AMSAL 8 - KITAB NU TUMPU ALLA LELE MA'IMAI'

Potatae nu kapandean bapikin

¹ Kapandean bapkin nompoto'imo, kapandean bapikin notataemo.

² Ia tinuminjo aita i puge'nyo iwi-iwi' isohipi nu jalan ka' ipopanga'an nu jalan iwi-iwi'.

³ I sohipi' nu to saba-sabatan daka', ijalan minsoop ikota', ikiijo' na potataenyo ohongomo.

⁴ “O belemiu mian aku motatae hi belemiu; batu-batu mian anu idunia, opalahatikan na potataengku!

⁵ Belemiu ma'isa ko anu opisumbu-sumbu', balagulu' pe'e da kopikilan ahi' anu matajom, belemiu anu madi' sampa mangalati' balagulu' pe'e da timbali pande.

⁶ Palahatikan na potataengku iwi-iwi', kalana iwi-iwi' aijo' madi' sala' ka' mule' ko angga'nyo.

⁷ Anu ku taeakon iwi-iwi' to tu'u, kalana ku ka'ideki na baleko'.

⁸ Iwi-iwi' na potataengku madi' ko anu tageo', santa' pe'e madi' ko anu minggeo-geo' kabai sala'.

⁹ Kona hi mian anu pande potataengku to tu'u. Ka' mule' kona hi mian anu pande potataengku sosok hondo.

¹⁰ Ohalagai na pokinde'ku, nulingkudui na salaka anu madi' kogalo'nyo. Opentingkan na ilimu' nu lingkudui na mosoni' anu madi' kogalo'nyo.

¹¹ Akumo na kapandean bapikin, nu lingkudui na intan, madi' opoko ala opokakanakon mau pa'apaa na anu nu kahanda'i dao'ala.

¹² Akumo na kapandean bapikin; hi belengku timbali monsumbu' kapandean tiba ilimu'.

¹³ Mongadati Tumpu alati'nyo mongka'ideki palabuatan anu ma'idek. Aku madi' mongka'ima'i anu ko bubun ka' anu mosi akui butongnyo. Aku mongka'ideki kalakuan anu ma'idek ka' mule' potatae anu mongakali.

¹⁴ Akumo na anu nompotuka i uno nu kinyonyoa ka' mule' akumo na anu nomponyatamo. Aku pande ka' mule' mahoson.

¹⁵ To tomu-tomundo' ku tulungi na mompojalan palentah, anu ko kakuasa'an kutulungi na montinjohakon ka'adilan.

¹⁶ Kalana pakalaja'an anu binaungkumo, to mia-mian anu daka' na pangkatnyo, to mia-mian anu talasanggo mompalentah ka' mule' mompojalan ka'adilan.

¹⁷ Ku kalibosi na aha anu mongka'ima'i aku, ihe na molio aku timbali mongkabot aku.

¹⁸ Hi belengku sinadiamo na kakaya'an ka' suele kaholomatan ka' ka'ima'an nu kantumuu'an.

¹⁹ Anu nu humpak hi belengku molingkudui mosoni' anu madi' kogalo'nyo lebe ko angga'nyo molingkudui salaka anu madi' kogalo'nyo.

²⁰ Aku mombatuki jalan anu adin, aku malalangkas i jalan anu madi' tageo' na kinyonyoa.

²¹ Mian anu mongkalibosi mae aku, ku potimbali mian anu kaya, laigannyo ku pobuke'mo nu to bala-balang.

²² Aku pinotimbalimo nu Tumpu salaku anu imomona, akumo na hasin nu kalaja-Nyo anu momonanyo mae tempo'nyo naipuan mae.

²³ Aku tinali' salatanmo pe'e naipuan mae, i momonanyo ma'isa pe'e dunia aiya pinotimbali.

²⁴ Aku pinohampe ma'isa pe'e kino ndalangonnyo, ma'isa pe'e ilubat mae na mata nu uee.

²⁵ Aku pinohampe ma'isa pe'e kino to bungku-bungkutnyo pinahapotinjo, ma'isa pe'e to puge-puge'nyo pinokoko.

²⁶ Ma'isa pe'e Tumpu nompotimbali dunia ka' mule' to padang-padangnyo, ka' mule' ma'isa Ia nompotimbali kobakan nu tano' anu momona.

²⁷ Aku nonsakisimo salatan langit binokamo ka' aita langa pinobimo aita ibawo nu ambai.

²⁸ Salatan Tumpu nompo'una'mo kundom aita ilanga ka' nombuka'mo lananyo nu ndalangon iwi-iwi',

²⁹ salatan Ia nompalentahmo ambai da boli molanggai potempasannyo. Aku suele hingga-hinggat kiijo'mo mae. Salatan latas nu dunia pinolatas-Nyomo.

³⁰ Aku kiijo' isohipi'-Nyo salaku anak anu Nu kalibosi hondo. Sansina-sinaa aku saja' momposanang kinyonyoa-Nyo, saja' aku maha-mahaik i ahop-Nyo.

³¹ Aku balasana-sanang na jojoong i dunia-Nyo. Ka' hi aha manusia aku mongoa'i kasanangan.

³² Kalana aijo' potombihingakon mae na aku, o belemiu anu ma'isa langkai' ka' bengkele', Otuluti na anu ku poto'i da belemiu sanang na kantumuu'an.

³³ Otalima na pokinde' ka' jadimo pande, boli ola beleyum mompaha-pahaikakon pokinde'.

³⁴ Mohumpak kasaangan i uno nu kantumuu'an na mian anu mompotombihing mae aku, anu toka sansina-sinaa sumuhang montanda'i isabatan nu laiganku, ka' balajaga-jaga isabatan daka'nu laigan kajo-kajojoonganku.

³⁵ Ihe na montalima aku mohumpak kantumuu'an, ia nu situjui nu Tumpu.

³⁶ Ihe na madi' montalima aku, mosi polugi butongnyo, mian anu mongka'ideki aku, mongka'ima'imo kapatean.”