SISIKON NU TO RASUL-RASUL 22 - KITAB NU TUMPU ALLA LELE MA'IMAI'

¹ “To tutuuma ka' to Utu-utus iwi-iwi'! Aku mompotoka kahondoanku hi komiu. Soba potombihing!”

² Salatan aha nohongo i Paulus notatae i uno nu basa Ibrani, aha lebemo nomohokot. Sahingga i Paulus nompolaus katalangannyo.

³ “Aku mian nu Yahudi,” koonyo i Paulus, “aku i hampe i Tarsus i lipu' Kilikia, panyo aku pinodaka' i aiya i Yerusalem ka' ingajan ima-ima' nu gulu' daka' i Gamaliel i uno nu atulan anu binee'i Musa hi mompolee'to. Pokakana sumo to Utu-utus iwi-iwi' i aiya sinaa aiya, aku suele talalo mompalahatikan Tumpu Allah.

⁴ Aku nongkabisa'i sampe i nate na anu saja' mombatuki ajalan bu'ou aijo'. Aha iwi-iwi' mo'ane mau pe'e boune, i hakopku ka' pinosoopku i uno nu talungku'.

⁵ Posi Imam Daka', ka' iwi-iwi' Mian Kopian Daka' nu Agama nonsakisimo aku madi' baleko'. Kalana ahamo aijo' na anu nombee'imo aku sulat katalangan anu pinotoka hi to mia-mian nu Yahudi i Damsyik. Tiba sulat aijo', aku timbali mohakop i kiijo' mae to mia-mian anu palesaya i ajalan aijo', ka' nomboa aha nokiijo' i Yerusalem, da i hukum.”

I Paulus nonsisik apaa na anu ingoa'annyomo

⁶ “Tempo'nyo aku hau-haunyo i lumajang ka' ohanimo toka i Damsyik, tempo'nyo aitu sinaa sonsu'unmo, daagi' ko sahaya anu majingka hondo monti-montiik tinolopinjitmo lengkat mae i langit titiikub hi belengku.

⁷ Aku notua' i tano' lantas aku nohongo ko potatae nontaeakon hi belengku, ‘Saulus, Saulus! Kadaka' beleyum monsakisa Aku?’

⁸ Lantas pinokilawangku, ‘Ihe na Belento, Tuan?’ ‘Akumo na i Yesus, mian nu Nazaret aijo' anu nu sakisa,’ tinaaman-Nyo.

⁹ To mia-mian anu i kiijo' nohingga-hinggat tiba aku nontoa sahaya aijo', panyo aha madi' nohongo potatae anu notatae hi belengku.

¹⁰ Lantas pinokilawangku mule', ‘Apaa na tionyo kubau Kita Tumpu?’ Tumpu nontaami, ‘Bulaamo ka' pokiijo'mo i Damsyik. I kiijo' mae beleyum nu poto'ije nu Tumpu iwi-iwi' na anu nu bau.’

¹¹ Aku pinaha kalana pinense' mae nu jingka anu taha-tahahumo aijo'. Jadi to sanga-sangalungku na nontaka' aku nokiijo' i Damsyik.

¹² I kiijo' daagi' ko samian sanggonyo i Ananias. Ia samian na anu pa' agama ka' mohongo-hongo montuluti palentah i Musa. Iwi-iwi' mian nu Yahudi anu jojoong i Damsyik mongadati hondo ia.

¹³ Ia tinoka nontoa aku, lantas tinuminjo i sohipi'ku ka' notatae, ‘Utusku Saulus, po'ule'mo beleyum montoa!’ Tempo'nyo aitu mule' aku tinolosinda, lantas nontoamo ia.

¹⁴ Lapas aitu ia notataemo hi belengku, ‘Tumpu mompolee'to nompile'imo beleyum, da beleyum monsumbu' pongka'oho'-Nyo, ka' montoa i Yesus Posaihon nu Tumpu ka' mohongo posi potatae i Yesus.

¹⁵ Beleyum timbalimo sakisi da mompolele hi mian iwi-iwi' apaa na anu tinoamo nu beleyum ka' i hongomo.

¹⁶ Uuka bolimo daagi' montanda'i talalo pin. Pobulamo ka' bee'mo na butongum da opalamandikan. Poita hi Tumpu da beleyum nu ampuni na to dosa-dosa'um.’ ”

Tumpu nompokaumo i Paulus da mompotoka sisik nu Tumpu Allah hi bansa sangga'at anu misa' Yahudi

¹⁷ “Aku ninsusule'mo nokiijo' i Yerusalem, ka' salatan aku hau-haunyo balado'a i Laigan nu Tumpu, aku kinuasaanmo nu Roh nu Tumpu.

¹⁸ Aku nontoa Tumpu; Ia notatae hi belengku, ‘Palia-lia' pala'i na Yerusalem, sabab to mia-mian i aiya madi' montalima katalangan mongkona Aku.’

¹⁹ Aku notatae, ‘Kita Tumpu, aha monsumbu'mo hondo saba' aku nompinsoopimo to lai-laigan pogalejaan da mohakop aha, ka' nombobotimo to mia-mian anu palesaya hi Kita Tumpu.

²⁰ Sumo aitu mule' salatan anu nonsakisi Kita i Stefanus pinateanmo, aku daagi' i kiijo' ka' nonsetujuimo aha nompatei aijo'. Aitu pe'e aku na nonjagai baju' nu to mia-mian anu nompatei ia.’

²¹ Panyo Tumpu po'ule' notatae hi belengku, ‘Sampamo lako', kalana Aku monsaimo beleyum mamba mokiijo' i tampat anu majo'on hi aha to mia-mian anu misa' Yahudi.’ ”

²² To mia-mian daagi' saja' mompotombihing i Paulus basisik, panyo tinoka i potatae anu i mihinyomo aijo' aha noloboo'mo daka-daka', “Pateimo na mian anu sumo aijo'. Ia madi' pantas tumuu'!”

²³ Hau-haunyo moloboo', aha nongkobahakonmo juba' nu aha, ka' nonsambuangakon abu' i langa.

²⁴ Sahingga kapala nu suludadu nu Roma aijo' nonsai da i Paulus oboa mokiijo' i kajojoongan nu suludadu da ia opalesa i kiijo' totu-totu'u, da osumbu' apaa na sababnyo to mia-mian nu Yahudi moloboo' sumo aitu mongkona ia.

²⁵ Panyo tempo'nyo i Paulus sinegotanmo da o pohos, i Paulus notatae hi suludadu anu tinuminjo i kiijo', “Pa' timbali na mompohos mian nu layat kalaja'an Roma, de ma'isa pe'e ia o palesa?”

²⁶ Nohongo aijo', suludadu aijo' namba hi kapala nu pasukan ka' notatae, “Apaa na kahanda' anu obaunto nu Kita Tuuma? Mian aiya layat nu negara Roma!”

²⁷ Sahingga kapala nu suludadu namba hi Paulus ka' nompokilawa, “Soba poto'i mae, apaa beleyum layat nu negara Roma!” “Ii',” koonyo i Paulus, “aku layat nu negara Roma.”

²⁸ Kapala nu suludadu aijo' notatae mule', “Aku tinimbali layat nu negara Roma nombayan manjoo' hondo!” Tinaaman i Paulus, “Panyo aku i hampe salaku layat nu negara Roma.”

²⁹ Tempo'nyo aitu mule' to sulu-suludadu anu mongka'oho' mompalesa i Paulus tinolo sule'mo, ka' kapala nu suludadu aijo' suele nabuhukmo, kalana ia nolante'mo i Paulus, padahan i Paulus layat nu negara Roma.

I Paulus i ahop nu Mian Kopian Daka' nu Agama

³⁰ Kapala nu suludadu nu Roma aijo' kahanda' hondo monsumbu' apaa na sahondo-hondonyo anu monsabapi to mia-mian Yahudi mompisala'i i Paulus. Mokonyo aitu dodododopnyo ia nolaga to kapa-kapala nu imam ka' Mian Kopian Daka' nu Agama da sihuuk. Lantas i Paulus ilapasakonmo madi'mo pinungu, lapas aijo' binoamo mangadap hi aha iwi-iwi'.