AMSAL 3 - KITAB NU TUMPU ALLA LELE MA'IMAI'

Pokinde' kona hi to oli-olitau ka' hi to lalangkoyang

¹ Boli okolilimi na anu ingajankumo hi belemiu, o anakku. Saja' o'inau' na anu pinalentahkonkumo,

² da mantan na umun nu belemiu ka' mohumpak kantumuu'an ma'ima' na belemiu.

³ Tionyo ahi' belemiu saja' palesaya ka' tulu-tulutan hi Tumpu Allah ka' hi bubu' belemiu. O'inau' na aijo' ka' o una' i kinyonyoa nu belemiu,

⁴ da belemiu nuka'ima'i ka' nu angga'i nu Tumpu Allah ka' mule' manusia.

⁵ Opalesaya na Tumpu nu kinyonyoa totu-totu'u ka' boli montaha'imani posi pangalati'an nu belemiu.

⁶ O'inau' na Tumpu i sinin na han apaa na kahanda' nu bau, sahingga Nu potiju'je hi belemiu mosia na kantumuu'an anu talakana'.

⁷ Boli monsangka' butong nu belemiu lebe pande molingkuduimo anu memang ahi' sahondo-hondonyo; otuluti na Tumpu ka' opimpali' na anu ma'idek.

⁸ Palabuatan nu belemiu atina' timbalimo susumo pakuli' hi belemiu anu mompa'alinmo butong nu belemiu ka' momposanangmo kinyonyoa nu belemiu.

⁹ O adati na Tumpu nu anu osombahkon hi Ia, anu talalo hondo ma'ima' na halata' ka' isi nu ale' nu beleyum,

¹⁰ sahingga iwi-iwi' na alang nu belemiu mobuke'mo nu gandum ka' anggur nu belemiu manjoo'mo hondo sahingga madi'mo ko tampat pongisian.

¹¹ De Tumpu mondoke belemiu, o anakku, otalima na aijo' salaku sa'angu' na pokinde', ka' boli belemiu mompele-pele' i ajalan-Nyo aijo'.

¹² Tumpu mondoke mian anu Nu kanonongi, susumo tuuma mondoke anak anu nu kalibosi.

¹³ Mohumpak dale' na mian anu pinandemo ka' timbalimo moko ala mongalati'.

¹⁴ Ka'untungannyo lebe daka' molingkudui salaka anu i humpaknyomo ka' lebe ko angga'nyo molingkudui mosoni'.

¹⁵ Kapandean bapikin lebe ko angga'nyo molingkudui batu mainan; iwi-iwi' na anu nu kahanda'i madi' ko anu mongkakanai.

¹⁶ Kapandean bapikin mompomantan umun nu belemiu, kakaya'an, ka' da o'adati nu mian.

¹⁷ Kapandean bapikin momposanang kantumuu'an nu belemiu ka' ka'ima'an nu kantumuu'an.

¹⁸ Mian anu mintoong dodo-dodo i kapandean bapikin saidi' mae mongoa'ije kantumuu'an anu sahondo-hondonyo ka' ma'ima'.

¹⁹ Kalana kapandean, bapikin sahingga Tumpu nompotimbalimo tano'; kalana pikilan-Nyo anu ma'ima' Ia nompobimo langit aita' i tampat-Nyo.

²⁰ Kalana ilimu'-Nyo Ia nompotimbalimo iwi-iwi' na mata nu uee i aluk nu tano' nobiha'mo ka' no ilimo na ueenyo ka' kundom aita' i langit nombubusakonmo mae uee aiya i tano'.

²¹ Kalana aijo', otoongi na kapandean bapikin anu madi'mo sala' na mompopikilakon, o anakku! Boli hondo-hondo olapasakon,

²² sahingga kantumuu'an saja' sabole-bole bau bahagian nu beleyum – ma'ima' ka' sanang na mongoa'i.

²³ Beleyum mamba pa' moya madi' ko anu mopoposia ka' madi' tosumpun.

²⁴ Belemiu mamba pa' hoyot madi' ko anu okabuhuk ka' belemiu hoyot sampahu na bobogon.

²⁵ Bolimo belemiu mongkabuhuk balaa' anu saintolo-tolo montokaimo mae susumo tombusisi', ka' nontuda'mo to mia-mian anu ma'idek na kinyonyoanyo.

²⁶ Tumpu na monjagai belemiu. Madi' Nu pojohok na belemiu nukona nu so'o.

²⁷ De beleyum moko ala mombau han anu ma'ima' hi mian anu mompalalui palabuatan anu ma'ima' hi belemiu boli motunde na mombau han aijo'.

²⁸ Boli mompoto'i hi bubu' belemiu montanda'i sampe dodop de memang uuka aiya belemiu moko alamo montulungi ia.

²⁹ Bo li mombau tanga'an apa-apaa anu mompolugi' belemiu, anu jojoong mompaha ohani belemiu ka'anu madi' mombata-batai belemiu.

³⁰ Boli lewa' painggaga de madi' ko anu monsabapi tiba samian anu madi' toho' nombau anu ma'idek hi belemiu.

³¹ Boli ma'idekan na kinyonyoa hi miana nu talalo mompakisa mian, ka' boli montiho kalakuan nu aha.

³² Kalana Tumpu mongka'ideki mian anu mombau anu ma'idek, panyo mompahakona hondo tiba mian anu hodi' na kalakuannyo.

³³ Tumpu montuda'i balaa' laigan nu mian anu ma'idek na kinyonyoanyo, panyo mombalakati laigan nu mian anu tulu-tulutan hi Ia.

³⁴ Tumpu mongka'ideki mian anu buulon, panyo mombalakati mian anu madi' buulon.

³⁵ Mian anu pande mompaka talasanggomo na sanggonyo, panyo mian anu ponga' saja'mo o alu.