AMSAL 9 - KITAB NU TUMPU ALLA LELE MA'IMAI'

Kapandean bapikin tiba kaponga'an

¹ Kapandean bapikin nompotinjomo laigan ka' mule' nompotinjomo popitu' na ohi'nyo.

² Ia nongkolotmo potuu'on mombaumo bau-bauon, nombaumo anggur ka' nomposadiamo anu okaan.

³ To pangga-panggalima boune sinainyomo namba da moloboo'akon kiijo' ikota' aha tu minjo itampat anu matangkas,

⁴ “Ihe na anu madi' ko anu nupisumbu-sumbu', ku poita da toka mae!” Ihe na anu madi' sinsumbu' na pikilan, kapandean bapikin nompoto'imo,

⁵ “Imbo' ka' okaan na kaanonku ka' o inum na anggur anu binaungkumo.

⁶ Tibahakonmo na kaponga'an da beleyum tumuu' bilahi. Otuluti na jalan nu mian anu pande.”

⁷ De mian anu madi' mongka'oho' opogulu' poto'i na kasala'annyo, hi ia, saidi' mae nukokojoimo na beleyum. Demian anu ma'idek na kinyonyoanyo nu tambuha'imo, beleyum nu tanggelemo.

⁸ Boli mongalu miana nu madi' mongka'oho' opogulu', saidi' mae nu ka'idekimo na beleyum. Panyo de mian anu pande na nu poto'i na kasala'annyo nu akuimo na beleyum.

⁹ Demian anu pande na nu pokinde'i, ia mompakamo pande. Ka' de mian anu tulu-tulutan hi Tumpu Allah na nu pogulu', ilimu'nyo mompaka pintuangmo.

¹⁰ Da timbali pande mian aijo' momonanyo tionyo ahi' moholomati ka' mabuhuk hi Tumpu. De beleyum monsumbu' Anu Susi' hondo saba'beleyum saidi mae mohumpakje pangalati'an.

¹¹ Kapandean bapikin na mombee'i beleyum mantan na umun.

¹² De kapandean bapikin daagimo hi beleyum saba' beleyum ahi' na untung. Panyo de kapandean bapikin madi' nu talima saba' posi beleyum ahi' na lugi'.

¹³ Kaponga'an sumomo boune anu manjoo' na potatae ka' anu madi' ko ilimu'nyo. Ka' mule' madi' ko ambangnyo.

¹⁴ Jojoongannyo itumban nu laigannyo kabai isabatan daka' nu kota'.

¹⁵ Ikiijo' ia motataemo hi mian anu motulu ikiijo'. Mian anu hodi' na kinyonyoanyo pagalamo nu sale'i.

¹⁶ “Sonso' pe'e mae hai belemiu anu ma'isa ko anu opisumbu-sumbu'!” Ka'mian anu madi' pande ia motatae,

¹⁷ “Uee anu otomang nyamitnyo matami' ka' mule' mongkaan o pohowini lebe ma'ima'.”

¹⁸ Aha anu tinimbalimo kaanonnyo madi' monsumbu' saba' mian anu nambamo mae hi ia nongkabotmo ajannyo silakamo ikiijo' ka' mule' aha anu ninsoopmo ilaigannyo, uuka aiya jojoongmo i uno nu dunia nu mian anu sinilakamo.