AYUB 10 - KITAB NU TUMPU ALLA LELE MA'IMAI'

¹ Na'osamo na aku ka' monguahimo na ku oa'i montutugi kantumuu'anku, sahingga ku taloakonmo iwi-iwi' na kasansala'an nu kinyonyoangku.

² O Tumpu Allah, bolimo nupisala'i mae Nu belento na aku; potalangakonmo mae kadaka' aku Nu ewamo mae nu Belento.

³ Apaa na ka'untunganyo de belento monsansalamo mae sumo aiya, ka' mongalinmo anu binaumo nu belento? Apaa na ka'untungannyo de belento montinjohi pikilan ka' tanga'an nu to mia-mian anu ma'idek na kinyonyoanyo?

⁴ Pikilan nu Belento madi' pokakana tiba pikilan nu manusia

⁵ ka' umun nu Belento madi' sumo ko kodo' nu umunnyo.

⁶ Desumo aijo', kadaka' pagalamo nu selidiki nu Belento na dosa'ku iwi-iwi'? kadaka' sabole-bolemo nulio nu Belento na kasala'anku?

⁷ Sabenannyo nusumbu' nu Belento na aku aiya madi' ahi kosala'nyo memang totu-totu'u ahi' madi' sala'. Nusumbu' nu Belento saba' mau pe'e samian madi' moko ala momposalamat aku anu atina' i kakuasa'an nu lima nu Belento.

⁸ Aku aiya limamo nu Belento atina' na nontali'i mosia ka' uuka aiya kahanda'mo nupatei nu Belento na aku?

⁹ Boli okolilimi saba' aku aiya tano' na binau nu Belento! Te toho' mule' aku aiya po'ule'mo nupotimbali nu Belento abu'?

¹⁰ Pinobee'mo nu Belento na tuumangku nompotimbalimo aku ka' pinodaka'mo nu Belento na aku i uno nu kompong nu tinangku.

¹¹ Butongku aiya te buku ka' uat na tinali' nu Belento; buku nu butongku pinokonanmo nu Belento antoknyo da bau pombodinyo.

¹² Pinotumuu'mo nu Belento na aku; aku kinalibosanmo nu Belento, santuu'ku jinaganmo nu Belento ka' pinalakanmo nu Belento.

¹³ Panyo uuka aiya sinumbu'kumo, taalu' tempo'nyo aitu, hoko-hokot lewa'mo i niat nu Belento na kasilakanku.

¹⁴ Nu jagai na aku dumo mamanga mombaumo kasala'an, da madi' nu bee'nu Belento na ka'ampunan.

¹⁵ De aku mombaumo dosa' memang sisiku silakamo! Panyo de anu ku bau misa' anu oka'ideki, sabole-bole ahi' aku saja' otuuk nombaumo dosa'! Madi' baani na aku monlangakakon ubaku, kalana talalomo hondo mongoa'i susa' na kinyonyoangku ka' talalomo hondo na'ambang.

¹⁶ De ku humpak na anu ku usahakon maumo madi' sangkuka na konjoo'nyo, Belento sumomo ahi' singa na mololoi' mae aku. Ka' po'ule' mule' nu potoa mae na kakuasa'an nu belento, ola da mompopobuhuk aku.

¹⁷ Saja' nupotoka mae nu Belento na sakisi anu monggagakon aku; ka' mompaka pintuangmo na Belento pusa hi belengku. Nu pokau mae nu belento na to sulu-suludadu anu sangga'at mule' da montumbuhimo mae ka' mompahampateakonmo mae aku.

¹⁸ kadaka' pinobee'mo nu belento na aku pinohampe i dunia aiya? Sahanyo aku sinilakamo salatan i hampemo da madi'mo tinoa nu mian!

¹⁹ Sahingga sumomo aku madi' pinohampe, kalana lengkat mae i kompong balomo lajang i lamun.

²⁰ Ha, madi'mo pin aku silakamo, jadi pobakasmo na aku, sausa' da ku oa'imo nu tuha' nu kantumuu'anku aiya.

²¹ Madi'mo pin aku mambamo ka' madi'mo minsusule' mae, mambamo i lipu' anu pikat hondo, ka' talalo hondo liing.

²² Lipu' anu pikat hondo, ka' saja' mongkohiabakon hahan anu mombau kahengge'an, tampat anu madi' opoko ala obedakon na jingka tiba pintung.”