SISIKON NU TO RASUL-RASUL 25 - KITAB NU TUMPU ALLA LELE MA'IMAI'

I Paulus po'ule'mo ingulus hi anu lebe matangkas

¹ Salatan tinolun sinaamo na i Festus tinoka i tano' aijo', ia nambamo lengkat i Kaisarea nokiijo'mo i Yerusalem.

² I kiijo' mae to kapa-kapala nu imam ka' to pola-polaya' nu Yahudi nompotoka hi ia palakala nu aha mongkona i Paulus. Aha saja'mo monsale'i i Festus

³ da sanang na kinyonyoanyo hi aha, sahingga ia nompalentah mian momboa i Paulus mokiijo' i Yerusalem; kalana aha sinangaja'mo na sale' da mompateimo ia i tonga' nu jalan.

⁴ Panyo tinaaman i Festus, “I Paulus kiijo' tinalungku'mo i Kaisarea; ka' aku mule' madi'mo pin po'ule'mo minsusule' mokiijo'.

⁵ Jadi, sahanyo to tu'a-tu'anyo anu atina' hi komiu mamba hingga-hinggat tiba aku mokiijo' i Kaisarea, ka' monsampo palakala ia i kiijo' mae, de memang ia nombaumo kasala'an.”

⁶ Salatan jinojoong kila-kila inguwalun sinaamo i Yerusalem kabai sinampulu'anmo, i Festus ninsusule'mo nokiijo' i Kaisarea. Dodododopnyo ia nombaumo ulusan momputusi ka' mompalentahkon da i Paulus oboa mae mangadap.

⁷ Salatan i Paulus tinokamo, to mia-mian nu Yahudi anu tinokamo lengkat mae i Yerusalem tinuminjomo nontikubi ia, ka' nontampu'unimo nontuuk bau pompiboati ia. Panyo aha madi' noko ala nomponyata' pontuuk haha aijo'.

⁸ I uno nu ia mompototu'u butongnyo, i Paulus notatae, “Aku madi' nombau apa-apaa anu sala' mongkona atulan i Musa kabai kona i Laigan nu Tumpu kabai pe'e kona hi Kaisar nu Roma.”

⁹ Panyo i Festus mongka'oho' mongala kinyonyoa nu mian Yahudi. Sahingga nompokilawa hi Paulus, “Mongka'oho' na beleyum mamba mokiijo' i Yerusalem da oputusi i kiijo' mae i ahopku mongkona pontuuk haha aijo'?”

¹⁰ Tinaaman i Paulus, “Aku hau-haunyo tinjo-tinjo i ahop nu mian kopian hi Kaisar nu Roma; ka' i tampat aijo'mo na aku tionyo oputusi. Posi Tuan monsumbu'mo saba' aku madi' ko sala'nyo kona hi mian nu Yahudi.

¹¹ De aku nolanggaimo atulan ka' nombaumo apa-apaa anu pantas o hukum nu hukuman mate, aku sanang na mate. Panyo de pontuuk nu aha madi' totu'u, madi' ko samian pe'e na timbali mombee' aku hi aha. Ku poita o putusi i pomputusian hi Kaisar!”

¹² Noko basale' tiba anu saja' mompokinde'i ia, i Festus notatae, “Beleyum mompoita oputusi i pomputusian nu Kaisar, jadi beleyum tionyo mamba mangadap hi Kaisar.”

I Paulus i ahop hi Agripa ka' hi Bernike

¹³ Madi' pinin lapas aijo', i Tomundo' Agripa ka' i Bernike tinokamo i Kaisarea da singkabot i Festus.

¹⁴ Salatan aha jinojoong tino pia-pian sinaamo i kiijo', i Festus nontalangkanmo palakala i Paulus hi Tomundo Agripa. I Festus notatae, “Daagi' ko anu uuka aiya samian na anu tinalungku' anu pinala'ianmo i Feliks.

¹⁵ Tempo'nyo aku kiijo' i Yerusalem, to kapa-kapala nu imam ka' to pola-polaya' nu Yahudi nongkalaakmo mae na aha mian aijo' ka' nompoita da ku hukummo na ia.

¹⁶ Panyo aku nontaami saba' mian nu Roma madi' saintolo-tolo mombee'mo mian anu tinuuk da o hukum, de anu tinuuk aijo' ma'isa mompaha ahop tiba anu mongkalaak ia ka' obee'i kasampatan da montalangkan kahondoan nu butongnyo.

¹⁷ Jadi, tempo'nyo aha tinoka mae, aku madi' nontanda'i pinin. Dodododopnyo aku lau-laus nombau ulusan nu palakala, ka' nompalentahkon da mian aijo' oboa mae mangadap.

¹⁸ Salatan aha anu nongkalaak tinuminjomo nontalangkanmo palakala, aha madi' nontalangkan apa-apaa anu ma'idek, sumo anu sinangkangku tionyo nu potoka nu aha.

¹⁹ Aha ola madi' pokakana na pikilan tiba ia mongkona posi agama nu aha, ka' mongkona sala' samian anu sanggonyo i Yesus. Mian aijo' sinilakamo, panyo i Paulus notatae totu-totu'u tukoonyo mian aijo' po'ule'mo tinumuu'.

²⁰ Kalana aku ilingumo mongkona mosia na aku timbali mohumpak to kata-katalangan mongkona palakala aijo', aku nompokilawa hi Paulus pa' ia mongka'oho' mamba mokiijo' i Yerusalem ka' oputusi kiijo' mae na palakala aijo'.

²¹ Panyo i Paulus nompoita po'ule' o ulus i anu lebe matangkas; pinoitanyo da ia tataap jojoong i talungku'an sampe palakalanyo nu putusi nu Kaisar. Mokonyo aijo' pinalentahkonku da ia o talungku' pe'e sampe aku mohumpak kasampatan momboa ia hi Kaisar.”

²² Lantas i Agripa notatae hi Festus, “Aku kahanda' mohongo mian aijo'.” “Dodop kita Tuan mohongoje,” tinaaman i Festus.

²³ Dodododopnyo i Agripa ka' i Bernike tinokamo ka' pinolabotmo nu adat nu mian daka'. Aha ninsoop i tampat pomputusian palakala hingga-hinggat to pangka-pangkat daka' nu Suludadu tiba to mia-mian anu ko angga'nyo i kota aijo'. I Festus nompalentahkonmo i Paulus binoa ninsoop.

²⁴ Lantas i Festus notatae, “Mian Daka' Agripa ka' batu-batu anu sinilimu'! Mian aiya kinalaakmo hi belengku nu songko-songko bansa Yahudi anu i Yerusalem mau pe'a anu i aiya. Nolo-noloboo' na aha nontuntut tukoonyo ia madi' pantas na opobee' tumuu'.

²⁵ Panyo aku madi' nongkabot apa-apaa pe'e anu binaunyomo, da timbali o hukum nu hukuman mate. Ka' kalana pinosi poitanyomo na palakalanyo o putusi i pomputusian nu Kaisar, aku nontantukanmo da momboa ia hi Kaisar.

²⁶ Panyo aku ma'isa nohumpak katalangan apa-apaa anu matantu mongkona butongnyo da tinulis i uno nu sulatku toka hi Kaisar. Mokonyo aijo' aku nomboa mae ia hi kita Tuan-tuan iwi-iwi', lebe-lebe mule' hi Anu Opopodaka' Tomundo' Agripa! Kahanda'ku aijo'mo da de lapasmo na mompalesa aiya, daagi' ko katalangan anu ku tulis.

²⁷ Kalana de o ala i pongka'oho'ku, misa' kakonannyo na momboa samian anu tinalungku' ka' madi' momponyata' kasala'an-kasala'an anu otuukakon hi ia.”