AMSAL 15 - KITAB NU TUMPU ALLA LELE MA'IMAI'

¹ Tiba pontaami anu madi' kopesa-pesa tambuha' timbali mohuhus; panyo de pontaami anu talalo mapohos mombau da ola mompaka motambuha'.

² Potatae nu mian anu pande mombau da ilimu' lebe oka'ima'i panyo potaate nu mian anu ponga'isinyo ola ahi kaponga'an.

³ Tumpu montoa iwi-iwi' anu jinadimo iyaya mae na tampat; Ia mompalahatikan iwi-iwi anu ma'ima' kabai anu ma'idek.

⁴ Potatae anu ma'ima' mongkakeha' da bihan na kinyonyoa; panyo potatae anu monsakiti kinyonyoa mombau da lu'us na tanga'an.

⁵ Mian anu ponga' montee pokinde nu tuumanyo; panyo mian anu pande montuluti tuumanyo.

⁶ I laigan nu mian anu manonong manjoo' na halata; panyo kakaya'an nu mian anu ma'idek na kinyonyoanyo ingingkotanmo nu balaa'.

⁷ Potatae nu mian anu pande manjoo' na ilimu'nyo; panyo pikilan nu mian anu ponga' madi' sumo aijo'.

⁸ Tumpu montalima do'a nu mian anu manonong; panyo Ia mongka'ideki palasombahan nu mian anu ma'idek na kinyonyoanyo.

⁹ Tumpu mongka'ideki kalakuan nu mian anu duluhaka; panyo Ia mongkalibosi mian anu mompagala mombau apaa na anu Nu kahanda'i.

¹⁰ Mian anu mombau palabuatan anu ma'idek saidi mae osakisa; mian anu madi' timbali otewa' saidi' mae silaka.

¹¹ Nu sumbu' nu Tumpu na dunia nu mian anu sinilakamo ka' apa-apaa na anu jadi ikiijo'; madi' opoko ala oposuluk na pikilan nu mian hi Ia!

¹² Mian anu lewa' mongka'ima'i mongalu madi' mongka'oho' otewa'; ia madi' mongka'oho' momoita pokinde' hi mian anu pande.

¹³ Kinyoa anu lame' otoa isahaya nu ohup; panyo kinyonyoa anu susa' mompohente sahingga madi'mo bihan na kinyonyoa.

¹⁴ Mian anu pande molio ilimu'; panyo mian anu ponga' na ola ahi' tasiaga nu kaponga'annyo.

¹⁵ Mian anu madi' lame' na kinyonyoanyo tionyo ahi' saja' bala usaha i uno nu kantumuu'annyo, panyo mian anu saja' lame' mohumpak ka'ima'an i unonu kantumuu'annyo.

¹⁶ Lebe ma'ima' ola sangkiding na halata'panyo monsumbu' mabuhuk hi Tumpu, ka' de mule' manjoo' na halata' panyo saja bata-bata.

¹⁷ Lebe ma'ima' mongkaan utan asan mompaha kali-kalibosi; ka' demule' mongkaan ponoha' anu matami' padahan ola mompaha ka'i-ka'ideki.

¹⁸ Mian anu malia' pusa monsaduakon painggagan; panyo mian anu sabaan momboa paladamean.

¹⁹ Mian anu moluluk saja'mongoa'i kasusa'an; panyo mian anu madi' tageo' na kinyonyoanyo madi mohumpak kasusa'an.

²⁰ Anak anu pande momposanang kinyonyoa nu tuumanyo; panyo anak anu ponga' madi' mohalagai tinanyo.

²¹ Kaponga'an aijo'mo na kasanangan nu mian anu madi' sampa mangalati'; panyo mian anu pande kantumuu'annyo madi' tageo'.

²² Anu otanga'i madi' jadi de madi' opotutugakon pe'e; panyo anu otanga'i kohasinnyo de manjoo' na anu mombee'i pokinde'.

²³ Potatae anu otaeakon kona memang itempo'nyo mompotoka mae kasanangan nu kinyonyoa,

²⁴ Mian anu pande montulu jalan anu mapindako anu mompanjolongi kantumuu'an; ka' misa jalan anu mintua anu mompanjolongi kasilakan.

²⁵ Tumpu mohobo'akon laigan nu mian anu takabun; panyo tano' nu samian na anu binalumo, Ia na monjagai.

²⁶ Tumpu mongka'ideki tanga'an anu ma'idek; panyo potatae anu ma'ima' momposanang kinyonyoa-Nyo.

²⁷ Ihe na molio ka'untungan anu madi' halala' mompateimo posi auannyo; panyo ihe na mongka'ideki doi anu bau ponsogo' saidi' mae kantumuu'annyo sanang.

²⁸ Mian anu manonong nu tutugi pe'e ahi' na anu nu taeakon; panyo mian anu ma'idek na kinyonyoanyo montaeakon hahan anu ma'idek.

²⁹ Tumpu mompotombihing de ko mian anu manonong na balado'a; panyo Ia madi' mompajuli mian anu duluhaka.

³⁰ Ohup anu lame' mompobilahi suele kinyonyoa; lele anu ma'ima' mompolumu santu'.

³¹ Mian anu mompajuli de otewa'; minsoopmo mian anu pande.

³² Mian anu madi' mongka'oho' opokinde'i madi' mohalagai posi butongnyo; panyo mian anu mongka'oho' montalima pokinde' timbalimo mian anu manonong.

³³ Mabuhuk hi Tumpu atina'mo na tampu'unannyo nu pangajalan anu ma'ima', panyo madi' kobubuun na kinyonyoa na obau pe'e ahi' momona atina'je ka' kaholomatan.