AMSAL 12 - KITAB NU TUMPU ALLA LELE MA'IMAI'

¹ Mian anu mongka'ima'i ilimu' sanang na montalima pokinde', panyo mian anu madi' mongka'ima'i pokinde' atina'mo na mian ponga'.

² Mian anu manonong nu ka'ima'i nu Tumpu; panyo mian anu montanga'imo palabuatan anu ma'idek sadi mae mohumpakmo hukuman.

³ Madi' ko samian pe'e na moko ala tataap sanang na kantumuu'annyo kalana mombau palabuatan ma'idek; panyo mian anu madi' tageo' na kinyonyoanyo tataap madodo madi' opoko ala ogegut.

⁴ Bengkele' anu manonong momboa sanggo ma'ima' ka' bau kabilahian nu langkai'nyo; panyo bengkele' anu monsaduakon langkai'nyo ma'ambang sumomo panyakit lasa anu mongkekedi buku.

⁵ Mian anu madi' tageo' na kinyonyoanyo saja' mompokilawa hahan anu ma'ima'; panyo mian anu ma'idek na kinyonyoanyo saja' montanga'i mosia na mongakali.

⁶ Potatae nu mian anu ma'idek na kinyonyoanyo monsilakai; panyo potatae nu mian anu madi' tageo' na kinyonyoanyo momposalamat.

⁷ Mian anu ma'idek na kinyonyoanyo saidi mae madi'mo ko angga'nyo ka' silakamo ka' madi'mo otoa-toa; panyo mian anu manonong saidi mae tataap ko angga'nyo sampe molundu-lundu na tulunan.

⁸ Mian opuji' sitimbang tiba kapandeannyo; mian o alu sitimbang tiba kaponga'annyo.

⁹ Lebe ma'ima' timbali mian da'isan biasa anu kopakalaja'an; ka' de mule' ola mingadi-adi' susumo mian anu daka' napangkatnyo padahan madi' ko anu okaan.

¹⁰ Mian anu manonong mongkalesang potuu'onnyo; panyo mian anu ma'idek na kinyonyoanyo na ola ahi'monsakisa.

¹¹ Anu topo ale' mokalaja makeke ko anu okaan manjoo'; panyo mian anu ola mongide-idei sinaa kalana ola opake i han anu madi' ko gunanyo atina'mo na mian anu ponga'.

¹² Mian anu ma'idek na kinyonyoanyo mongkahanda'i mohumpak ka untungan hi mian anu madi' talakana; panyo mian anu manonong sumomo kau' anu ko bua'nyo.

¹³ Mian anu ma'idek na kinyonyoanyo posi potataenyomo anu toto ide-idek na tinaloakonnyo aijo'mo na monsusa'i ia, panyo mian anu manonong madi' nutokai nu kasusa'an.

¹⁴ Toto samian mohumpakmo hukuman sitimbang tiba potataenyo ka' palabuatannyo, panyo toto samian obee'i tambonyo ka' sitimbang tiba palabuatannyo.

¹⁵ Mian anu ponga' nu oa'i na butongnyo madi' toho' kokasala'an; panyo mian anu pande mongka'ima'i pokinde'.

¹⁶ De mian anu ponga' pusa ugaat kalana nohongomo potatae nu mian, isinaamo ahi' ai-aijo' na nupoto'i koonyo ia pinusamo; panyo mian anu pande madi' montapali de koa nu mongalu.

¹⁷ Montaeakon anu totu'u aijo' alati'nyo mian montinjohakon ka'adilan; panyo baeko aijo' alati'nyo mian mombau da madi' ko kaadilan.

¹⁸ Potatae anu madi' kopatunyo monsakiti kinyonyoa sumomo anu otobok nu bajak, panyo potatae nu mian anu pande sumomo pakuli' anu timbali mompo alin sakit.

¹⁹ Baleko' ola sangkinihap nu sumbu'mo nu mian; panyo potatae anu totu'u tataap sampe toka sidu-sidutu'.

²⁰ Mian anu montanga'i palabuatan anu ma'idek mongka'ima'i da madi' ko kaadilan, panyo mian anu mompagala da ko ka'ima'an saidi mae kantumuu'annyo timbali ma'ima'.

²¹ Mian anu manonong madi' toho' nu kona nu balaa'; panyo mian anu ma'idek na kinyonyoanyo saja' nu tokai nu kasusa'an.

²² Tumpu mongka'ideki anu baleko'; panyo Ia sanang hi mian anu madi' tageo' na kinyonyoanyo.

²³ Mian anu pande madi' mombuulakon kapandeannyo; panyo mian anu ponga' mombebakon kaponga'annyo.

²⁴ Mokalaja makeke mompotimbali mian da balakuasa; moluluk mompakisa mian da timbali posaihon.

²⁵ Mongoa'i bata-bata mombau da madi'mo na mian ko gia' apa-apaa; panyo potatae anu ma'ima' timbali mongkakeha' kinyonyoa.

²⁶ Mian anu manonong lebe mohumpak dale', nulingkudui na sampo bebe'nyo laigan; panyo mian anu ma'idek na kinyonyoanyo mohumpak kasusa'an, kalana gau'nyo anu ma'idek aijo'.

²⁷ Ola lewa' moluluk madi' mohumpak apaa na anu nu kahanda'i; panyo mokalaja makeke mian mohumpak kakaya'an.

²⁸ Mian anu mombatuki jalan anu totu'u saidi mae kantumuu'annyo mohumpak ka'ima'an; panyo mian anu montulu jalan anu ma'idekan mompatuimo kasilakan.