AMSAL 5 - KITAB NU TUMPU ALLA LELE MA'IMAI'

Mompo'ingat anu masala'

¹ O'anaku hongo pe'e mae na aku! Otoa mae na kapandeanku ka' pangalati'an anu ku ajanakon hi beleyum,

² da beleyum monsumbu' mosia na beleyum tionyo monsipatakon butongum ka' motatae susumo mian anu ko ilimu'.

³ Boune anu saja' monggoda potataenyo sumomo juu' nu uwani' anu talalo matami' ka' potataenyo sanang hondo na kinyonyoa mohongo,

⁴ panyo de bisuannyo iwi-iwi' moko lapasmo, saba anu daagi me ahi' kasusa'an ka' kasansala'an.

⁵ Beleyum i hela' nyomo i dunia nu mian anu silakamo; jalan anu tinuluannyo mompatui kapatean.

⁶ Ia madi' tataap montului jalan anu momboa kantumuu'an; madi' sinumbu'nyo ia noselemo madi'mo nontulu jalan aijo.

⁷ Kalana aitu, to ana-anak, potombihing na potataengku ka' boli okolilimi.

⁸ Paninjo'on i boune anu sumo aijo'! Ka' mule' boli mongohani laigannyo.

⁹ De beleyum mosangalu tiba boune aijo', beleyum madi'mo ko angga'nyo ka' napisu nu beleyum pakisamo nu bubut tempo'nyo beleyum daagi' olitau nu mian anu madi' monsumbu' mompaha kali-kalibosi.

¹⁰ Kakaya'a nu beleyum mingkot na nu kaan nu mian sangga'at, ka' hasin nu kalaja nu beleyum mianmo anu madi' nu sumbu' na tumpunyo.

¹¹ I mihinyo beleyum motusa'je, de beleyum nukonamo nu panyakit.

¹² Lantas beleyum motataemo, “Yo, kadaka' aku nongka'idekimo pokinde'? Kadaka' aku madi' nongka'oho' otewa'?

¹³ Aku madi' nongka'oho' nohongo to gulu-gulu'ku ka' madi' nongka'oho' nombatuki aha.

¹⁴ Madi' ingepe mata nu mian da'isan na'idekmo na nontoa mae aku.”

¹⁵ Kalana aitu kanonongi na posi bengkele'um ka' bee' na liibosum ola hi ia.

¹⁶ Madi' ko gunanyo hi beleyum na molio kasanangan anu misa' bengkele' nu beleyum.

¹⁷ Kasanangan aijo' ola posi beleyum ka' bengkele' nu beleyum, misa mian sangga'at.

¹⁸ Kalana aijo', tionyo ahi' beleyum mongoa'i sanang hi posi bengkele' nu beleyum; olio na kasanangan hi anak langkoyang anu i nika'anumo nu beleyum,

¹⁹ anu talalo langkoyang ka' mahalumpatan susumo kijang. Handanyo nu butongnyo saja' monggoda kinyonyoa nu beleyum da saja' beleyum mongka'oho' moduhus tiba ia sahingga beleyum ma'osa mombau da beleyum timbali sumo anu malangu.

²⁰ Apaa na gunanyo na ko napisu hi boune sangga'at, o anak ku? Bau apaa na monsampo duhus boune anu nakan,

²¹ Tumpu montoa apa-apaa na anu binau mo nu manusia. Maumo mamba moya na manusia, Tumpu mompopiakon.

²² Dosa' nu mian ma'idek susumo totumban anu nongkonamo posi mian aijo'.

²³ Ia sinilaka kalana madi' nombatuki pokinde'. Kaponga'annyo nombau ia da i hansun.