SISIKON NU TO RASUL-RASUL 27 - KITAB NU TUMPU ALLA LELE MA'IMAI'

I Paulus tinalabutmo nokiijo' i Roma

¹ Salatan pinutusanmo kami tionyo talabutmo mokiijo' i Italia, i Paulus tiba to pia-piangkuka na mian sangga'at anu tinalungku' binee'mo hi Yulius, kapala nu pasukan suludadu nu Roma anu osanggohi “Pasukan i Kaisar”.

² Kami sinumake' i kapan anu tinoka lengkat mae i Adramitium, lapas aijo' inamba tiba kapan aijo' anu sinadiamo talabut mokiijo' i to labu-labuan i Provinsi Asia. I Aristarkhus, mian nu Makedonia anu tinoka lengkat mae i Tesalonika, talabut suele hingga-hinggat tiba kami.

³ Dodododopnyo kami tinokamo i Sidon. I Paulus ingatun ma'i-ma'ima' hondo i Yulius. Ia pinoloas mamba singkabot to sanga-sangalunyo da aha timbali mombee'i ia apaa na anu nu palalui.

⁴ Lengkat i kiijo' kami po'ule'mo tinalabut. Kalana kapan mongahopi mombun, kami tinalabutmo lau-laus montusakon biwi nu bone' togong nu Siprus anu madi' talalo nukona nu mombun.

⁵ Lapas aijo' kami notaapmo ambai anu mompaha ahop tiba Kilikia ka' Pamfilia, lantas tinokamo i Mira i lipu' nu Likia.

⁶ I kiijo' kapala nu suludadu aijo' nohumpakmo sa'angu' na kapan lengkat i Aleksanderia anu ka'oho' talabut mokiijo' i Italia. Sahingga ia nolalin kami nokiijo' i kapan aijo'.

⁷ Tino pia-pian sinaa na ko pinnyo kami tinalabut nandeng hondo, ka' sinusa' hondo, ahennyo madi' pinoko toka mami na kota Knidus, kalana daagi' majo'on. Lapas aijo' kalana mombun daagi' ahi' ma'idek, kami madi'mo noko ala tinalabut lau-laus nokiijo' i anu ingahopan momona. Sahingga kami tinalabutmo i sasu Salatan togong Kreta notulu i Tadunyo nu Salmone da kiijo' mae kami madi'mo nutului nu mombun.

⁸ Susa' hondo na kami tinalanut nontus biwi nu togong aijo' sampe i mihinyo kami tinoka i sa'angu' na tampat anu sanggonyo Panilabuan Ma'ima', madi' sangkuka na kojo'onnyo lengkat i kota' Lasea.

⁹ Tempo'nyo aitu Sinaa Daka' Paladamean mian nu Yahudi noko lapasmo. Talalomo nanjoo' na tempo' mami i ningkot, sahingga misa'mo daagi' tempo'nyo na talabut ma'i-ma'ima'. Mokonyo aijo' i Paulus nombee'i pokinde' sumo uuka hi aha,

¹⁰ “To Utu-utus, de pongka'oho'ku, daagi'mo ko bahayanyo de kita talabut lau-laus. Kita mongoa'imo kalugi'an manjoo', misa' ola anu sinake'to ka' kapanto, panyo butongto pe'e suele silakamo.”

¹¹ Panyo kapala nu suludadu aijo' madi' palesaya hi Paulus, ia lebe palesaya hi anu mongkamudi ka' kapiteng nu kapan aijo'.

¹² Palalabuan i kiijo' memang madi' ma'ima' na to kapa-kapan jojoong i tempo' nu bakin. Mokonyo aijo' kanjoo'annyo na anu mokalaja i kapan setuju da talabutmo mompala'i palalabuan aijo' kalana aha mongka'oho' bala usaha da toka i Feniks ka' jojoong i kiijo' mae sampe lapas na tempo' nu bakin. Feniks aijo'mo na palalabuan i Kreta anu mo'ahop i sasu Barat Daya ka' i Barat Laut.

Baleba' makansang i ambai

¹³ Tempo'nyo aitu baleba' nolengkat i salatan madi' makansang. Sahingga anu mokalaja i kapan bapikin aha timbalimo po'ule' talabut. Jadi aha nohangkatmo tapu ka' tinalabutmo nontusakon biwi nu bone' togong Kreta.

¹⁴ Panyo madi' pinin tinokamo na baleba' makansang – aijo'mo na osanggohi baleba' nu Timur Laut – baleba'nyo lengkat i katano'an,

¹⁵ ka' nontintip kapan mami. Mokonyo aijo' madi'mo timbali na kapan talabut lau-laus mongahopi baleba', sahingga kami nompowaya'mo ka' nompojohokmo kapan na'anju binoa nu baleba'.

¹⁶ Kami gagana' tinompilung sangkiding, tempo'nyo kami notulu i sasu salatan togong nu Kauda anu ise-ise' aijo'. Susa' hondo na kami kiijo' mompagala mohela' sikusi nu kapan mami.

¹⁷ Noko posake' na sikusi aijo' i kapan, kapan aijo' pinaka puutanmo nu kahohon da mahoson na mongkalekodi kapan aijo'. Kalana mabuhuk na nu hampe'akon i bone' nu Sirtis anu lese, tinauhakon na kadut lantas kapan binatukakonmo i pongka'oho' nu baleba'.

¹⁸ Baleba' saja'mo nabohos na nakansang, sahingga dodododopnyo sina-sinaa anu sinake' i kapan lewa'mo ingalin i ambai.

¹⁹ Dodododopnyo mule' anu mokalaja i kapan aijo' nongalin mule' to paka-pakakas nu kapan nokaiyong i ambai nu lima nu aha.

²⁰ Tino pia-pian sinaa na ko pinnyo kami madi'mo nontoa batu nu sinaa ka' mandala', ka' baleba' mule' ola ahi' saja' sabole-bolehmo makansang. Ahennyo kami madi'mo nontaha'imani da salamat.

²¹ Tino pia-piangkuka nako pinnyo mian haha aijo' madi'mo nongkaan. Sahingga i Paulus namba tinuminjo i totonga' nu aha lantas notatae, “To Utu-utus! De komiu nombatukimo pokinde'ku ka' madi' tinalabut lengkat i Kreta, kita madi' nongoa'i iwi-iwi' anu ma'idek ka' kalugi'an sumo aiya.

²² Panyo mule' ku poita totu-totu'unyo da komiu mompohoson kinyonyoa. Madi' ko samian pe'e na to Utu-utus anu mate; kita lugi panyo ola kapan aiya.

²³ Kalana na'utu pihi-pihi malaikat nu Tumpu anu ku sombah, aijo'mo Tumpu anu monjagai aku, tinoka hi belengku.

²⁴ Malaikat aijo' notatae, ‘Boli mabuhuk, Paulus! Kalana beleyum mangadapmo hi Tomundo'. Ka' kalana kanonongan nu Tumpu Allah hi beleyum, iwi-iwi' na mian anu tinalabut tiba beleyum salamat, kalana beleyum.’

²⁵ Mokonyo aijo' to Utu-utus, opohoson na kinyonyoa nu to Utu-utus! Kalana ku palesaya na Tumpu, sabab iwi-iwi' tionyo timbali sumo anu tinaloakon-Nyomo hi belengku.

²⁶ Panyo kita nuhampe'akonje i biwi nu bone' i sa'angu' na togong.”

²⁷ Pihi-pihi anu kosampulu'nyomo ka' opat na pihi, kami hau-haunyo lanto-lanto i Ambai Adria. Kila-kila ugaat tonga' pahumo anu mokalaja i kapan nongoa'imo kapan hau-haunyomo mongohanimo katano'an.

²⁸ Jadi aha nonguluakonmo kahohon moladung da osumbu' na koleengnyo nu ambai. Inyata' tampat aijo' koleengnyo ohani patompulu' na meten. Lapas aitu madi' pinin aha po'ule' mule' nonguluakon kahohon, lantas sinumbu'mo na ambai i tampat aijo' koleengnyo ohanimo tolumpulu' na meten.

²⁹ Aha mabuhuk boli-boli kapan aijo' tosasa i batu gahanggan. Jadi aha nonguluakon opat na tapu anu i sasu mboyok nu kapan, ka' nongamalakon de timbali lia-lia' mae maliana.

³⁰ Hoko-hokot na anu mokalaja i kapan nonsobamo malai mompala'i kapan aijo'. Aha nontauhakon sikusi nokaiyong i uee mimpula-pula koonyo montauhakon tapu lengkat i ahop nu kapan.

³¹ Panyo i Paulus notatae hi kapala nu suludadu anu i kapan aijo', “De anu mokalaja i kapan aiya madi'mo jojoong i kapan, to Utu-utus iwi-iwi' madi'mo salamat.”

³² Kalana aijo' to sulu-suludadu nombotu'i segot nu sikusi aijo', sahingga sikusi aijo' na'anjumo.

³³ Tempo'nyo ma'isa pe'e binete' na sinaa, i Paulus nompoto'imo da aha iwi-iwi' mongkaanmo. I Paulus notatae, “Sampulu'mo ka' opat na sinaa na kopinnyo kita Utus iwi-iwi' ola saja' jinojoong i uno nu buhuk, ka' madi' nongkaan apa-apaa.

³⁴ Ku poita da mongkaan ise-ise'. Aijo' timbali da bau ka'ima'an miu, da komiu po'ule' mahoson. Kalana kita Utus iwi-iwi' daagi' sinalamat ka' madi' ko anu naga'a apa-apaa.”

³⁵ Noko potatae sumo aitu, i Paulus nongala roti aijo' lantas nontalima kase hi Tumpu i ahop nu aha iwi-iwi'. Lapas aijo' ia nombagi-bagimo roti aijo', lantas kinaanmo nu aha.

³⁶ Sahingga aha iwi-iwi' nompo'ule' binikas ka' mongkaan hingga-hinggat mule'.

³⁷ Iwi-iwi' anu i kiijo' i kapan uwa'atu pitumpulu' ka' anom na mian.

³⁸ Salatan sinukupmo iwi-iwi' na nongkaan, aha nongalinmo gandum anu sinake' nokaiyong i ambai da kapan timbali laing.

Kapan tinosasamo

³⁹ Tempo'nyo sinaa nalianamo, anu mokalaja i kapan nontoamo katano'an aitu, panyo aha madi' monsumbu' katano'an nu apaa na aijo'. Aha nontoa sa'angu' na luoknyo ka' biwi nu bone'. Jadi aha ko kahanda' mompo'ohani kapan i kiijo' de opoko ala.

⁴⁰ Sahingga to sego-segot nu tapu binotu'an, lantas tapu haha aijo' pinojohokmo tonu' i ambai. Nohingga-hinggat tiba aijo' aha nombukaimo kahohon anu pinonsegoti iwi-iwi na kamudi. Lapas aitu aha nohangkatmo kadut i sasu ahop nu kapan da baleba' momboa kapan aijo' modensu' mompatui biwi nu bone'.

⁴¹ Panyo kapan aijo' tinudunmo i ampasannyo nu bone'. I sasu ahopnyo tinosasamo ka' madi'mo tinolohenggo, ka i sasu mboyoknyo na'idekmo tinintip nu bokon anu talalo hondo daka'.

⁴² To Sulu-suludadu i kapan ko kahanda'mo mompatei iwi-iwi' na mian anu tinalungku' kalana aha mabuhuk boli-boli daagi' ko anu lumangu i katano'an ka' malai.

⁴³ Panyo kapala nu suludadu aijo' nontewa' tanga'an nu aha aijo', kalana ia kahanda' momposalamat i Paulus. Ia nonsai iwi-iwi' na mian anu moko lumangu, malalumpat pe'e ka' lumangu mokiijo' i biwi nu bone'.

⁴⁴ Sangga'at mololoi'je mintoong i dopi' kabai i bense-bense'an nu kapan aijo'. Tiba jalan aijo', kami iwi-iwi' sinalamatmo tinoka nokiijo' i katano'an.