AMSAL 16 - KITAB NU TUMPU ALLA LELE MA'IMAI'

¹ Manusia timbali mombau sa'angu' na tanga'an panyo Tumpu Allah na mombee'i kaputusan.

² Batu-batu palabuatan nu mian tantu ugaat ma'ima' na nu oa'i; panyo Tumpu na monsumbu' isi nu kinyonyoanyo.

³ Asanakon hi Tumpu iwi-iwi' na tanga'an nu beleyum; sahingga kohasinnyo na beleyum mokalaja.

⁴ Sinin na apaa na anu nu bau nu Tumpu ko makisud-Nyo; ka' makisud nu mian anu ma'idek na kinyonyoanyo ola kasilakan.

⁵ Iwi-iwi' na mian anu takabun nu ka'ideki nu Tumpu; Ian madi' mompojohok aha da madi' ohukum.

⁶ Mian anu tulu-tulutan hi Tumpu Allah mohumpak ka'ampunan; mia anu tulu-tulutan hi Tumpu madi' mombau palabuatan anu ma'idek.

⁷ De beleyum momposanang kinyonyoa nu Tumpu; iwi-iwi' na sampo bali' nu beleyum Nu potimbali sangalu nu beleyum.

⁸ Lebe ma'ima' ola sangkiding na pandapatan asan ohumpak nu kinyonyoa anu madi' tageo'; boli pandapatan manjoo' padahan ohumpak nu palabuatan anu madi' adin.

⁹ Manusia timbali mombau tanga'an; panyo Tumpu Allah na montantukan jalan nu kantumuu'annyo.

¹⁰ Tomundo' montalima kuasa lengkat mae hi Tumpu Allah; jadi ia madi' sala' i uno nu kaputusannyo.

¹¹ Tumpu mongkahanda'i mian anu madi' tageo' na kinyonyoanyo ihan badagang; ka' mule' monggunakon timbangan ka' ihan monsukat.

¹² Hi aha anu balakuasa de mombau anu ma'idek aijo' han anu madi' ma'ima'; kalana pamalentahannyo mahoson aijo' kalana ka'adilan.

¹³ Katalangan anu totu'u momposanang anu balakuasa; ia mongkalibosi mian anu motatae madi' tageo'.

¹⁴ Tambuha' nu tomundo' salakumo lele nu hukuman mate; mian anu pande mongusahakon da mohuhusi tambuha'!

¹⁵ Nonongnyo nu kinyonyoa nu tomundo mompodaagi' kasanangan nu kantumuu'an; susumo kundom montudunakonmo ujan itempo' nu posinaa.

¹⁶ Mohumpak kapandean bapikin nu lingkudui na mohumpak mosini'; mohumpak ilimu' lebe ko angga'nyo nu lingkudui na mohumpak salaka.

¹⁷ Mian anu manonong matikojo'on ipalabuatan anu ma'idek; mian anu mompalahatikan kantumuu'annyo alati'nyo monjagai butongnyo.

¹⁸ Mian anu takabun mohumpak kahansunan; kobubuun ahennyo madi'mo ohalagai.

¹⁹ Lebe ma'ima' boli takabun ka' madi' ko halata'; ka' de ola mule' mombatuki mian anu takabun ka' mompake halata' nu mian anu ingagoan.

²⁰ Palahatikan apaa na anu ingajanakonmo hi beleyum sahingga beleyum saidi' mae mohumpak apaa na anu ma'ima'. Palesaya hi Tumpu sahingga beleyum mohumpak kabilahian.

²¹ Mian anu pande osumbu' ipikilanyo anu matajom; potataenyo na monsabapi sanang na mohongo.

²² Kapandean aijo'mo na pinolengkatan mae nu kabilahian nu kantumuu'an nu mian anu manonong. Panyo mian anu ponga' nu sakisa nu posi kaponga'annyo.

²³ Pikilan nu mian anu manonong mombau potataenyo pande; ka' pangajalannyo lebe mombau da opalesaya.

²⁴ Potatae nu anu madi' kopesa-pesa sumomo juu' nu uani'; nyamitnyo matami' ka' mule' mokopahoson butong.

²⁵ Daagi ko jalan anu otoa hodi' hondo; panyo imihinyo mae jalan aijo' mompanjolongi kasilakan.

²⁶ Mongkahanda'i mongkaan mongkakeha'i mian da bala usaha; kalana monginau' ohop sahingga talapakisa bakalaja na ia.

²⁷ Mian anu ma'idek na kinyonyoanyo bala usaha monsilakai sangalunyo; potataenyo ma'idek hondo sumomo ahi' oba nu apu.

²⁸ Mian anu madi' adin monsaduakon painggagan; anu momboa-boa sisik ma'idek hi sangalu mongga'atakon sampo bela' anu mompahakona hondo.

²⁹ Mian anu buhingison mombaleko'i to sanga-sangalunyo; ka momboa aha i uno nu kasilakan.

³⁰ Obala'ingati na mian anu tolomoing ka' mongkinta-kinta'i; ia kotanga'anmo anu ma'idek i uno nu kinyonyoanyo.

³¹ Mian anu madi' tageo' na kinyonyoanyo saidi mae obee'i mantan na umun; uan nu ubaknyo sumomo makota' anu talalo hondo ma'ima'.

³² Madi' sampa pusa lebe ma'ima', nu lingkudui na anu ko kakuasa'an mongkuasai lebe ma'ima' nu lingkudui na anu mompatundu' kota'.

³³ Da osumbu' na nasip nu manusia, mombuang onde; panyo anu montantukan hasinnyo ola ahi' samata-mata Tumpu.