' madi'mo tinoa-toa, pa' iya na buyo'nyo; halata'nyo ko mingko-mingkotnyomo.

³⁰ Madi'mo ko popalaiannyo na ia i kantumuu'annyo anu pintungmo hondo; apu montanggotimo iwi-iwi' na sumpenyo. Ia silakamo nu sawo nu Tumpu Allah.

³¹ De ia palesaya hi anu madi' mingkaliangan, ia o'akalimo; ka' salaku balosnyo anu nu humpak, suele madi' ko kaliangannyo.

³² Ma'isa pe'e toka na tempo'nyo, ia silakamo sumo panga' anu mangkalualemo madi' po'ule' molunou.

³³ Ia sumomo kau' anggur anu nohudu'mo na bua'nyo, sumomo kau' zaitun anu nohontangmo na bunganyo.

³⁴ Mian anu uwesan madi' mohumpak lee'; ola mingkot nukaan nu apu na laigan anu binaunyomo kalana han aijo' ola ka'untungan ia lewa' montinjohi ka' mompototu'u anu ko kasala'an.

³⁵ Aijo'mo aha anu lewa' mombau tanga'an anu ma'idek ka' lantas nubaumo nu aha, anu toto tage-tageo' saja' kiijo' sili-silip i uno nu kinyonyoanyo.”