AMSAL 19 - KITAB NU TUMPU ALLA LELE MA'IMAI'

¹ Lebe ma'ima' mian kasiasi anu madi' tageo na kantumuu'annyo ka' de mule' ola mian ponga' anu mongka'ima'i baleko'.

² Anu makeke de madi' ko ilimu', madi' ma'ima'; mian anu ko sia-sia saidi mae monsaduakon kasala'an.

³ Manusia mompolugi' posi butongnyo nu kaponga'annyo lapas mae mompisala'imo Tumpu i han anu jinadimo aijo'.

⁴ Mian anu kaya, sangalunyo saja' mintuang; mian anu kasiasi na ola mule' ahi' nupala'i nu sangalunyo.

⁵ Mian anu baleko' kiijo' i pomputusian palakala, madi' ko madi'nyo tionyo ahi' o hukumo.

⁶ Toto samian bala'usaha mongala kinyonyoa nu mian anu balakuasa, iwi-iwi' na mian mongka'oho' mobela' tiba mian anu saja' mombee'i bantuan nudoi.

⁷ Mian anu kasiasi nu tee nu utusnyo, apaa mule' sangalunyo. Maumo pa' mosia na ia bala usaha ia madi' moko ala monggoda aha.

⁸ Ihe na mompagala molio ilimuu', mongkalibosi butongnyo; ka' ihe na saja' monginau' apaa na anu ginulu'annyomo saidi mae mohumpak kabilahian i uno nu kantumuu'annyo.

⁹ Mian anu baleko' kiijo' i pomputusian palakala ia tionyo o hukum ka' opateimo.

¹⁰ Pa' madi' pantas na mian ponga' tumuu', molabi ka' mule' madi' pantas na posaihon mompalentah anu balakuasa.

¹¹ Mian anu pande timbali moko ala montahan tambuha'nyo, ia talapuji' kalana madi' mompajuli kasala'an nu mian anu mombaumo kasala'an hia.

¹² Tambuha' nu tomundo sumomo polohu' nu singa; kanonongan nu tomundo sumomo dondu'ok mohumpisi sinin na anu tumuu'.

¹³ Anak anu ponga' timbali monsilakai tuumanyo, Bengkele' anu saja' bapisala' sumomo uee anu jumuju toto sangjoliji panyo madi kokabelentiannyo.

¹⁴ Laigan ka' halata' timbali ohumpak hi tu'anyonyo, panyo bengkele' anu pande aijo' balakat anu lengkat mae hi Tumpu.

¹⁵ Ola saja' moluluk monsaduakon da mian hoyot bobogon, ka' ahennyo mae anu moluluk mo'ohopmo.

¹⁶ Mian anu montuluti sinin na palentah nu Tumpu Allah saidi mae salamat mian anu madi' mohalaga'i aijo tionyo ahi silaka.

¹⁷ Montulungi mian anu kasiasi pokakanamo sumo monsaboli Tumpu; Tumpuje suele na mombalosakon.

¹⁸ Atun ima-ima' na anak nu beleyum kalana daagi kotempo mongima-imani apa-apaa, de madi', alati'nyo beleyum mongka'ima'imo da ia silakamo.

¹⁹ Pojohokmo na mian anu sampa pusa posi iaje na mongoa'i ka'ahenannyo. De beleyum montulungi ia, beleyum ola labe montuangi tambuha'nyo.

²⁰ De beleyum mongka'oho' balagulu' saidi mae' ka' mohongo pokinde' beleyum timbali mo mian anu kokapandean bapikin.

²¹ Manusia talalo hondo manjoo' na tanga'an, panyo ola ahi' kaputusan nu Tumpu na jadi obau.

²² Kalakuan anu otaha'imani hi toto samian aijo'mo anu tulu-tulutan, lebe ma'ima' kasiasi ka' de ola mule' timbali mian baleko'.

²³ Oholomati na Tumpu, da kantumuu'an nu beleyum mohumpak kabilahian beleyum timbali ma'osa ka' madi' ko balaa' montokai mae.

²⁴ Daagi' ko mian moluluk anu taha-tahahumo hondo; mompopakan kaanon i nganga'nyo ia madi' mongka'oho'.

²⁵ De mian anu takabun o hukum, mian anu madi' ko ilimu' mohumpak pangajalan. De mian anu manonong otewa' mompaka pintuang na kapandeannyo.

²⁶ Anak anu mongkabisa'i ka' molaa' tu'anyonyo, atina'mo na anak anu mongambangi ka' madi' ma'ima'.

²⁷ Anaku, de beleyum madi'mo mongka'oho' daagi' balagulu' nu kolilimimo nu beleyum apaa na anu ginulu'anmo nu beleyum.

²⁸ Mombee'i katalangan anu madi' totu'u alati'nyo madi' montee atulan, monsilakai mian; ma'ima' na nu oa'i nu mian anu ma'idek na kinyonyoanyo.

²⁹ Mian ponga' anu takabun tantu odoke.