AMOS 1 - KITAB NU TUMPU ALLA LELE MA'IMAI'

¹ I Amos aijo' mian anu molaya' domba lengkat mae i kota' Tekoa. Ia tinimbali nabi tempo'nyo lipu' nu Yehuda pinalentahmo nu Tomundo Uzia, ka' Israel pinalentahmo nu Tomundo Yerobeam anak mo'ane i Yoahas. Ohua' na taun ma'isa pe'e jinadi na lulu', Tumpu momponyata'mo hi Amos hahan anu mongkona Israel.

² Aiyamo na anu tinaloakon i Amos, “Tumpu noloboo'imo aita' mae i Bungkutnyo nu Sion, potatae-Nyo pinodaka'mo lengkat mae i Yerusalem. To pada-padang hemput tinimbalimo napeges, hemput i Bungkutnyo nu Karmel i nagayoumo hondo.”

Hukuman nu Tumpu hi aha to nega-negara anu mompaha ohani Israel Siria

³ Tumpu notatae, “Mian anu jojoong i Damsyik saja'mo mombau dosa' kalana aijo', Aku totu-totu'u mohukumo aha. Aha nombaumo mian nu Gilead talalomo hondo masigo,

⁴ kalana aijo' Aku mombee'imo apu mokiijo' i laigan nu Tomundo Hazael ka' mompapuimo to bente-benteng nu Tomundo Benhadad.

⁵ To saba-sabatan daka' nu Damsyik Ku ideimo ka' mian anu jojoong i Hatanyo nu Awen Ku sapuimo iwi-iwi' i tampat anu jojoongan nu aha. Anu mongkuasai Bet-Eden, Ku tau'akonmo i suhangannyo, ka' mian anu jojoong i Siria ohakopmo ka' oboamo mamba i Kir.”

Filistin

⁶ Tumpu notatae, “Mian anu jojoong i Gaza saja'mo nombau dosa' pa' pimpianmo, kalana aijo', Aku tionyo mohukumo aha. Aha nomboamo sa'angu' na bansa ka' nompobalukmo da bau botuan hi mian nu Edom.

⁷ Kalana aijo' Aku mombee'imo apu mokiijo' i to paga-pagan mesen nu Gaza, ka' nompapuimo to bente-bentengnyo.

⁸ Mian anu jojoong ka' mongkuasai kota' Asdod ka' Askelon Ku alinimo. Kota' Ekron Ku hukumo ka' iwi-iwi' na tuha'nyo nu mian Filistin Ku hopu'imo.”

Tirus

⁹ Tumpu notatae, “Mian anu jojoong i Tirus saja'mo nombau dosa' pa' pimpianmo, kalana aijo', Aku tionyo mohukumo aha. Aha nomboamo sa'angu' na bansa, binoa i sa'angu' na tampat pinompojoongan, ka' nombee'mo hi Edom; aha madi'mo nohongo-hongo palajanjian nu posangaluan.

¹⁰ Kalana aijo' Aku mombee'imo apu mokiijo' i to paga-pagan mesen nu Tirus ka' nompapuimo to bente-bentengnyo.”

Edom

¹¹ Tumpu notatae, “Mian anu jojoong i Edom saja'mo nombau dosa' pa' pimpianmo, kalana aijo', Aku tionyo mohukumo aha. Madi'mo ko liibosnyo na aha nahampatemo tiba mian nu Israel, to utu-utus nu aha. Aha me saja' motambuha', ka' tataap mongka'ideki.

¹² Kalana aijo', Aku mombee'imo apu mokiijo' i kota' Teman, ka' nompapui to bente-bentengnyo nu Bozra.”

Amon

¹³ Tumpu notatae, “Bansa Amon saja'mo nombau dosa' pa' pimpianmo, kalana aijo', Aku tionyo mohukumo aha. Salatan nahampate da mompo ewa da'erahnyo, aha nombeheti'imo kompong nu to bou-boune anu i hempumo kiijo' i Gilead.

¹⁴ Kalana aijo', Aku nombee'imo apu i to paga-pagan mesen i kota' Raba ka' nompapui to bente-bentengnyo. Tempo'nyo aijo' ahamo na hengge nu pahampatean, ka' pahampatean aijo' sumomo antong.

¹⁵ Tomundo nu aha ka' to paga-pagawe nu pamalentahnyo oboamo i sa'angu' na tampat pompojoongan. Aku na Tumpu anu notataemo.”