AMSAL 25 - KITAB NU TUMPU ALLA LELE MA'IMAI'

To pia-piangkuka na pokinde' sangga'at anu lengkat i Salomo

¹ Ka'aiya mule' to pia-piangkuka na pokinde' sangga'at lengkat hi Salomo anu poule tinulis nut o paga-pagawe ilaigan nu tomundo' Hizkia aijo'mo tomundo' Yehuda.

² Tumpu Allah opopodaka' kalana apaa na anu i lahasiakon-Nyomo tomundo oholomati kalana apaa na anu tinaeakonnyomo.

³ Susumo ndalangon anu maleeng ka' mule' langit, anu matangkas, sumo aijo'mo na pikilan nu tomundo madi' opoko ala o sumbu'.

⁴ Pobelesi pe'e na abu'nyo nu salaka, atina'je ka' ma'ima' na nu bau nu topo tutuk mosoni'.

⁵ Alini na anu lewa' mompokinde'i ma'idek atina' i laigan nu Tomundo, atina'je ka' kapamalentahan mahoson kalana ka'adilan.

⁶ De mangadap hi tomundo tionyo ahi boli kobubuun, boli mimbabalu-balu' mian anu ko pangkat matangkas.

⁷ Lebe ma'ima' opoita moliba i tampat anu ko angga'nyo ka'de mule' opokau mombee'i tampatum hi mian anu matangkas na pangkatnyo.

⁸ Boli kosia-sia' na momboa palakala i mian kopian; kalana, de imihinyo mae beleyum memang sala' apaa mule' na daagi nu bau?

⁹ Sala paham tiba sangalu nu beleyum, posi atunmo ima-ima' tiba ia, panyo lahasia nu mian sangga'at boli nu sisik.

¹⁰ Kalana, dumo beleyum saidi'mae osanggohimo, mian anu lewa' momboa sisik anu madi opalesaya, ka' sanggo nu beleyum madi' mo ma'ima' sidu-sidutu.

¹¹ Pikilan anu olubatakon ka' madi' sala' ka' kakonannyomo ahi' sumomo sambatu na mosoni' anu i uno nu lean salaka.

¹² Pokinde' nu mian pande hi mian anu ka'oho' mohongo, sumomo sinsing mosoni kabai lawe-lawenyo mosoni'.

¹³ Mian anu opokau tulu-tulutan momposanang kinyonyoa nu mian anu nompokau, sumomo uee anu molino na nu inum nu mian anu mompadak i ale.

¹⁴ Sinin na janji' anu madi' ko bukuti'nyo sumomo kundom ka' mombun anu madi' montudunakon ujan.

¹⁵ Kasabaanan o hinggati ahi' nu potatae anu madi' ko sega-sega timbali nu palesaya nu mian anu balakuasa ka' mohansuni iwi-iwi' na anu mongewa.

¹⁶ Boli monginum juu' manjo-njoo'; dumo beleyum monguwahi.

¹⁷ Bolimo saja' mamba i laingan anu mompaha ohani laigan nu beleyum dumo ia ma'osamo, sahingga nuka'idekimo na beleyum.

¹⁸ Monsangka anu madi' totu'u timbali monsilakai, sumomo bajak, malatelu, kabai pana' anu matajom.

¹⁹ Mompalesaya mian anu uesan i tempo' nu kasusa'an sumomo monyaing nu bese' anu ginanggohanmo ka' lumajang nu tengke anu pinengko'mo.

²⁰ Monyanyiakon nyanyian anu tulu-tulumo hi sumomo molanggo'imo ia i tempo' nu bakin sumomo mondudu'akon losing i belanyo.

²¹ De sampo bali' nu beleyum mo'ohop, bee'i na ia mongkaan; ka' de ia megot, bee'i na ia uee anu o'inum.

²² Tiba jalan anu sumo aijo', beleyum mombaumo la da ma'ambang ka' Tumpu mombalakatimo beleyum.

²³ Mombun nu utara tantumo mompotoka mae ujan; sumo aitu mule' na lewa' monsisik anu ma'idek hisangalunyo monsaduakon da motambuha'.

²⁴ Jojoong i susunyo nu loteng, lebe sanang nu lingkudui na jojoong salaigan tiba bengkele' anu mongka'ima'i saja' painggaga.

²⁵ Montalima lele anu ma'ima' lengkat mae i lipu'anu majo'on sumomo monginum uee' anu molino de megotmo.

²⁶ Mian anu manonong anu ta aluk mo hi mian anu palaganta sumomo mata nu uee anu mohibu kabai bubung anu nahumimi'mo.

²⁷ Madi' ma'ima' na monginum juu' talalo mo manjoo' sumo aitu mule' madi' ma'ima' de manjoo' na montaeakon mompuji-puji'.

²⁸ Mian anu madi' moko ala monjagai butongnyo sumomo sa'angu' na kota i hansunmo na palatahanannyo.