AMOS 8 - KITAB NU TUMPU ALLA LELE MA'IMAI'

Anu tinoa nakalanjang ko isinyo bua' nu kau'

¹ Aku nontoa mule' lengkat mae hi Tumpu Anu Matangkas na Kuasanyo. Tinoang-Ku sa'angu'na kalanjang isinyo bua' nu kau' anu nahamo.

² Pinokilawa nu Tumpu, “Beleyum nontoa apaa, Amos?” Tinamaan-Ku, “Sa'angu' na kalanjang isinyo bua' nu kau' anu nahamo.” Tumpu notatae, “Tempo'nyo i nahamo na aha mian-Ku Israel anu palesayamo. Aku madi'mo daagi' mombabali'i tanga-an-Ku, ka' memang ku hukumo na aha.

³ I sinaa aijo' iwi-iwi na nyanyian i laigan nu tomundo tinimbalimo haang. Iyaya mae nososalonganmo na to maya-mayat anu ingalinmo madi' kino hengge-hengge'.”

Israel i hukumo

⁴ Potombihing mae o belemiu anu nongkabisa'imo mian anu kasiasi i lipu' aiya sahingga aha i hansunmo.

⁵ Belemiu notatae i posi butong nu belemiu, “Ibe na kinopinnyo na sinaa mombau lamean. Ku kahanda'i da lia-lia' opobaluk na gandumto, panyo lamean aijo' madi' sampa lapas. Hipian na sinaa nu Sabat lapasmo, da kita kahanda' mobaluk mule'? Kita mongka'ima'i mobaluk mompake jalan anu madi' ma'ima', ka' mongakali nu takalan ka' mongakali nu timbangan.

⁶ Gandum anu ma'idekmo timbali opobalukto tiba olinyo matangkas. Kita molio mian anu kasiasi anu madi' moko bayan samaya'nyo maumo samaya'nyo ola sumo oli nu sapa na sapatu, ka' kita mongoli ia da timbali posaihonto.”

⁷ Tumpu, bansa nu Israel, binasumpa'mo “Aku totu-totu'u madi' mongkolilimi kalakuan nu aha anu ma'idek.

⁸ Dunia langkakatanmo ka' iwi-iwi' na mian susa'mo na kinyonyoa. Songko-songko na lipu' tolohunjongmo ka' madi'mo daagi' tenda susumo Kaunyo nu Nil.

⁹ De tokamo na tempo'nyo. Ku bauje na batu nu sinaa sonsu-sonsu'un ia makakinsapmo ka' dunia timbalimo pikat padahan sonsu'un na sinaa. Aku na Tumpu Anu Matangkas na Kuasanyo anu notataemo.

¹⁰ Iwi-iwi' na lamean nu belemiu Ku bali'i timbali mohangi anu silaka, ka' nyanyian nu belemiu timbalimo montando'i. Ku bauje na belemiu mongkiis bulu nu ubakum ka' mompake hude kalung pontandai molibosmo. Belemiu timbalimo susumo tina tuuma anu mohangi anaknyo anu sa'a-sa'angu'nyo sinilakamo. Sinaa aijo' kapupusannyo talalo hondo mompopolibos.”

¹¹ Tumpu Anu matangkas na Kuasanyo notatae, “Tokaje na tempo'nyo Ku potokaje mae na balaa' ka'ohopan i lipu' aiya. Mian mo'ohop panyo misa' ohop nu anu okaan. Mian anu megot, panyo misa' megot nu uee. Aha mo'ohop ka' megot nu potuunon-Ku.

¹² Mian mambamo iyaya mae lengkat pe'e i utara mokaiyong i selatan, ka' lengkat i kabete'an mokiijo' i kinsoban da mohumpak potuunon-Ku, panyo aha madi' nompahakabot.

¹³ I sinaa aijo' anu o oli-olitau ka' anu daagi langkoyang anu madi' ko panyakitnyo tolubukmo saba' i negotmo.

¹⁴ To mia-mian anu basumpa' tiba sanggo nu pilogot Samaria ka' notatae, ‘Tiba sanggo nu pilogot bansa Dan’, kabai ‘Tiba sanggo nu Pilogot Bersyeba’ – tombahangkangmo ka' madi'mo daagi' mobula.”