AMOS 5 - KITAB NU TUMPU ALLA LELE MA'IMAI'

Ilaga da balatobatmo

¹ Potombihing mae mian nu Israel! Aku kahanda'mo monyanyiakon hi belemiu sa'angu' na nyanyian de ko anu silaka:

² Notua'mo na Israel anu sala'je lumangkoyang, ia madi'mo daagi' moko pobula! I posi tano'nyo ia pinojohokmo, madi' ko anu nontulungi ia da tuminjo.

³ Tumpu Anu Matangkas na Kuasanyo notatae, “Sa'angu' na kota' aijo' i Israel nompalentah samadala na suludadu, panyo anu ninsusule' mae memo sa'atu; kota' sangga'at nompalentah sa'atu na mian anu ninsusule' mae memo sampulu'.”

⁴ Tumpu notatae hi mian nu Israel, “Pinsusule'mo mae hi beleng-Ku, da belemiu timbali tumuu'.

⁵ Boli mamba mokiijo' i Bersyeba da mogaleja. Boli molio Aku kiijo' i Betel, kalana Betel saidi madi'mo. Boli suele mamba mokiijo' i Gilgal, kalana anu jojoong i kota' aijo' oboamo i tampat pompojoongan.”

⁶ Pinsusule'mo mae hi Tumpu, da belemiu timbali tumuu'. De belemiu madi' minsusule' hi Ia, Ia tokamo mae susumo apu anu molele ka' mompapui mian nu Israel iwi-iwi'. I Betel madi' ko samian pe'e na moko ala mompatei apu aijo'.

⁷ Silakamo na belemiu anu mombali-balikakon ka'adinan ka' mongagoi hak nu mian!

⁸ Tumpu na nompotimbali to manda-mandala' aita' ilanga mandala' mian totolu' ka' mandala' mian da'isan. Ia nombabali'i pikat tinimbali na jingka ka' sinaa tinimbali pihi, uee lengkat mae i ambai binubusakon-Nyo i katano'an. Anu nombau iwi-iwi' aijo', sanggonyo aijo'mo Tumpu.

⁹ Ia nohopu'imo mian anu balakuasa ka' benteng nu aha.

¹⁰ Belemiu mongka'ideki mian anu molawan mian anu madi' koka'adinan ka anu motatae madi' tageo' i uno nu pomputusian palakala.

¹¹ Belemiu mongkabisa'i mian anu kasiasi ka' gandumnyo ingagoan nu belemiu. Kalana aijo' belemiu madi'mo daagi' jojoong i laigan nu belemiu anu toto ima-ima' atina' anu binaumo nu belemiu aijo. Belemiu madi'mo monginum anggur lengkat i ale' nu anggur anu sinu'ananmo nu belemiu.

¹² Sinumbu'kumo, talalo ahi' manjoo' na palabuatan nu belemiu anu ma'idek ka' talalo ahi' manjoo' na dosa' nu belemiu. Belemiu mongkabisa'i mian anu Tobas; belemiu montalima ponsogok ka' mompojohok mian anu kasiasi da obau madi' adin i pomputusian palakala.

¹³ Kalana kalakuan nu belemiu aijo', sahingga to mia-mian anu pande mongoa'i lebe ma'ima' ola momohokot i tempo' anu ma'idek susumo aijo'.

¹⁴ Mompagala mombau anu ma'ima' ka' boli mombau anu ma'idek da belemiu timbali tumuu'. Sahingga Tumpu Anu Daka' na Kuasanyo totu-totu'u jojoong hi belemiu susumo anu tinaloakonmo nu belemiu.

¹⁵ Ka'ideki na anu ma'idek, ka'ima'i na anu ma'ima' ka' otoongi na ka'adinan. Ugaat Tumpu mongkalibosimo tuha'nyo nu to mia-mian bansa Israel.

¹⁶ Tumpu Anu Daka' na Kuasanyo notatae, “I iwi-iwi na jalan nu kota' mian saja'mo humang ka' lewa'mo molibos. Ka' anu topo ale' i lagamo da montando'i tiba to mia-mian anu tinamboan da montando'i mian anu silakamo.

¹⁷ I iwi-iwi na ale' nu anggur, mian singkapmo tinumando' kalana Aku Tokamo mae mohukum belemiu. Aku na Tumpu anu notataemo.”

¹⁸ Totu-totu'u silakamo na belemiu, anu saja' monginau' sinaa nu Tumpu! Apaa na gunanyo sinaa aijo' hi belemiu? Sinaa aijo' ola susumo sinaa anu pikat, misa' sinaa anu manjingka hi belemiu.

¹⁹ Ka'ada'annyo sumo mian anu mompalaiakon butong da madi' singkabot singa panyo mompahakabotmo ahi' tiba beruang. Kabai susumo mian ninsusule'mo i laigan limanyo nintoong i pagan mesen, lantas sina'umo nu ulo!

²⁰ Sinaa nu Tumpu memang mompotoka mae pikat hondomi', misa' majingka sinaa anu madi' masingit ka' madi' ko batu nu sinaa.

²¹ Tumpu notatae, “Ku ka'ideki ka' to'uamo na montoa belemiu molame-lame'akon agama nu belemiu!

²² De belemiu momboa koloban anu otunui ka' koloban gandum, Aku madi' montalima. Aku madi' montalima to bina-binatang anu toto lompo-lompo' aijo' anu osombahkon nu belemiu hi belengku. Susumo koloban mompodame.

²³ Bolimo manyanyi nyanyian nu belemiu anu momposiing bihing aijo', Aku madi' mohongo pahaik kasapi nu belemiu.

²⁴ Lebe ma'ima' bala usaha da ka'adinan mo ili susumo uee ka' kahondoan susumo kaunyo anu madi' toho' mo'oti.

²⁵ O mian nu Israel, tempo'nyo Aku nomboa belemiu notulu i padang anu mateges patompulu' na taun na kinopinnyo, Aku madi' momoita anu osombahkon ka' koloban nu belemiu.

²⁶ Panyo uuka aiya belemiu ola monsombah i Sakut anu osumbu' nu belemiu, tomundo nu belemiu aijo' ka' i Kewan, binatang anu osombah nu belemiu. Kalana aijo' to pato-patong anu naipuan mae binaumo nu belemiu tionyo ahi' oboa nu belemiu.

²⁷ De Aku momboamo belemiu mokiijo' i sa'angu' na lipu' anu lebe majo'on lengkat i Damsyik. Aku na Tumpu anu sanggonyo Tumpu Allah Anu Matangkas na Kuasanyo notataemo.”