AMSAL 17 - KITAB NU TUMPU ALLA LELE MA'IMAI'

¹ Lebe ma'ima' ola sampunju' na anu okaan asan madi' mahantuda'; ka' de mule' kaanon manjoo'anu toto tami-tami' panyo mahantuda'.

² Posaihon anu pande saidi' mae mongkuasai anak anu mongambangi; ka' saidi' mae montalima pusaka' anu obagi tiba to utu-utus nu anak aijo'.

³ Mosoni' tiba salaka o uji' iponsuangan; panyo kinyonyoa nu mian nu uji' nu Tumpu.

⁴ Mian anu ma'idek na kinyonyoanyo montuluti tanga'an anu ma'idek; panyo anu baleko' mongka'ima'i mohongo potatae anu mompitana'i.

⁵ Ihe an mongkokojoi mian anu talalo kasiasi; mongalu Tumpu anu nompotimbali ia. Ihe na ola bilahi montoa kasusa'an nu mian, tionyo mohumpak hukuman.

⁶ Bau kasanangan nu anu langkai'mo ka' bengkele'mo aijo'mo to maku-makumpunyo; ka' bau kasanangan nu to ana-anak aijo'mo tinanyo ka' tuumanyo.

⁷ Mian anu oholomati madi' pantas montaeakon potatae anu baleko'; ka' mian anu ponga' madi' pantas na montaeakon potatae anu ko angga'nyo.

⁸ Daagi ko anu monsangka doi ponsogo' timbali mombau anu okabangangi; tiba doi ponsogo iwi-iwi' timbali jadi na kalaja.

⁹ De mongkahanda'i da nu ka'ima'i nu mian; o ampuni na kasala'an anu binaumo nu aha. Molubat-lubatakon kasala'an la da mombotu'i posangaluan.

¹⁰ Minsan na mompokinde'i ko alati'nyo hondo hi mian anu manonong; ka' de ola mule' pinsa'atu na pompohos hi mian anu ponga'.

¹¹ Mian anu ma'idek na kinyonyoanyo saja' mombau anu ma'idek; panyo kasilaka'an toka hi ia sumomo anu sinai mae buhingison hondo.

¹² Lebe ma'ima' singkabot tiba tina nu beruang anu nolapusmo na anaknyo; ka' de mule' tiba mian anu ponga' anu saja' tasiaga ikaponga'annyo.

¹³ Ihe na mombalosi ka'ima'an nu palabuatan anu ma'idek; ka'idekan suele madi' opoko ala osabatakon lengkat ilaigannyo.

¹⁴ Montampu'uni painggagan sumomo mombuka jalan nu uee; kalana aijo' ma'isa pe'e painggaga pinsusule'mo.

¹⁵ Tumpu mongka'ideki mian anu mompototu'u mian anu palaganta; ka' mompisala'i mian anu madi' kosala'nyo.

¹⁶ Palasuma na mian anu ponga' mompomingkot doi da molio kapandean bapikin; kalana ia madi' ko pikilan anu ma'ima'.

¹⁷ Samian na bela' saja' montuluti sangalunyo; panyo samian na utus bubu' montanggung kasusa'an.

¹⁸ Mian anu binajanji'mo da montanggungi samaya' nu sangalunyo aijo'mo na mian anu punga';

¹⁹ Mian anu mangka'ima'i dosa'; saja' mongka'ima'i painggaga. Mian anu palamuak molio kahansunan;

²⁰ Samian anu mongakali madi' mohumpak kabilahian; ka' samian na anu mopanga-panga' na motatae; saidi' mae mohumpak balaa'.

²¹ Mohumpak anak anu ponga' alati'nyo mohumpak kasusa'an nu kinyonyoa; timbali tuuma nu anak anu ponga' madi' ko kalame'an nu kinyonyoa.

²² Kinyonyoa anu lame' momposehat butong; panyo kinyonyoa anu susa' monsaduakon da madi'mo kogia' mombau apa-apaa.

²³ Mian kopian anu tageo' nakinyonyoanyo montalima doi bau ponsogo' anu opohowini; ka'madi' mompojalan ka'adilan.

²⁴ Patuju nu mian anu mangalati' aijo'mo da mohumpak kapandean bapikin; panyo patuju nu mian anu ponga' madi' matantu.

²⁵ Anak anu ponga' momposusa' tuumanyo; ka' mule' momposusa' kinyonyoa nu tinanyo.

²⁶ Madi' pantas opokonai denda, na mian anu madi' kosala'nyo; madi' pantas talalo buhingison hi mian anu manonong.

²⁷ Mian anu matajom na pikilannyo madi' manjoo' na potatae. Mian anu pande saja' tenda na kinyonyoanyo.

²⁸ Samian na ponga' saidi' mae osangka pande ka' anu monsumbu' bapokin; de ia momohokot ka' madi' motatae.