AMSAL 1 - KITAB NU TUMPU ALLA LELE MA'IMAI'

Angga'nyo nu pokinde' iwi-iwi' i Salomo

¹ Aiyamo na pokinde' iwi-iwi' i Salomo anak moo'ane i Daud, tomundo nu Israel.

² Anu nu kahanda'i aijo'mo montulungi mian da monsubu' mosia da timbali pande, ka' monsumbu' atulan nu kantumuu'an ka' mule' mompangalati'i apa-apaa na anu otaloakon anu ko alati'nyo maleeng.

³ Pokinde' haha aijo' mompogulu' mosia na mian tumuu' ka' pande, hodi' na kinyonyoanyo, adin ka' totu'u.

⁴ Mian anu madi' ko anu nu pisumbu-sumbu' nu ajan sahingga ko pikilan anu mangalati', ka' to oli-olitau tiba to lalangkoyang nu ajan da timbali mian anu pande ka' moko ala bapikin susumo anu motu'amo.

⁵ Tiba pokinde' haha aijo' miana nu pande mompaka panjoo'mo na ilimu'nyo ka' mian anu nosikolahmo mohumpakmo to poki-pokinde' anu ma'ima'.

⁶ Tiba jalan anu sumo aijo' aha moko alamo mompangalati'i apaa na anu ma'isa sinumbu' i uno nu pokinde' ka' mule' mompangalati'imo hahan anu tinaloakonmo nu mian anu pande ka' mule' palakala anu nu posampe mae nu aha.

Pokinde' hi to oli-olitau ka' hi to lalangkoyang

⁷ Da mohumpak ilimu' anu sahondo-hondonyo momonanyo mian tionyo ahi' mongadati ka' mabuhuk hi Tumpu. Mian anu ponga' madi' mongangga'i kapandean bapikin ka' madi' mongka'oho' opogulu'.

⁸ O intomakon apaa na anu pinoto'i nu tuuma ka' tina nu beleyum hi beleyum, anakku,

⁹ kalana pangajalan nu aha haha aijo' montuangimo kalakuan nu beleyum sumomo pombunga-bungai ubak ka' olo' anu lebe mompohandamo ohup nu beleyum.

¹⁰ De nupagala nusale'i nu mian baladosa' na beleyum o anakku, boli otuluti na aha anu pagalamo monsale'i.

¹¹ De bisuannyo aha motatae, “Imbo', da kita molio mian ka' obandahi na ia. Imbo' da osoba-sobanto o tumbuhintomo na mian anu madi' ko sala'nyo.

¹² Uuka ai ya aha tumuu' sanang ka' madi' masakit, panyo aha saidi' mae timbalimo susumo mian anu mompai silakamo.

¹³ O alantomo na to bala-balang nu aha anu mahan na olinyo, da laiganto mobuke'mo nu to bala-balang anu opahuhuakon mae.

¹⁴ Imbo', batuki mae! Saidi' mae anu otomangto obagintoje pokakana!”

¹⁵ Boli mombatuki to mia-mian anu susumo aijo' o anakku! Boli osasuhi na aha.

¹⁶ Aha madi' moko ala momohokot de ma'isa mombau anu ma'idek. Aha ko tanga'an da sampamo mompatei.

¹⁷ Sadang pe'e tomonsi' madi' ahi' minsoop i uno nu bihan anu pinobi mo i ahop nu matanyo,

¹⁸ panyo to mia-mian anu ma'idek na kinyo nyoanyo aijo' ola ahi' mompokona bihan da posi butong nu aha na nukona – bihan anu monsilakai aha.

¹⁹ Memang mian anu molio anu okaan panyo olio nu kalakuan lewa' pagala mompakisa, posi nyawanyo je na bau pombayannyo.

Potatae nu kapandean bapikin

²⁰ Potombihing! Kapandean bapikin nolagamo i songko-songko na jalan ka' notataemo daka-daka' i lapangan!

²¹ Ia noloboo'mo i sabatan daka' iwi-iwi' ka' i tampat-tampat anu lame':

²² “O to mia-mian anu panggaga! Sampe toka hipian na kopinnyo na belemiu me saja' sumo aijo'. Hipianje na tempo'nyo belemiu madi'mo montee ilimu' ka' montulutimo pangajalan?

²³ Potombihing mae na aku de aku mompisala'imo beleyum sahingga ku poto'imo hi beleyum na isi nu kinyonyoangku ka' ku pogulu'mo na ilimu'ku.

²⁴ Belemiu i lagangkumo, panyo belemiu madi'mo montuluti ka' madi'mo mompajuli.

²⁵ Iwi-iwi' na pokinde'ku madi'mo opajuli nu belemiu ka' aku mompisala'i madi'mo otuluti nu belemiu.

²⁶ Kalana aijo', de belemiu silakamo ku koko joimo na belemiu. De belemiu mabuhukmo, ku alumo na belemiu.

²⁷ Ya, ku alumo na belemiu de belemiu bata-batamo ka' mongoa'imo kasansala'an kalana nutokaimo mae nu balaa' anu tokamae susumo tombusisi.

²⁸ Tokaje na tempo'nyo susumo aijo', belemiu molagaje aku panyo aku madi'mo mongkabot taami. Belemiu molioje aku iyaya mon panyo madi' okabot na aku.

²⁹ Belemiu sumomo mian anu madi' toho' nongka' ima'i da mohumpak ilimu' ka' madi' montuluti Tumpu.

³⁰ Belemiu madi' toho' nongka'oho' nontalima sinin na pokinde'ku kabai mompalahatikan apa-apaa na pinisala'anku.

³¹ Kalana aijo', belemiu montalimaje balosnyo apa-apaa na anu binaumo nu belemiu ka' sinin na tanga'an nu belemiu anu ma'idek.

³² Mian anu madi' ko anu nu pisumbu-sumbu' saidi' mae silakamo kalana madi' mompajuli aku, ka' mian ponga' saidi' mae mohopu'mo kalana madi' mompajuli aku.

³³ Panyo mian anu mompotombihing mae aku tumuu' ma'ima'. Ia tumuu' madi' ko anu mompoposia ka' madi' palalu mabuhuk.”