AMSAL 26 - KITAB NU TUMPU ALLA LELE MA'IMAI'

¹ Susumo ujan i tempo' nu posinaa, ka' eis i tempo' nu masingit, sumo aitu mule' mompuji' mian anu ponga' madi' pantas.

² Susumo tomonsi' lumahap, ka' ko laha-lahap aita ilanga sumo aitu mule' pongkutuki madi' nu kona na mian anu madi' ko sala'nyo.

³ Keledai tionyo ahi' opokonai tambangnyo, ajahan tionyo ahi' opohos, sumo aitu mule' na mian anu ponga' tionyo ahi' odoke.

⁴ Mian anu montaami pompokilawa nu mian anu ponga', koponga'annyo pokakana mo sumo mian aijo'.

⁵ Anu opokilawa nu ponga' tionyo ahi otaami nu pontaami anu ponga', da nusumbu' nu anu nompokilawa taalu' ia madi' ahi' pande susumo anu nu sangka.

⁶ Monsai samian na anu ponga' da pompakatuan lele, pokakanamo sumo mosi pato'i tengke ka' molio silaka.

⁷ Sumomo mian anu kapi' molajangakon tengkenyo, sumo aijo'mo na mian anu ponga' montaeakon pokinde'.

⁸ Mompuji' mian anu madi' ko anu nu pisumbu-sumbu', sumomo monsegot batu dodo-dodo i sambatu katapel.

⁹ Susumo anu lewa' malangu mongalinakon hii' i limanyo, sumo aijomo na mian anu ponga' montaeakon pokinde'.

¹⁰ Ihe na mompokalaja mian anu ponga' kabai tulu-tulumo mian ola mompolugi' mian da'isan.

¹¹ Susumo dedeng po' ule' mompinsusule'i anu i lua'nyomo sumo aitu mule' na mian anu ponga' po'ule' mule' mongulit kaponga'annyo.

¹² Mian anu ponga' hondo daagi' lebe ma'ima' nulingkudui na mian anu monsangka butongnyo pande.

¹³ Anu moluluk mongka'ima'i ola jojoong i laigan; ia notatae “Daagi' ko singa i sambiha', dumo saidi' mae aku nu sa'u i tonga' nu jalan.”

¹⁴ Susumo tumban lewa' tontoyong i hensennyo, sumo aijo'mo na anu moluluk mombali-balikakon butongnyo i kamale'annyo.

¹⁵ Daagi ko mian anu talalo hondo moluluk; mompopakan kaanon inganga'nyo madi' mongka'oho'.

¹⁶ Anu moluluk monsangka butongnyo lebe ko kapandean bapikin; nu lingkudui na aha popitu' na mian anu montaami sahondo-hondonyo.

¹⁷ Mian anu maninggalo' ipainggagan anu misa' ulusannyo; sumomo mian anu mohakop dedeng maela ibihingnyo.

^18-19 Mian anu mongakali lantas motatae; “Aku ola ahi' basedu'” pokakanamo sumo mian anu ulawon mahaik nu toongon anu monsilakai.

²⁰ De kau' mingkotmo, matemo na apu; de madi'mo ko anu lewa-lewa' monsisik lahasia, madi'mo suele daagi ko painggagan.

²¹ Sumomo buhing tiba kau' mombau apu tataap moak; sumo aitumo na mian anu mongka'ima'i painggagan momposida ka'ada'an.

²² Pitana' aijo' o'oa'i matami' hondo; mian mongka'oho' mongegat ia.

²³ Sumomo kuhon tano' osopu' nu salaka; sumo atina'mo na mian anu ola matami' ipotatae, panyo kinyonyoa ma'idek.

²⁴ Anu saja' mongka'ima'i mongka'ideki mian potataenyo matami' panyo kinyonyoanyo saja' mongakali.

²⁵ Mau mule' ia motatae ma'ima' boli mompalesaya; kalana han mongka'ideki nongkuasaimo kinyonyoanyo.

²⁶ Mau mule' nu posuluk na han ia mongka'ideki; iwi-iwi' na mian saidi' mae montoamo kalakuannyo anu ma'i-ma'idek.

²⁷ Ihe na mongkeke bolo' da bau panabu'an nu mian sangga'at aijo' baumo panabu'annyo. Ihe na molingginakon batu da nu kona na mian sangga'at, posi ia na nu tuda' nu batu aijo'.

²⁸ Mombaleko'i mian sumomo mongka'ideki ia. Potatae anu matami' monsaduakon kasilaka'an.