AMOS 2 - KITAB NU TUMPU ALLA LELE MA'IMAI'

Moab

¹ Tumpu notatae, “Mian anu jojoong i Moab saja'mo nombau dosa' pa' pimpianmo, kalana aijo' Aku tionyo mohukumo aha. Aha mompopo ambangmo Tomundo nu Edom anu sinilakamo aijo' ka' nongkekemo kubulannyo ka' nongalamo to buku-bukunyo ka' pinapuannyomo tinimbali abu'.

² Kalana aijo' Aku nombee'imo apu nokiijo' i lipu' nu Moab ka' nompapuimo to bente-benteng nu Keriot. Mian nu Moab silakamo i totonga' nu kahengge'an nu pahampatean, hau-haunyo tolompet opo'onyi'mo ka' loboo' nu pahampatean ingaisakonmo.

³ Anu mongkuasai Moab ka' iwi-iwi' na pagawe nu pamalentahnyo Ku pateimo.”

Yehuda

⁴ Tumpu notatae, “Mian nu Yehuda saja'mo nombau dosa' pa' pimpianmo, kalana aijo' Aku tionyo mohukumo aha. Aha madi'mo nombatuki to pale-palentah-ngKu ka madi'mo nohongo-hongo to aja-ajalan-Ku. Aha sinala'anmo nu to tomi-tominuat sangga'at anu nusombah nu mompolee' nu aha.

⁵ Kalana aijo', Aku mombee'imo apu mokiijo' i Yehuda ka' mompapuimo to bente-benteng nu Yerusalem.”

Tumpu nohukumo Israel

⁶ Tumpu notatae, “Mian nu Israel saja'mo nombau dosa' pa' pimpianmo, kalana aijo' Aku tionyo mohukumo aha. Mian anu madi' tageo' na kinyonyoanyo madi'mo moko sule'akon anu sinabonnyo, pinobaluk nu aha tinimbalimo bau botuan. Sumo aitumo mule' na kalakuan nu aha hi mian anu kasiasi anu madi'mo moko bayan samaya'nyo, pada han samaya' aijo' ola oli nu sa'angu' na pan na sapatu.

⁷ Aha mongkabisa'i mian anu madi'mo moko ala mombau apa-apaa ka' mola'mo mian anu kasiasi. Tuuma ka' anak mongkamale'imo posaihon boune; bounemo ai-aijo', sahingga mongideimo sanggong-Ku anu Susi'.

⁸ I tampat-tampat pogalejaan, mian haha aiyo' hoyot tiba baju' anu nu ala nu aha hi mian kasiasi pinombayan samaya'. I Laigan nu Tumpu, aha monginum anggur anu ingala hi mian anu ko samaya' hi aha.

⁹ Maumo sumo aijo', belemiu mian-Ku anu palesayamo, kalana belemiu sahingga Aku nohopu'imo mian nu Amori anu toto tangka'-tangkas susumo kau' cemara ka' mokuut susumo kau' terpentin.

¹⁰ Belemiu binoang-Kumo mae nosabat lengkat mae i Mesir ka' i laya'-Ku mae nontulu padang bone' anu ewa patompulu' na taun na Kinopinnyo. Tano' nu mian Amori binee'-Kumo hi belemiu da baumo lipu' nu belemiu.

¹¹ Pinile'an-Kumo to pia-piangkuka na anak nu belemiu da timbali nabi, ka' to pia-piangkuka na to oli-olitau nu belemiu tinimbali mian anu Iniatakonmo hi Tumpu. Te misa' aijo' na anu totu'u hei mian nu Israel? Aku, na Tumpu anu notataemo.

¹² Panyo belemiu mombee'i mian anu iniatakonmo hi Tumpu monginum anggur, sahingga mombau da aha madi'mo mongganapi jandi'. Ka' belemiu nontewa'moto nabi-nabi da bolimo momposampe potuunon-Ku.

¹³ Uuka aiya belemiu Ku nyonyomakon mo i tano' sahingga gananggahan susumo kareta anu talalomo maboat nu gandum na belemiu.

¹⁴ Anu talalo hondo malia' na mopadeka', madi'mo ko ala mopalai; anu mahoson madi'mo mahoson. Ka' mian anu baani madi'mo noko posi posalamat butongnyo.

¹⁵ Anu topo pana' madi'mo daagi' moko tahan anu, mopadeka' malia' madi'mo daagi' moko ala mompalaiakon butong ka' anu monsake'i ajahan madi'mo ko kaluputannyo.

¹⁶ I sinaa aijo' suludadu anu talalo baani, mompala'imo toongonnyo lantas mopadeka'mo. Aku na Tumpu anu notataemo.”