AMSAL 23 - KITAB NU TUMPU ALLA LELE MA'IMAI'

– 6 –

¹ De beleyum sumuhang mongkaan tiba samian anu matangkas na pangkatnyo, tionyo nu ingat ihe na ia.

² De beleyum talalomo majota na mongkaan manjoo', pagala ahi' o'intim na jota nu beleyum anu tala-talamo aijo'.

³ Boli majoko' na mongkaan kaanon anu ma'ima' anu pinosadiamo, bingko' ola bau ponguji'nyo beleyum.

– 7 –

⁴ Boli talalo basusa-susa' kahanda da timbali kaya. Bolimo ototu'ui na niat nu beleyum aijo'.

⁵ Kalana, ola sangkinihap halata' nu beleyum aijo' lanyapmo sumomo ia anu ko polipiknyo ka' lumahap mokiita' i langa susumo bonyia'.

– 8 –

⁶ Boli mongkaan hingga-hinggat tiba mian anu matongot. Boli mule' mongkamilui kaanonyo anu toto ima-ima'.

⁷ Kalana, ia saidi mae motatae, “Imbo' da mongkaan; mompaka tuangi pe'e,” padahan makisudnyo misa' sumo aijo'. Ia ola motatae ma'ima', panyo kinyonyoanyo sangalasan.

⁸ Dumo apa na anu i lonyomo nu beleyum po'ule' nu lua'akon, ka' iwi-iwi' na potatae nu beleyum anu ma'ima' hi ia madi' ko gunanyo.

– 9 –

⁹ Bolimo mompokinde'i mian anu ponga'; ia madi' mongangga'i pokinde' nu beleyum aijo'.

– 10 –

¹⁰ Boli hondo-hondo molalin tempas nu tano', nu pusaka' kabai tano' nu anu unon madi'mo ko tuuma ka'tinanyo.

¹¹ Kalana Tumpu atina'mo na montinjohi iamo na anu montinjohi aha mongewa beleyum.

– 11 –

¹² Palahatikanmo na pangajalan nu gulu' nu beleyum ka' ogulu'i jonjoo.

– 12 –

¹³ Boli hente na mongajan anak nu beleyum. De beleyum mondoke ia nu ue', ia madi mule' silaka,

¹⁴ ola'o ia salamat.

– 13 –

¹⁵ O'anaku, aku sanang hondo de beleyum pande.

¹⁶ Aku sanang hondo de mohongo beleyum montaeakon potatae nu sahondo-hondonyo.

– 14 –

¹⁷ Boli mongka'ideki mian anu baladosa'. Saja' o tuluti na Tumpu Allah,

¹⁸ da kantumuu'an nu beleyum anu aiya mae i ahop timbali ma'ima ka' anu nu taha'imani madi' mokangkan.

– 15 –

¹⁹ Potombihing anaku! Tembali ahi pande. Palahatikan ahi' totu-totu'u na kantumuu'an nu beleyum.

²⁰ Boli mosangalu tiba mian anu saja malangu kabai mian anu mabebes,

²¹ kalana aha saidi mae timbali kasiasi. De beleyum ola hoyot, saba' madi'mo pin beleyum mompusokmo hude anu mobea-beakmo.

– 16 –

²² O tuluti na tuuma nu beleyum, kalana de madi' ko ianyo madi' kino beleyum. De tina nu beleyum bengkele'mo opotoa ahi' na beleyum mongadati ia.

²³ Pangajalan anu totu'u, kapandean bapikin, pokinde ka' pangalati'an – iwi-iwi' aijo' tionyo ahi' o'oli, panyo lebe ma'ima'i boli opobaluk.

²⁴ Samian na tuuma lame'mo de anaknyo ko kalakuan ahi' anu ma'ima'; ia sanang hondo de anaknyo pande.

²⁵ O'amalakon da tuuma tiba tina nu beleyum sanang na montoa beleyum; o'amalakon da mohumpak kantumuu'an ma'ima' na boune anu nohampeakon beleyum.

– 17 –

²⁶ Palahatikan ima-ima', ka' bau sonto'na kantumuu'anku, o'anaku!

²⁷ Boune anu lewa' masala' aijo'mo na so'o anu monsilakai.

²⁸ Aha labot mohakop susumo tololang, ka' monsaduakon manjoo' na to momo'ane anu lewa'mo nasala'.

– 18 –

^29-30 Nusumbu' nu beleyum pa'apaa na anu jinadimo hi mian anu nonginumo anggur anu talalomo nanjoo ka' saja'mo nonginum anu moko palangu? Mian aijo' sansala ka' mongoa'i sakisa. Ia saja' mahanggaga ka' motusa'. Matanyo momea ka' butongnyo kahomo bela, padahan iwi-iwi' aijo' timbali nupoko ala nu pimpali.

³¹ Bolimo mompojohok anggur monggoda beleyum, maumo otoa talalo ma'ima' ka' jongkilaban i uno nu galas moili minsoop ma'ima' hondo' i unonu gogohong.

³² Dodop subu-subu nu oa'i nu beleyum sumomo nu sa'u nu ulo anu ko bisa'nyo.

³³ Mata nu beleyum mimbolialatmo, pikilan nu beleyum madi'mo tantu ka' nganga' mahataean mo.

³⁴ Beleyum mongoa'i sumomo i tuu' nu pelelan nu kapan i tonga' nu ndalangon; ubak nu beleyum moliolong mo ka' beleyum maha sungonanmo.

³⁵ Lantas beleyum motatae mo, “Ugaat aku jinagun ka'i hapa' nu mian, panyo madi'mo sinumbu-sumbu'ku pa'apaa na anu jinadimo. Ibeh, aku natatundu' mo hondo! Aku daagi' palalu po'ule' monginum!”