AMOS 9 - KITAB NU TUMPU ALLA LELE MA'IMAI'

Anu tinoangku na hukuman anu lengkat mae hi Tumpu

¹ Aku nontoa Tumpu tinuminjo koko mezbah. Ia nombee'i palentah aiya, “Santib hoso-hoson na puusnyo nu ohi' nu Laigan-Ku da gandalia iwi-iwi' tolohunjong. Tua'akon na to ohi haha aijo' i ubak nu mian haha aijo'. Aha anu madi' silaka Ku pateije i uno nu pahampatean. Madi' ko samian pe'e na noko palaiakon butong, madi' ko samian pe'e na moko ala mopalai.

² Mau pe'e aha moko ala mompinsoopi dunia nu mian anu silakamo. Ku humpak na aha. Mau mule' aha moliba' mokiita' i langit, Aku montau'akon mae aha lengkat i aita' mae.

³ De aha matisuluk i Bungkut nu Karmel, Ku lio na aha ka' Ku hakop. De aha matisuluk i apan nu ambai, Ku palentahje na tomundo nu ulo anu i ambai da mombutu' aha.

⁴ De aha nu boamo nu sampobali', Ku palentahje da aha opatei. Kahanda'-Ku da ohopu'imo na aha, ka' madi'mo montulungi aha.”

⁵ Dunia tinolohunjongmo ka' mian anu jojoong i dunia sinusa'mo kalana i henggomo nu Tumpu anu Matangkas ka' Daka' na kuasanyo. Susumo Kaunyo nu Nil iyaba' ka' mo'oti sumo aitumo na aha moliba' lantas nanabu'.

⁶ Tumpu nombau laigan-Nyo majo'on aita' mae i langa, dunia pinokona-Nyomo langit susumo atopnyo gio-gio' matingkou', ka' uee lengkat i ambai ilambe'-Nyomo i katano'an, anu nombau haha aijo' sanggo-Nyo aijo'mo Tumpu!

⁷ Tumpu notatae, “O mian nu Israel, Ku palahatikan na mian nu Sudan pokakanamo susumo Aku mompalahatikan belemiu. Binoang-Kumo na mian nu Filistin lengkat i Kreta ka' mian nu Siria lengkat i Kir pokakanamo susumo Aku nomboa belemiu lengkat i Mesir.

⁸ Akumo na Tumpu Anu Matangkas na Kuasanyo nompalahatikanmo kalaja'an nu Israel anu binaladosa'mo aiya, ka' Aku mohopu'imo aha i dunia aiya. Panyo tulunan i Yakub madi' iwi-iwi'mo na Ku hopu'i. Aku, Tumpu na notataemo.

⁹ Ku palentahmo da o tapiimo na bansa Israel susumo mian montapii gandum i kiapan. Da o'alini iwi-iwi' na anu madi' ko gunanyo anu aijo' hi aha, Ku pokalangkabutmo na aha hi to bansa-bansa.

¹⁰ Mian-Ku anu palesayamo panyo binaladosa'mo, motatae, ‘Tumpu madi' mompojohok kita nutuda'i nu balaa'.’ Panyo aha totu-totu'unyo osilakaimo i uno nu pahampatean.”

Israel po'ule'mo obali'i na kalaja'annyo

¹¹ Tumpu notatae, “Tokaje na tempo'nyo Aku mompo'ule' mombali'i kalaja'an i Daud. Uuka aiya kalaja'an aijo' tinimbalimo susumo laigan anu nohobo'mo. Panyo pagannyo mesen po'ule'je Ku poko ima'i ka' po'ule'je Ku bau sahingga timbalimo susumo u'utu mae.

¹² Mian nu Israel mongkuasaimo lipu' nu Edom anu daagi' tuha'nyo ka' iwi-iwi' na bansa anu u'utu mae Aku na tumpunyo. Aku, Tumpu na notatae ka' Aku na mombau han aijo'.”

¹³ Tumpu notatae, “De tokamo na tempo'nyo, tumuu'na gandum talalo hondo malia' sahingga tempo'nyonu mompadak madi' ko kamingkotannyo. Anggur malia'mo natumuu' sahingga mian saja'mo mombau uee nu anggur. Uee nu anggur jumujumo mae i to bungku-bungkutnyo ka' mo ili mae i to puge-puge'nyo.

¹⁴ Ku pojadimo na mian-Ku Israel anu palesayamo da aha po ule'mo sanang. Aha po ule'mo mombau kota' nu aha iwi-iwi' anu na'idekmo lantas aha jojoongmo ikiijo. Aha monsu'animo nu anggur iwi-iwi' na ale' lantas saidi' mae nu inumo nu aha na ueenyo. Aha mongale'mo ka' nu kaanmo nu aha na hasinnyo.

¹⁵ Ku pojoongmo na aha mian-Ku anu palesayamo ilipu' anu Ku bee'mo hi aha. Aha madi'mo daagi olalin, tataapmo ikiijo'. Akumo na Tumpu Allah nu aha anu notataemo.” 18