AMSAL 24 - KITAB NU TUMPU ALLA LELE MA'IMAI'

– 19 –

¹ Boli mongka'ideki mian anu ma'idek na kinyonyoanyo ka' boli mongka'ima'i mosangalu tiba aha.

² Aha ola mompopikilakon kabuhingison ka' ola mombisalakon apaa na anu monsilakai.

– 20 –

³ Auan aijo' daagi kalana ko kapandean bapikin ka' pangalati'an.

⁴ Ka' de bisuannyo daagi' ko ilimu', saba' to sali-salipi'nyo nu isije nu to paka-pakakas anu ko angga'nyo ka' to ima-ima'.

– 21 –

⁵ Mian anu pande lebe balakuasa molingkudui mian anu mahoson; ilimu' lebe palalu molingkudui hoson nu butong.

⁶ Kalana ma'ise pe'e mahampate tionyo ahi' ko tanga'anmo momona, anu matantu, ka' lebe manjoo' na anu mompokinde'i, lebe daka' mule' na halapan ka'untungan de mahampate anu o'ima-imani.

– 22 –

⁷ Mian anu ponga' madi' moko ala monsumbu' kapandean bapikin. Ia madi' moko ala montaeakon apa-apaa de mian hau-haunyo mombisalakon hahan anu penting.

– 23 –

⁸ Mian anu saja' montanga'i palabuatan ma'idek, osanggohi mian anu saja mompokalangkabut.

⁹ Batu-batu tanga'an nu mian anu ponga' aijo' dosa'. Mian anu saja' mongalu mian sangga'at, madi'nu ka'ima'i nu mian maumo pa' ihe.

– 24 –

¹⁰ De beleyum madi' sabaan i uno nu ka'ada'an anu susa'mo hondo saba' beleyum mian anu madi' moko ala mombau apa-apaa.

– 25 –

¹¹ Boli bata-bata na mompobebas mian anu binee'anmo hukuman anu osilakaimo; posalamatmo na mian anu hau-haunyo o hela' mokiijo' i tampat pompokalayo'an.

¹² Timbali na beleyum motatae, “Atina' misa' ulusanku.” Panyo Tumpu Allah mompalahatikan beleyum. Ia na monsumbu' ka' momputusi pikilan nu beleyum. Ia mombalosakon manusia sitimbang palabuatannyo.

– 26 –

¹³ O anaku kaanmo na potik nu uani' kalana aijo' ma'ima'. Susumo ju' ingla ipotik nu uani' matami' na okaan,

¹⁴ sumo aijo'mo na kapanden bapikin ma'ima' na nu oa'i nu santuu' nu beleyum. De beleyum pande kantumuu'an nu beleyum timbali ma'ima' aiya mae i ahop.

– 27 –

¹⁵ Boli sumo mian anu ma'idek na kinyonyoanyo anu mosa'angu' mombulingi mian anu madi' tageo' na kinyonyoanyo ka' mongagoi laigannyo.

¹⁶ Kalana, maumo pe'e mian anu madi tageo' na kinyonyoanyo saja' manabu', panyo saja' ia po'ule' mobula. Panyo mule', mian anu ma'idek na kinyonyoanyo timbali hansun totu-totu'u nu balaa' anu montokai ia.

– 28 –

¹⁷ Boli sanang de sampo bali' nu beleyum silaka, ka' boli bilahi de ia manabu'.

¹⁸ Kalana, Tumpu montoa mae kolalajang nu beleyum aijo, ka' Nu toa ma'idek, lantas madi' daagi' mohukum sampo bali' nu beleyum aijo'.

– 29 –

¹⁹ Boli mongka'ideki kabai madi' sanang hi mian anu ma'idek na kinyonyoanyo.

²⁰ Mian anu ma'idek na kinyonyoanyo madi' ko anu otaha'imani na kantumuu'annyo aiya mae imihi.

– 30 –

²¹ O anaku, okabuhuk na Tumpu ka' oholomati na tomundo. Boli mobobatukan tiba mian anu madi' situju hi aha.

²² Mian anu sumo aijo' ola sangkinihap timbali mohopu', kalana balaa' anu nupotoka nu Tumpu Allah kabai tomundo misa' han anu ola dengke-dengke.

To pia-piangkuka mule' na pokinde'

²³ To mia-mian anu pande hondo toho' notatae sumo uuka: Mian kopian madi' timbali maboat i sambiha'.

²⁴ De mian anu ko kasala'annyo nu poto'i madi' ko sala'nyo, saba' mian kopian aijo' mohumpak kutuk ka' nu tundai nu mian iwi-iwi'.

²⁵ Panyo de mian kopian aijo' mohukum mian anu ko sala'nyo saba' ia mohumpak kantumuu'an ma'ima' ka' oholomati.

²⁶ Pontaami anu totu'u aitumo na tanda posangaluan anu totu-totu'u ma'ima' hondo.

²⁷ Boli pe'e beleyum mo'osoa de ma'isa pe'e beleyum momposadia ale'nu beleyum ka' ko polioanmo.

²⁸ Boli timbali sakisi hi mian sangga'at de madi' ko anu osumbu sumbu' na han nu palakala aijo, bolimo mule' mombaleko'i ia.

²⁹ Boli motatae, “Aku tionyo mombalosakon ia apaa na anu binaunyomo hi belengku!”

³⁰ Aku toho' notulu i ale' ka' ale' nu anggur nu samian anu moluluk ka' mule' ponga'.

³¹ Anu tinoangku i kiijo' ola ahi' sosu'anon anu ko hii'nyo ka' padang.

³² Salatan pinalahatikankumo ka' lewa' tinutuganku na han aijo', i humpaku mo na pangajalan sumo uuka.

³³ Tiba tatundu' ka' hoyot sasiangoni', ka' sumuhang nonsolung limaka' nilawe saasaingoni',

³⁴ kakulangan ka' kasiasi toka mae montumbuhi sumomo tololang anu ko toongon mae bau pompatei.