AYUB 13 - KITAB NU TUMPU ALLA LELE MA'IMAI'

¹ iwi-iwi' aijo' toho'mo tinoangku ka' pinosi hongongkumo, ka' totu-totu'u ku sumbu' hondo.

² Apaa na anu osumbu' nu belemiu aijo' suele ku sumbu'; boli osangka nu belemiu aku mati alukmo hi belemiu.

³ Panyo aku ko kahanda' motatae hi Anu Daka' hondo na kuasanyo; aku kahanda' mompoto'i kahondoanku mongkona han aijo' i ahop nu Tumpu Allah.

⁴ kalana kaponga'an nu belemiu okulubimo nu belemiu nu han nu belemiu anu mongakali, madi' sala' sumomo ahi' sando anu madi' totu'u.

⁵ De bisuannyo belemiu madi' notatae, ku gantang belemiu osangka pande na bapikin.

⁶ Jadi soba hongo mae na bau ponggagakonku; potombihing mae ima-ima' na aku mompoto'i kahondoanku.

⁷ Pa' timbali kalana Tumpu Allah sahingga belemiu baleko'mo? Pa' timbali belemiu baleko' kalana kapentingan-Nyo?

⁸ Pa' timbali na belemiu matisangalu hi Tumpu Allah, ka' mompototu'u Ia salaku anu montinjohi Ia?

⁹ De Tumpu Allah na mongulus belemiu, pa' ma'ima' ahi' na pomputusi-Nyo? Te opoko ala o'akali nu belemiu na Ia susumo mongakali manusia?

¹⁰ De belemiu matisangalu, maumo opohowini, belemiu nu hukum nu Tumpu Allah ma'idek hondo.

¹¹ Pa' katalasanggoan nu Tumpu Allah madi' mompotolokengkeng santuu' nu beleyum? Pa' Ia anu okabuhuk aijo' madi' mompopobuhuk kinyonyoa nu belemiu.

¹² Iwi-iwi' na pokinde' nu belemiu sumomo abu' anu madi' ko kaliangannyo; belemiu montinjohi, sumomo tano' ponto anu dengke hondo na mokubeng.

¹³ Kalana aijo' pomohokotmo, sahanyo aku motatae! Madi'mo ku pajuli maumo pa' mosia na ka'ahenannyo!

¹⁴ Aku madi'mo mompele-pele' na silaka!

¹⁵ Aku sabinmo, kalana madi'mo ko anu otaha'imani! De nu silakaimo nu Tumpu Allah na aku, ku halala'akonmo na butongku aiya, panyo ku poto'i ahi' na kahondoan nu kalakuanku i ahop-Nyo.

¹⁶ Ihe na monsumbu' kalana aku baani sumo aijo' aku salamat, kalana mian anu ma'idek na kinyonyoanyo madi' baani na mangadap hi Tumpu Allah!

¹⁷ Uuka aiya hongo ima-ima' na potataengku; hongo ima-ima' na anu ku tutuhakon.

¹⁸ Anu jinadimo aiya i butongku ingitu-itumkumo da ku poto'imo; sinumbu'kumo na aku madi' koko opisala'i!

¹⁹ O Tumpu, de Belento tokamo mae ka' mompisala'imo aku, aku momohokotmo ka' montanda'imo ajanku.

²⁰ Panyo popo'i'mo mae ohua' na anu ku kakaase aiya da aku baani na po'ule' mangadap hi Belento:

²¹ bolimo mae monsakisa aku, ka' bolimo mae nu pokonai na aku nu tambuha' nu Belento anu talalo hondo mompopobuhuk aku!

²² Potataemo mae, da ku taamimo, kabai da akumo na motatae, lantas taamije mae!

²³ Sangkukamo na konjoo'nyo na sala' ka' dosa' anu binaungkumo? Iwi-iwi' na kasala'an anu binaungkumo tionyo ahi' poto'imo mae Nu Belento!

²⁴ Kadaka' Belento nambamo ka' nompala'imo aku? Apaa nasababnyo Belento monsangka aku sumomo sampobali' nu Belento.

²⁵ Aku ola sumo hon mohontang de motulumo na baleba, madi' minsoop i akan na Belento mompopobuhukmo aku! Aku ola sumo hat anu nanggasmo ka' nangkalualemo, te toho' mule' na Belento lewa'mo mololoi' aku!

²⁶ Tinantukanmo nu Belento na ukunku anu ma'idek hondo hi belengku; binalosakonmo nu Belento na kasala'anku tempo'nyo aku daagi' olitau.

²⁷ Tengkengku pinungumo nu Belento nu lante' besak, iwi-iwi' na ko langka-langkasku nujagai nu Belento. Ka mule' pala nu tengkengku, sabole-bole nutonto'i nu Belento.

²⁸ Sahingga aku napukmo susumo kau' anu nahutakmo; susumo hude kinaanmo nu ane', aku nahu'mo.