AMOS 7 - KITAB NU TUMPU ALLA LELE MA'IMAI'

ANU TINOA NA HUKUMAN LENGKAT MAE HI TUMPU Kihi-kihi'

¹ Aku nontoa lengkat mae hi Tumpu Anu Matangkas na Kuasanyo. Aku nontoa Ia nompojadi sa'angu' na pahasannyo na kihi-kihi' tempo'nyo aitu mian sala'je noko ala hemput anu obee' hi tomundo, ka' hemput anu sala'je mulai tumuu' mule'.

² Kihi-kihi' haha aijo' boli' nongkaanmo iwi-iwi' na anu sinu'an i tano'. Lantas aku notatae, “Tumpu Anu Matangkas na Kuasanyo, ampuniakon na mian anu palesayamo hi Belento Aha talalo ise' ka' lupe, mosia na timbali aha moko ala montahan?”

³ Tumpu nombabali'imo tanga'an-Nyo ka' notatae, “Anu tinoa nu beleyum aijo' madi'mo daagi' jadi.”

Apu

⁴ Aku nontoa mule' lengkat mae hi Tumpu Anu Matangkas na Kuasanyo. Tinoangku Ia hau-haunyo mosadiamo da mohukumo nu apu mian anu palesayamo hi Ia. Apu aijo' nolele nontisimo ndalangon i dunia aiya ka' lewa'mo nontoyo'i ale'.

⁵ Aku notatae, “O Tumpu Anu Matangkas na Kuasanyo, pateimo kaase' na apu aijo'! Mian anu palesayamo hi Belento! Talalo ise' ka' lupe, mosia na timbali moko ala montahan?”

⁶ Tumpu nombabali'imo tanga'an-Nyo ka' motatae, “aiya mule' madi' ahi' timbali.”

Kahohon anu bau pombantuantingi

⁷ Aku nontoa mule' sangga'at anu lengkat mae hi Tumpu. Tinoangku Ia tinuminjo i sohipi' nu pagan mesen anu binau nonggunakon kahohon na pinotinjo hodi-hodi. I lima-Nyo Ia nontoongi kahohon bau pongukun aijo' da pontoan pa' pagan aijo' hodi' na tinjonyo kabai madi'.

⁸ Ia nompokilawamo hi belengku, “Beleyum nontoa apaa Amos?” Tinamaan-Ku, “Kahohon na pinotinjo hodi-hodi Tumpu.” Lantas Tumpu notatae, “Aku nompake kahohon bau pongukun aiya da bau ponsumbu'an saba' mian-Ku anu palesayamo sumomo pagan mesen anu madi' hodi'. Aku madi'mo daagi' mombabali'i tanga'an Ku, Aku memang mohukumo aha.

⁹ Iwi-iwi' na tampat anu pinake nu tulunan i Ishak binau pogalejaan ohansunimo. Iwi-iwi' na tampat anu susi' nu mian Israel oideimo. Kuhopu'imo na tulunan i Tomundo Yerobeam.”

I Amos tiba i Amazia

¹⁰ I Amazia, imam nu Betel, nompakatumo lapulan aiya hi Yerobeam tomundo nu Israel, “I Amos nosa'angu'mo tiba mian da'isan da mongewamo belento Tomundo. Potataenyo anu monsale'i mian da'isan monsabapimo lipu' aiya da hansun.

¹¹ Ia notatae i Tomundo silakamo i uno nu pahampatean ka' mian nu Israel memang oboamo ka' opojoongmo i sa'angu' na tampat majo'on i lipu' nu aha.”

¹² Lantas i Amazia notataemo hi Amos, “O nabi, pinsusule'mo i Yehuda! Balahotbamo ikiijo' mae. Nu bee'ije nu aha anu okaan na beleyum!

¹³ Bolimo daagi' balahotba i Betel. Kota' aiya ola samata-mata bau tampat nu tomundo' ka' tampat pogalejaan nu mian da'isan.”

¹⁴ I Amos nontaami, “Aku misa' nabi kalana pangkat. Sabenannyo aku ola mongkalesang potu'on ka' montipui bua'nyo nu ara.

¹⁵ Panyo Tumpu nongalamo aku i uno nu pakalaja'anku ka' nonsai aku mompotokakon potuunon-Nyo hi mian nu Israel.

¹⁶ Kalana aijo' potombihing pe'e apaa na anu tinaloakonmo nu Tumpu hi belemiu. Kalana beleyum montewa' aku balahotba mompisala'i bansa Israel.

¹⁷ Tumpu notatae tukoo-Nyo bengkele' nu beleyum tinimbalimo mian masala' i jala-jalan nu kota' ka' to ana-anak nu beleyum opateimo i pahampatean. Tano' nu beleyum obagi-bagimo hi mian sangga'at, ka' suele beleyum silakamo ilipu' anu madi' palesaya hi Tumpu. Mian aha i Israel memang oboamo ka' opojoongmo i sa'angu' na tampat, majo'on ilipu' nu aha.”