SISIKON NU TO RASUL-RASUL 5 - KITAB NU TUMPU ALLA LELE MA'IMAI'

I Ananias ka' i Safira

¹ Panyo daagi' ko samian na mo'ane sanggonyo i Ananias. Ia tiba bengkele'nyo sanggonyo i Safira, suele nompobaluk santake na tano' anu nu aha.

² Doi nu anu pinompobaluknyo aijo' sambagian tinahannyo bau posi anunyo ka' sangga'atannyo na binee'nyo hi to rasul-rasul. Ia nombau aijo' pinosumbu'nyo hi bengkele'nyo.

³ Sahingga i Petrus notatae hi ia, “Ananias, kadaka' nu pojohok na Ibilis mongkuasai kinyonyoaum, sampe beleyum nombaleko'i Roh nu Tumpu, hoko-hokot nontahan posi anu nu butongum sambagian na doi oli nu tano' anu pinobaluk aijo'?

⁴ Tano' aijo' anu nu beleyum tempo'nyo, ma'isa pe'e pinobaluk nu beleyum. Ka' salatan tano' aijo' pinobalukmo doinyo mule' daagi' saja' anu nu beleyum. Jadi kadaka' daagi' ko makisut i uno nu kinyonyoaum mombau anu sumo aijo'? Misa' mian na nubaleko'i, panyo Tumpu!”

⁵ Salatan i Ananias nohongomo potatae aijo', ia notua' lantas natemo. Iwi-iwi' mian anu nohongo mongkona apaa na anu tinimbali aijo' i nabuhukmo.

⁶ Sahingga to mia-mian anu daagi' olitau tinoka nombaluni mayat i Ananias, lantas sinabatakonnyo da olamun na ia.

⁷ Lapas aijo' kila-kila tinotolu'mo na jam bengkele'nyo ninsoop. Ia madi' monsumbu' pa' apaa na anu sala'je tinimbali.

⁸ I Petrus notatae hi ia, “Soba poto'i mae hi belengku: Apaa tano' anu pinobalukmo nu beleyum ka' langkai'um, sumo aiyamo na konjoo' nu olinyo?” “Totu'u, atina'mo na olinyo,” tinaaman nu bengkele' i Ananias.

⁹ Lantas i Petrus notatae hi ia, “Kadaka' beleyum ka' langkai'um mosa'angu' monsobai Roh nu Tumpu? Hongo pe'e! To mia-mian anu nolamun langkai'um ninsusule'mo. Aha momboaje suele beleyum mosabat.”

¹⁰ Tempo'nyo aitu mule' bengkele' i Ananias notua' ka' i nate i ahop i Petrus. Ka' tempo'nyo to oli-olitau aitu ninsoop, aha nontoa ia natemo. Lantas sinabatakon nu aha na bengkele'nyo ka' i lamun nu aha i sohipi' nu langkai'nyo.

¹¹ Sahingga iwi-iwi' na to mia-mian aijo' ka' to mia-mian sangga'atannyo anu nohongo mongkona apaa na anu tinimbali aijo', i nabuhukmo.

Hahan anu okabangangi, anu ma'isa toho' tinimbali

¹² Kalana pakalaja'an nu to rasul-rasul ka' hahan anu ma'isa toho' tinimbali i totonga' nu mian da'isan. Iwi-iwi' na mian anu pinalesayamo sinihuk i Lambing i Salomo i Laigan nu Tumpu.

¹³ Ka' mian anu i sambiha'nyo madi' ko anu baani toka sihuk tiba to mia-mian anu palesayamo aijo'. Panyo to mia-mian anu palesayamo aijo' o'adati hondo nu mian da'isan.

¹⁴ Ka' lebe pin lebe mintuang da'isan na to mia-mian palesaya hi Tumpu – to momo'ane sumo aitu mule' to bouboune.

¹⁵ Hahan anu tinimbalimo saja'mo nompaka timbali, sahingga to mia-mian masakit pinomale' i tampat kamale'an kabai i ampas, lantas binoa nokiijo' i jalan, da aha mau ola nukona nu lolung i Petrus, de i Petrus motulu i kiijo'.

¹⁶ Mojonjulu na to mia-mian toka lengkat mae i kota-kota anu ohani i Yerusalem. Aha momboa to mia-mian masakit ka' anu pininsoopanmo nu to roh-roh ma'idek. Ka' to mia-mian haha aijo' pina'alinmo iwi-iwi'.

To Rasul-rasul sinakisamo

¹⁷ Ahennyo imam daka' ka' iwi-iwi' na anu saja' mombatuki ia, aitumo to mia-mian anu minsoop i posa'angu'an nu Saduki, nontampu'unimo mombau anu ma'idek, kalana kinyonyoa nu aha madi'mo sinanang.

¹⁸ To rasul-rasul haha aijo' i hakop ka' pinosoopmo i uno nu pontalungku'an mian da'isan.

¹⁹ Panyo pihi-pihi, samian na malaikat nu Tumpu nombuka'i iwi-iwi' na tumban nu talungku', lantas nomboa to rasul-rasul aijo' nosabat. Malaikat aijo' notatae hi to rasul-rasul haha aijo',

²⁰ “Lako'mo tinjo i Laigan nu Tumpu ka' poto'i hi to mia-mian mongkona kantumuu'an bu'ou aiya.”

²¹ Sahingga to rasul-rasul aijo' nombatukimo potuunon nu Malaikat aijo'. Daagi' subu-subu hondo aha nambamo nokiijo' i Laigan nu Tumpu ka' mulai nongajan i kiijo'. Hau-haunyo aitu imam daka' ka' anu saja' mombatuki ia tinokamo, lantas nombaumo putusan na Mian Kopian Daka' nu Agama tiba to pola-polaya' nu Yahudi. Lapas aijo' aha nonsaimo mian mamba mongala to rasul-rasul aijo' i uno nu talungku' da oboa mangadap hi aha.

²² Panyo salatan to mia-mian haha aijo' anu sinai, tinokamo i talungku' aha madi'mo nontokai to rasul-rasul haha aijo' i kiijo' mae. Jadi aha ninsusule'mo, lantas nompoto'i han aijo' hi Mian Kopian Daka' nu Agama.

²³ “Tempo'nyo aitu kami tinoka i talungku',” koonyo nu aha hi mian kopian, “tinokan mami pontumban nu talungku' aijo' kinunsing ima-ima', ka' to sulu-suludadu hau-haunyo monjagai kiijo' i pontumban. Panyo tempo'nyo kami nombuka' pontumban aijo', kami madi' nontoa mau pe'e samian kiijo' i unonyo.”

²⁴ Salatan to sulu-suludadu anu monjagai Laigan nu Tumpu ka' to kapa-kapala nu imam nohongo potatae aijo', aha biningungmo mongkona to rasul-rasul haha aijo', ka' nabuhukmo pa' apaa na anu timbali.

²⁵ Lapas aitu tinoka na samian na mo'ane nomboa mae lele aijo', “Hongo! To mia-mian anu pinosoop nu Tuan-tuan i talungku' aijo', uuka aiya hau-haunyo mongajan mian da'isan i Laigan nu Tumpu!”

²⁶ Jadi suludadu anu monjagai Laigan nu Tumpu aijo' tiba to sanga-sangalunyo namba po'ule' nongala to rasul-rasul haha aijo'. Panyo aha madi' nontambuha'i, sabab aha mabuhuk hi mian da'isan; dumo saidi' mae mian da'isan aijo' mompahambunu'akon aha nu batu.

²⁷ To rasul-rasul haha aijo' binoa ninsoop mangadap hi Mian Kopian Daka' nu Agama. Lantas imam daka' nompalesa aha.

²⁸ Ia notatae, “Tinewa'mo mami na komiu, da bolimo hondo-hondo mongajan mongkona Mian aijo'. Panyo uuka soba toa pa' apaa na anu binaumo nu belemiu! Komiu nompolelemo pangajalan miu aijo' i songko-songko na Yerusalem, ka' komiu ola mule' monsangka saba' kamimo na anu nonsaduakon kinapatean nu Mian aijo'.”

²⁹ I Petrus ka' to rasul-rasul sangga'atannyo nontaami, “Kami tionyo mombatuki Tumpu, misa' mombatuki mian.

³⁰ I Yesus anu sinalibmo miu, po'ule'mo pinotumuu' nu Tumpu Allah i kapateannyo, aijo'mo Tumpu nu mompolee'to.

³¹ Ka' Tumpu nombee'mo hi Ia kapalentahan ka' kakuasa'an anu matangkas sumo Polaya' ka' Pomposalamat; da bansa Israel obee'i tempo' da balatobat bolimo mombau to dosa-dosa'nyo ka' mohumpak'je ka'ampunan.

³² Kamimo na to saki-sakisi mongkona iwi-iwi' aijo' – kami ka' suele Roh nu Tumpu anu binee'mo nu Tumpu hi to mia-mian anu mombatuki palentah-Nyo.”

³³ Salatan to sanga-sangalunyo nu Mian Kopian Daka' nu Agama nohongomo aijo', aha pinusamo hondo ka' aha nosa'angu'mo na tanga'an da mompateimo to rasul-rasul haha aijo'.

³⁴ Panyo anu kiijo' i sangalu nu Mian Kopian Daka' nu Agama aijo' daagi' ko samian na mian nu Farisi sanggonyo i Gamaliel. Ia gulu' agama anu otabea'i hondo nu iwi-iwi' na mian. Ia tinuminjo lantas nonsai momboa monsabatakon to rasul-rasul haha aijo' sasaingoni'.

³⁵ Lapas aitu ia notatae hi Mian Kopian Daka' nu Agama aijo', “To Utu-utus mian Israel! Tutugi ima-ima' mongkona apaa na anu obau nu to Utu-utus hi to mia-mian haha aiya.

³⁶ Kalana u'utu mae toho' i lubat na i Teudas, anu monsangka butongnyo mian daka', sahingga kila-kila pato atu na mian nombatuki ia. Panyo ia pinatean ka' iwi-iwi' na anu nombatukimo ia nosubalimo ka' anu ingusahakonnyo pe'e madi'mo ko anu pinia.

³⁷ Lapas aitu tinokamo na tempo' pontulisan sanggo da o bilang, i lubat mule' na i Yudas, mian anu lengkat mae i Galilea. Kalana kapandeannyo, manjoo' suele na mian anu nombatukimo ia. Panyo ia suele pinatean ka' iwi-iwi' na anu nombatuki ia nosubalimo.

³⁸ Jadi hahan anu timbali aiya, pokinde'ku sumo uuka: bolimo mombau apa-apaa hi mian haha aiya, pojohokmo na aha. Kalana de pangajalan ka' usaha nu aha aiya lengkat hi mian, saba' pangajalan ka' usaha aijo' saidi' mae madi' motuus.

³⁹ Panyo de aijo' nolengkat mae hi Tumpu, tantu to Utu-utus madi' moko ala mohungku'i aha. Panyo ola ahi' ugaat to Utu-utus na madi' mohongo-hongo Tumpu.” Pokinde' i Gamaliel aitu tinalima nu Mian Kopian Daka' nu Agama.

⁴⁰ Sahingga to rasul-rasul aijo' i laga, lantas pinohos, lapas aijo' pinoliwa'mo na mongajan mule' mongkona i Yesus. Lapas aitu, i lapasakonmo na aha.

⁴¹ To rasul-rasul haha aijo' nompala'imo Mian Kopian Daka' nu Agama ka' ilame'mo kalana Tumpu nonganggapmo aha patut mohumpak potatae anu ma'idek kalana i Yesus.

⁴² Ka' sansina-sinaa i Laigan nu Tumpu ka' i to lai-laigan nu mian mongajan ka' mompolele Lele Ma'ima' mongkona i Yesus tukoonyo nu aha Iamo na Tomundo anu Momposalamat anu jina-jinanji'mo aijo'.