AMSAL 10 - KITAB NU TUMPU ALLA LELE MA'IMAI'

Pokinde' i Salomo

¹ Sumo uuka na pokinde' i Salomo: Anak anu pande mohangkat sanggo nu tuumanyo; panyo anak anu ponga' momposusa' kinyonyoa nu tinanyo.

² Kakaya'an anu ohumpak nu katageo'an madi' mombee'i ka untungan; panyo mule' anu madi' tageo' timbali momboa kasalamatan.

³ Tumpu madi' mompojohok mian anu manonong kakulangan i anu okaan; panyo Ia madi' mombee'i kasampatan mian anu ma'idek nakalakuannyo sahingga mian aijo' madi' moko ala mohumpak anu nu ka'ma'i.

⁴ Mian anu moluluk saidi mae timbali kasiasi; panyo mian anu makeke saidi mae timbali kaya.

⁵ Mian anu pande mohumpakmo anu nu padak de tokamo na lonunyo; panyo mian anu ola saja' hoyot de tokamo na lonunyo pompadakan ola ahi' monsaduakon da butongnyo ma'ambang.

⁶ Mian anu manonong mohumpak balakat. Panyo palabuatan nu mian anu taha-tahahumo hi mian kiijo' sulu-sulu' ipotatae nu mian anu ma'idek na kinyonyoanyo.

⁷ Saja' o inau' na mian anu manonong, aijo' salakumo sa'angu' na balakat; panyo mian anu ma'idek na kinyonyoanyo malia' hondo okolilimi.

⁸ Mian anu pande mongka'ima'i pokinde'; panyo mian anu potataenyo madi' singguan saidi' mae mohumpak kasusa'an.

⁹ Mian anu madi' tageo' na kinyonyoanyo kantumuu'annyo aman; panyo mian anu mongakali saidi' mae osumbu'mo.

¹⁰ Ihe na mompohowini kahondoan, mompodaagi' kasusa'an; panyo ihe na mompisala'i i aho-ahop, mompagala da mohumpak kantumuu'an ma'ima'.

¹¹ Sisik nu mian anu manonong mompotimbali kantumuu'an anu ma'ima'. Panyo kiijo' sulu-suluk ipotatae nu mian anu ma'idek nakinyonyoanyo madi' osumbu-sumbu'na kinyonyoa anu pagalanta.

¹² Mongka'ideki mian monsaduakon da saja' painggaga; panyo mompaha kali-kalibosi mongampuni iwi-iwi' na kasala'an.

¹³ Mian anu kopikilannyo matajom montaeakon potatae anu pande. Panyo mian anu ponga' na palalu ahi' opohos.

¹⁴ Mian anu pande momposihuk pangatahuan anu mingkaliangan; panyo de mian anu ponga' na motatae, ia ola monsaduakon anu moko silaka.

¹⁵ Kakaya'an monjagai mian anu kaya; panyo kasusa'an i uno nu kantumuu'an mohansuni mian anu kasiasi.

¹⁶ De mombau ka'ima'an tamboonyo aijo'mo kantumuu'an anu sanang. Panyo de mombau dosa' ahennyo lebe manjoo' mule' da dosa'.

¹⁷ Ihe na mompalahatikan pokinde' mohumpak kantumuu'an anu sanang. Panyo de ihe na madi' mongakui kasala'annyo; ia i unomo nu kasilaka'an.

¹⁸ Mian anu mompohowini mongka'ideki mian aijo'mo na anu saja' mongakali. Mian anu lewa' mompitana'i aijo'mo na mian anu ponga' hondo.

¹⁹ Talalo manjoo' na potatae, talalo manjoo' mule' ugaat na mombau dosa'; panyo mian anu moko ala monjagai jila'nyo atina'mo na mian pande.

²⁰ Potatae nu mian anu manonong sumomo salaka anu madi' kogalo'nyo. Panyo pikilan nu mian anu ma'idek na kinyonyoanyo madi' ko alati'nyo.

²¹ Potatae nu mian anu manonong salakumo balakat kona hi mian da'isan. Panyo kaponga'an nu mian anu ponga' monsilakai posi butongnyo.

²² Ola ahi' kalana balakat nu Tumpu na mian timbali kaya, panyo mokalaja makeke madi' moko ala montuangi halata.'

²³ Mian anu ponga' sanang na mombau pakalaja'an; panyo mian anu pande mongka'ima'i hondo molio kapandean bapikin.

²⁴ Mian anu madi' tageo' na kinyonyoanyo mohumpak apaa na anu nu kahanda'i; panyo mian anu ma'idek na kinyonyoanyo mohumpak apaa na anu talalo hondo nu kabuhuk.

²⁵ De ko tombusisi' montuda'mae mohopu' na mian anu ma'idek na kinyonyoanyo; panyo mian anu madi' tageo' na kinyonyoanyo tataap mahoson sampe toka sidu-sidutu'.

²⁶ Boli mompokau mian anu moluluk, ia ola momposungkelek kinyonyoa; sumomo anu malosing mongilu'i bese' kabai tibuk mompopoe'mata.

²⁷ Oholomati na Tumpu da beleyum tumuu' pin; mian anu ma'idek na kinyonyoanyo ma'isa pe'e toka na ajannyo ia silakamo.

²⁸ Anu nu taha imani nu mian anu manonong na kinyonyoanyo mompotimbali ia sanang na kinyonyoanyo; anu nu taha imani nu mian anu ma'idek na kinyonyoanyo madi'mo ko apa-apaa anu nu humpak.

²⁹ Tumpu monjagai mian anu madi' tageo' na kinyonyoanyo; panyo monsilakai mian anu mombau anu ma'idek.

³⁰ Mian anu madi' tageo' na kinyonyoanyo kantumuu'annyo madi' ko anu mompoposia ka' mule' mohumpak ka'ima'an; panyo mian anu ma'idek na kinyonyoanyo madi' jojoong i tano' pusaka'.

³¹ Mian anu madi' tageo' na kinyonyoanyo pande na basisik; panyo mian anu ma'idek na kinyonyoanyo ogunggumije na nganga'nyo.

³² Potatae nu mian anu madi' tageo' na kinyonyoanyo momposanang kinyonyoa; panyo potatae nu mian anu ma'idek na kinyonyoanyo saja' momposakit kinyonyoa.