AMSAL 11 - KITAB NU TUMPU ALLA LELE MA'IMAI'

¹ Tumpu mongka'ideki mian anu mompake timbangan anu mongakali; panyo Ia sanang hi mian anu mompake timbangan anu totu'u.

² Mian anu takabun saidi' mae ia opopo'ambangmo; panyo mian anu ta'aluk na kinyonyoanyo iamo na anu pande.

³ Mian anu manonong nu potiju' nu kinyonyoa anu madi' tageo'; panyo mian anu mongka'ima'i baleko' nu hansuni nu leko'nyo.

⁴ De montanda'imo kasilakan halata' madi'mo ko gunanyo; panyo kantumuu'an nu beleyum salamat de beleyum madi' tageo' na kinyonyoa.

⁵ Jalan nu kantumuu'an nu mian anu manonong nu pohata nu kinyonyoa anu madi' tageo' panyo mian anu ma'idek na kinyonyoanyo momboa butongnyo da hansun.

⁶ Mian anu madi' tageo' na kinyonyoanyo salamat kalana kinyonyoanyo ma'ima'. Panyo mian anu madi'mo palesaya manabu'mo i unonu kaponga'annyo.

⁷ De silakamo na mian anu ma'idek na kinyonyoanyo, anu nu taha'imani suele silakamo; panyo montaha'imani posi kahosonan madi' ko alati'nyo.

⁸ Mian anu palesaya totu-totu'u madi' nukona nu kasusa'an; panyo anu ma'idek na kinyonyoanyo mohumpak hahan anu molewot.

⁹ Sisik nu mian anu ma'idek na kinyonyoanyo momboa kasilaka'an; panyo kapandean bapikin mian anu manonong momposalamat.

¹⁰ Kota' anu lame' de hi mian anu madi' tageo' na kinyonyoanyo pohumpakan dale' i unonu polioan; panyo mian da'isan montaligalaimo de mian anu ma'idek na kinyonyoanyo silakamo.

¹¹ Palasitujuan nu mian anu madi' tageo' na kinyonyoanyo na mompalentah kota'; potatae nu mian anu ma'idek na kinyonyoanyo ola mongidei.

¹² Mompopo'ambang mian sangga'at aijo'mo na kalakuan anu ponga'; panyo mian anu manonong madi' montaloakon maumo pa' apaa.

¹³ Anu moleleakon lele anu madi' totu'u madi' moko ala montoongi lahasia; panyo mian anu timbali opalesaya timbali molahasiakon palakala.

¹⁴ Bansa timbali hansun de madi' ko polaya'; lebe manjoo' na anu mombee'i pokinde, lebe mohumpak mule' kasalamatan.

¹⁵ Balajanji mombayan samaya nu mian sangga'at bala'alati' mompotoka mae kasilaka'an. Lebe ma'ima' boli tagoda ihan aijo' da madi' ko anu mompoposia.

¹⁶ Boune anu manonong mohumpak kaholomatan; panyo mian anu singgi mohumpak kakaya'an.

¹⁷ Mian anu manonong mompo'untung butongnyo.

¹⁸ Ka'untungan nu mian anu ma'idek na kinyonyoanyo madi' totu'u; panyo ka'untungan nu mian anu mombau anu ma'ima' aijo'mo na ka'untungan anu memang sahondo-hondonyo ahi'.

¹⁹ Ihe na anu saja' mombau anu ma'ima', ka'untungannyo saidi mae mohumpak kasanangan; panyo ihe na anu sabole-bole mombau anu ma'idek mongahopimo kasilaka'an.

²⁰ Tumpu mongka'ideki mian anu ko kinyonyoa ma'idek; panyo Ia mongkalibosi mian anu kantumuu'annyo madi' ko anu opisala'i.

²¹ Mian anu ma'idek na kinyonyoanyo memang mohumpakmo hukuman; panyo mian anu manonong mohumpakmo kasalamatan.

²² Boune handa panyo madi' manonong; sumomo sinsing mosoni' isung nu bau'.

²³ Apaa na anu nu kahanda'i nu mian anu manonong saja' ohumpak na hasinnyo, anu ma'ima'; panyo anu nu taha'imani nu mian anu ma'idek na kinyonyoanyo ola ahi' tambuha'.

²⁴ Daagi ko mian anu saja' mongka'oho' mombee'i panyo ola ahi' mompaka kaya, panyo daagi ko mian anu madi' bebea na mompake apa-apaa padahan ola ahi' mompaka kasiasi hondo.

²⁵ Mian anu mombee'i manjoo' panyo saidi mae ola ahi' da molabi-labi nu humpak, mian anu mongka'ima'i montulungi saidi mae suele otulungi.

²⁶ Ihe na montambun balang nu totobi'akon nu mian; panyo ihe na molio palabuatan ma'idek nu tuda'i nu kasusa'an.

²⁷ Ihe na makeke mombau anu ma'ima' nu ka'ima'i nu mian; panyo mian anu mompobaluk opuji'.

²⁸ Ihe na talalo montaha'imani halata' saidi mae mohudu'mo susumo hon nu kau' anu manggasmo, panyo mian anu palesaya totu-totu'u mompaka panjoo'mo susumo sumpe nu kau'.

²⁹ Mian anu momposusa' auannyo saidi' mae madi'mo daagi ko apa-apaa. Mian anu ponga' saidi' mae timbalimo posaihon nu mian anu pande.

³⁰ Mian anu palesaya totu-totu'u saidi' mae mohumpakmo kantumuu'an ma'ima; mian anu pande mintuang na anu mombatuki.

³¹ De idunia aiya mian manonong suele ahi' saidi' mae mohumpak balosnyo; memang mantantumo na mian anu ma'idek na kinyonyoanyo, baladosa'mo saidi mae mohumpakmo hukuman.