SISIKON NU TO RASUL-RASUL 4 - KITAB NU TUMPU ALLA LELE MA'IMAI'

I Petrus ka' i Yohanes i ahop hi Mian Kopian nu Agama

¹ Hau-haunyo i Petrus ka' i Yohanes daagi' motatae tiba to mia-mian aijo', to kapa-kapala nu imam ka' kamundan anu monjagai Laigan nu Tumpu tiba to mia-mian nu Saduki tinokamo hi Petrus ka' hi Yohanes.

² Aha notambuha' sabab i Petrus ka' i Yohanes nontaloakon hi to mia-mian tukoonyo i Yesus po'ule'mo tinumuu' lengkat i kapatean-Nyo. Ka' aijo' momponyata' saba' mian mate po'ule' tumuu'.

³ Sahingga aha nohakop ua-ua'aha na rasul aijo' ka' pinosoopnyo i uno nu talungku'. Ka' kalana pinihimo i Petrus ka' i Yohanes tinahanmo i kiijo' tinoka dodododopnyo.

⁴ Panyo to mia-mian anu nohongomo ajalan nu to rasul-rasul aijo', manjoo'mo na anu pinalesaya. Sahingga konjoo' nu aha nintuangmo sampe tinimbalimo kila-kila olima' na madala na mian.

⁵ Dodododopnyo to tu'a-tu'anyo nu Mian Kopian nu Agama, to pola-polaya' nu Yahudi ka' to gulu-gulu' agama binala gombumo i Yerusalem.

⁶ Aha nompahakabotmo tiba Imam Daka' i Hanas, ka' i Kayafas, i Yohanes, i Aleksander, ka' iwi-iwi' na mian anu minsoop sampoto utusan nu imam daka' aijo'.

⁷ I Petrus ka' i Yohanes binoa mangadap hi aha lantas aha nompokilawamo, “Mosia na bau-baunyo komiu nompa'alin mian kapi' aijo'? Kahosonan nu apaa kabai kakuasa'an lengkat mae hi he na komiu nombau aijo'?”

⁸ I Petrus anu kinuasanmo nu Roh nu Tumpu, nontaami, “To Tutuuma polaya' bansa ka' to Tutuuma mian kopian!

⁹ Kami opalesa sinaa uuka, kalana nombau anu ma'ima' nontulungi samian anu kapi' ka' kalana to Tutuuma mongka'oho' monsumbu' mosia na mian aijo' pina'alin.

¹⁰ Jadi, to Tutuuma iwi-iwi' tionyo monsumbu' ka' iwi-iwi' bansa Israel tionyo monsumbu' saba' mian aiya tuminjo uuka aiya tiba butong anu sehat i ahop nu to Tutuuma, kalana kahosonan ka' kakuasa'an lengkat mae hi Yesus Kristus mian nu Nazaret aijo'. To Tutuuma nonsalibmo i Yesus aijo', panyo Tumpu po'ule' nompotumuu' Ia.

¹¹ I Yesus aiyamo na anu nupatujui nu ayat aiya i uno nu Kitab nu Tumpu, ‘Batu anu madi' opake nu komiu to tuka-tukang anu topo bau laigan, padahan tinimbalimo batu anu penting.’

¹² Ola ahi' kalana i Yesus mian oposalamat. Kalana i songko-songko nu dunia i totonga' nu mian madi' ko samian pe'e na anu nohumpakmo kakuasa'an lengkat mae hi Tumpu da momposalamat kita.”

¹³ To mia-mian anu Mongulus Palakala aijo' binangang na montoa kabaanian i Petrus ka' i Yohanes, apaa mule' nusumbu' nu aha saba' ua'aha na rasul aijo' to mia-mian biasa anu madi' ko sikolahnyo. Lantas aha sininsumbu' saba' ua'aha na rasul aijo' to mia-mian anu nombatuki Yesus.

¹⁴ Panyo aha madi' noko potatae apa-apaa, kalana mian anu pina'alinmo daagi' kiijo' tinjo-tinjo i ahop nu aha hingga-hinggat tiba i Petrus ka' i Yohanes.

¹⁵ Sahingga aha nonsai ua-ua'aha na rasul aijo' mosabat lengkat i uno nu Pongulusan Palakala, lapas aijo' aha nombisalakonmo.

¹⁶ Aha notatae, “Apaa na anu tionyo obaunto hi to mia-mian aiya? Iwi-iwi' anu jojoong i Yerusalem nonsumbu'mo, saba' anu talalo hondo okabangangi aijo', binau nu aha ohua'. Kita madi' moko ala mombahakon aijo'.

¹⁷ Panyo da han aiya boli talalo togilele ka' lebe motala mule' i totonga' nu to mia-mian, imbo' da opopobuhukto na ua-ua'aha, da aha madi'mo timbali motatae hi samian pe'e mompake sanggo i Yesus.”

¹⁸ Sahingga i laga nu aha na ua-ua'aha na rasul aijo' po'ule' ninsoop, ka' nompoto'i tukoonyo nu aha madi'mo timbali monsanggo kabai mongajan tiba sanggo i Yesus.

¹⁹ Panyo i Petrus ka' i Yohanes nontaami, “Posi tutugimo apaa na anu totu'u i ahop nu Tumpu: mombatuki palentah nu to Tutuuma kabai mombatuki palentah nu Tumpu.

²⁰ Kalana kami madi' timbali belenti na motatae mongkona apaa na anu tinoamo mami ka' pinosi hongo.”

²¹ To mia-mian anu Mongulus Palakala aijo' madi' noko humpak sa'angu' pe'e na alasan da mohukum i Petrus ka' i Yohanes. Jadi aha nompopobuhukmo ua-ua'aha na rasul aijo', lantas pinolapasmo ua-ua'aha kalana iwi-iwi' na mian mompuji-puji' Tumpu kalana apaa na anu tinimbalimo aijo'.

²² Mian anu nongoa'i na'alinmo, anu okabangangi aijo', umunnyo labimo patom pulu' na taun.

To mia-mian palesaya nompoita kabaanian anu lengkat mae hi Tumpu

²³ Salatan i Petrus ka' i Yohanes pinobebasmo, aha ninsusule'mo hi to sanga-sangalu nu aha ka' nonsisik iwi-iwi' anu tinaloakonmo nu to kapa-kapala nu imam ka' to pola-polaya' nu Yahudi hi aha.

²⁴ Salatan i hongo nu to sanga-sangalu nu aha aijo', aha hingga-hinggat nomposa'angu'mo kinyonyoa binalado'a hi Tumpu. Aha notatae, “Tumpu, Kitamo na nompotimbali langit ka' tano', ambai ka' iwi-iwi' na isinyo.

²⁵ Tiba Roh nu Kita, toho'mo notatae hi mompolee' kami, i Daud, aijo'mo na Posaihon-To; Kita notatae, ‘Kadaka' to mia-mian anu madi' monsumbu' Tumpu, motambuha'; kadaka' to bansa-bansa mombaumo tanga' anu madi' ko gunanyo?

²⁶ To Tomu-tomundo nu dunia mosadiamo da mahampatemo, ka' to pola-polaya' mosa'angu'mo mongewa Tumpu ka' Tomundo anu Momposalamat.’

²⁷ Kalana memang i Herodes ka' i Pontius Pilatus nombaumo posa'angu'an nu tanga'an tiba to mia-mian anu madi' monsumbu' Tumpu ka' tiba to mia-mian nu Israel i kota aiya. Aha singkabot da mongewa i Yesus Posaihon-To anu Susi' aijo', anu i hangkatmo nu Kita timbali Tomundo anu Momposalamat.

²⁸ Aha nosa'angu' da mombau apa-apaa, anu tinantukanmo nu Kita momonanyo saba' aijo' tionyo timbali. Ka' Kita montantukanmo aijo' nu kakuasa'an ka' posi Pongka'oho'-To.

²⁹ Uuka aiya, Tumpu, toamo mosia na aha kahanda'mo monsilakai kami. Ka' poloasmo na kami, to posa-posaihon-To aiya, mompolele lele anu lengkat mae hi Kita ka' madi' mabuhuk.

³⁰ Otulungiakon-To mae da mian masakit opa'alin ka' anu okabangangi ka' hahan anu madi' toho' opia timbali kalana kakuasa'an ka' kahosonan anu nolengkat mae hi Yesus, Posaihon-To anu Susi' aijo'.”

³¹ Ilapas na aha binalado'a, tampat sinihukan nu aha aijo' tinolohenggomo. Aha iwi-iwi' kinuasanmo nu Roh nu Tumpu ka' mulaimo binaani hondo na notatae mongkona lele lengkat mae hi Tumpu.

Iwi-iwi' nu pake nu aha sama-sama

³² Iwi-iwi' mian anu palesaya aijo', tumuu' sa'a-sa'angu' na kinyonyoa ka' sa'a-sa'angu' na pikilan. Madi' ko samian pe'e lengkat hi aha na montaloakon tukoonyo apa-apaa na anunyo atina' posi anunyomo. Iwi-iwi' na anu daagi' hi aha nu pake nu aha sama-sama.

³³ Tiba kuasa anu daka', to rasul-rasul aijo' mombee'i katalangan saba' i Yesus po'ule'mo tinumuu'. Sahingga Tumpu talalomo nombalakati aha.

³⁴ Ka' madi' ko samian pe'e aijo' hi aha na anu kamadi'an apa-apaa. Kalana aha anu ko tano' kabai laigan, nompobalukmo tano' kabai laigan nu aha aijo'; lantas doi oli nu anu pinobalukmo aijo' binoa nu aha,

³⁵ ka' binee' nu aha hi to rasul-rasul. Lapas aijo' doinyo obagi-bagiakonmo hi toto samian anu mompalalui.

^36-37 Sumo aitumo mule' na i Yusuf. Ia suele nompobaluk tano'nyo, lantas doi oli nu anu pinobaluknyo aijo' binoanyo ka' binee'nyo hi to rasul-rasul. I Yusuf aiya samian na lee' mae nu bansa Lewi lengkat mae i Siprus; to rasul-rasul suele monsanggohi ia i Barnabas (alati'nyo Pontundu).