AMOS 4 - KITAB NU TUMPU ALLA LELE MA'IMAI'

¹ Potombihing mae to bou-boune nu Samaria anu nompaka polompo'mo susumo to sapi-sapi' anu molompo' kiijo' i Basan! Belemiu mongkabisa'i mian anu madi'moko ala, lewa' mompakisa mongala anu nu mian kakiasi, ka' mompa kisa mo'ane nu belemiu da saja' momposadiakon inumon anu moko palangu hi belemiu!

² Aku na Tumpu Anu Matangkas na Kuasanyo, ka' Tumpu anu susi' Aku binajanji'mo saba' belemiu nu konamo nu peka; belemiu iwi-iwi' sumomo ikan anu kinaitmo nu peka.

³ Belemiu opakisamo oboa mokiijo' i sasu Hermon, ka' olumbu'akon i sambiha'nyo, toto samian montului loang nu pagan mesen anu ohani. Aku na Tumpu anu notataemo.”

Israel madi' mongka'oho' mohongo

⁴ Tumpu Anu Matangkas na Kuasanyo na notatae! “O mian nu Israel! Lako'mo i tampat pogalejaan i Betel, ka' pombau mae dosa' ikiijo'! Lako'mo mokiijo' i Gilgal, ka' pombaumo dosa' yayamo na kasanangan nu kinyonyoa nubelemiu! Lako'mo monsombahkon koloban de subu-subumo ka' momboa mae anu obagi sampulu', sambahagian na o'ala anu ohumpak toto tolun sinaa!

⁵ Lako'mo monsombahkon roti salaku pompoita talima kase hi beleng-Ku ka' lako'mo sisik hi mian saba' belemiu nompaka tuangimo anu osombahkon! Tantu aijo'mo na anu oka'i ma'i nu bau nu belemiu!

⁶ Akumo na anu mombee'i balaa' ka ohopan hi belemiu iwi-iwi' na kota' nubelemiu, panyo belemiu madi' po'ule' minsusule' mae hi beleng-Ku.

⁷ Pinoliwa'-Kumo na tudun mae na ujan salatan anu osu'an nu belemiu talalomo hondo palalu i uee. Ku tudunakon mae na ujan i sa'angu' na kota', ka' madi' mokiijo' i kota' sangga'at. Ale' sa'angu' nutului nu ujan, sadangkan ale' sa'angu' mule' manggas madi' ko uee-ueenyo.

⁸ To pia-piangkuka na kota', miannyo anu jojoong i lundengmo nu megot, aha molio uee i kota' sangga'at, panyo uee ikiijo' madi' sukup. Maumo sumo aijo', belemiu madi' ahi' minsusule' mae hi beleng-Ku.

⁹ Ku puhakon mae na mombun mapanas ka' Ku pakatui panyakit anu mongidei anu sinu'an, ka' ale' nu anggur nu belemiu. To kau-kau' ara ka' to kau-kau' zaitun nu belemiu ningkotmo na kinaan nu kihi-kihi'. Maumo sumo aijo' belemiu madi' ahi' minsusule' mae hi beleng-Ku.

¹⁰ Ku pakatuimo panyakit anu molele hi belemiu susumo anu pinakatung-Ku nokiijo' i Mesir. To oli-olitau ka' to lalangkoyang nu belemiu pinatean-Kumo i pahampatean, ka' to aja-ajahan nu belemiu ingagoanmo. Inguna'an-Ku mo na kemah nu belemiu – tiba to maya-mayat anu nabusikmo nonsongutmo suung. Maumo sumo aijo' belemiu madi' ahi' minsusule' mae hi beleng-Ku.

¹¹ Sambahagian na belemiu ihansunan-Kumo susumo Aku nohansunimo Sodom tiba Gomora. Anu daagi' tinumuu' na belemiu me susumo lo'uton anu ingala mae aijo' i apu. Maumo sumo aijo' belemiu madi' ahi' daagi' minsusule' mae hi beleng-Ku.

¹² Kalana aijo', omian-Ku Israel anu palesayamo, Ku hukumo na belemiu. Jadi posadiamo na mongahopi hukuman anu Ku bee' hi belemiu!”

¹³ Bungkutnyo ka' mombun, Tumpu na nompotimbali; tanga'an-Nyo pinotoa-Nyomo hi manusia. Binau-Nyomo na sinaa tiba pihi; i buannyo nu dunia, na Ia i lumajangmo. Tumpu Anu Daka' Na Kuasanyo aijo'mo na sanggo-Nyo.