SISIKON NU TO RASUL-RASUL 20 - KITAB NU TUMPU ALLA LELE MA'IMAI'

I Paulus namba nokiijo' i Makedonia ka' i Yunani

¹ Salatan ilapasmo na kahengge'an kiijo' i Efesus, i Paulus nolimu'mo jama'at ka' nongkakeha'i aha. Lapas aijo' tinaloakonnyo pia mae na komiu, lantas nolausakonmo lajangnyo nokiijo' i Makedonia.

² Ia namba molenga to lipu-lipu kiijo' mae i Makedonia ka' nombee'i manjoo' na pokinde' hi to mia-mian anu palesayamo hi Yesus kiijo' mae salaku bau pongkakeha aha. Lapas aitu ia namba nokiijo' i Yunani.

³ Tinotolu' na bitu'on na ko pinnyo ia jinojoong kiijo' mae. Lantas salatan ia hau-haunyomo mosadia da talabutmo mokiijo' i Siria, daagi' ko lele tukoonyo nu aha, to mia-mian Yahudi nosa'angu'mo kahanda' mompatei ia. Mokonyo aijo' ia nontantukanmo da minsusule'mo montulu Makedonia.

⁴ I Sopatar anak i Pirus anu nolengkat mae i Berea namba nohingga-hinggat ia; sumo aitu mule' i Aristarkhus ka' i Sekundus mian nu Tesalonika, ka' i Gayus mian nu Derbe. Suele i Timotius, i Tikhikus, ka' i Trofimus, to mia-mian lengkat i Provinsi Asia.

⁵ Aha namba i moona lantas nontanda'i kami i Troas.

⁶ Noko lapas Lamean Roti Anu Madi' Mompake Ragi, kami tinalabutmo nompala'i Filipi. Ilapas aijo' kino liman sinaanyo kami po'ule'mo mule' sinihuk i Troas tiba aha. I kiijo' mae kami jinojoong sina'angu' na duminggu.

Puusnyomo i Paulus namba nolenga Troas

⁷ I pihi nu duminggu kami nosa'angu' da mongkaan hingga-hinggat susumo anu moto utus. I Paulus lewa' binasisik tiba to mia-mian, kalana dodop ia kahanda'mo mamba. Tinoka tonga' pahu i Paulus ola saja' binasisik.

⁸ I uno nu salipi' i bawo nu tampat mami nosa'angu' aijo', daagi' ko sulu' manjoo'.

⁹ Samian na olitau sanggonyo i Eutikhus sinumuhang i tolongan. Kalana i Paulus sina basi-basisiknyomo, olitau aijo' natatundu'mo hondo sampe ia tinohoyot i tolongan aijo', lantas nanabu' nokaiyong i aluknyo, anu ko totolu'nyo na salipi' lengkat mae i bawo. Tempo'nyo aha nohangkat ia, ia sinilakamo.

¹⁰ Panyo i Paulus nintatau' nokaiyong lantas nonsalangku' olitau aijo' ka' tinangkungnyo. I Paulus notatae, “Boli bata-bata, ia daagi' tumuu'!”

¹¹ Lapas aitu i Paulus po'ule'mo noliba' nokiita', lantas nombagi-bagimo roti ka' kinaan nu aha hingga-hinggat. Salatan pininmo na binasisik tiba to mia-mian ilambaakonnyo subu-subu, i Paulus nambamo.

¹² To mia-mian nomboamo olitau aijo' anu po'ule'mo tinumuu' i laigannyo. Aha nongoa'imo sinanang na kinyonyoanyo.

Lengkat mae i Troas nokiijo' i Miletus

¹³ Kami namba nokiijo' i kapan lantas tinalabutmo namba momona nokiijo' i Asos da molabot i Paulus sumake' i kapan kiijo' mae. Ia nongatunmo sumo aitu kalana ia mokiijo' lumajang tano'.

¹⁴ Salatan nompahakabotmo i Asos, i Paulus nalia-lia' noliba' nokiijo' i kapan, lantas kami tinalabutmo nokiijo' i Metiline.

¹⁵ Lengkat i kiijo' mae kami tinalabut mule', ka' dodododopnyo tinokamo i tampat anu mompaha ahop tiba Khios. Kino hipuannyo kami tinokamo i Samos ka' sinansinaa, lapas aijo' nokiijo'mo i Miletus.

¹⁶ I Paulus noko tantukanmo da madi'mo sonsoo' i Efesus, da boli mongide-idei tempo' i tano' nu Asia. De opoko-poko lamedi da malia-lia' toka na ia i Yerusalem i sinaa nu Lamean nu Pentakosta.

I Paulus nompasoakonmo potatae poga'a-ga'atan kiijo' i Efesus

¹⁷ Lengkat mae i Miletus i Paulus nompotuunmo nokiijo' i Efesus da mompoita to pola-polaya' nu jama'at i kiijo' mae da toka singkabot tiba ia.

¹⁸ Salatan aha tinokamo, i Paulus notataemo hi aha, “To Utu-utus monsumbu'mo mosia na aku tinumuu' sumo uukamo na kopinnyo atina' hi komiu daagi' pe'e i sinaa momonanyo aku tinoka i Asia.

¹⁹ Madi' kino bubuun ka' saja' nonjujuhakon lolu', aku mokalaja bau kapentingan nu Tumpu i totonga' nu kasansalaan anu ku oa'i, kalana tanga'an anu ma'idek nu to mia-mian Yahudi.

²⁰ Kita utus monsumbu' saba' saja'mo pinoto'ingku hi komiu apaa na anu ko gunanyo hi komiu. Aku mongajan komiu i posa'angu'an-posa'angu'an nu mian da'isan i to lai-laigan.

²¹ Mau hi to mia-mian Yahudi kabai hi to mia-mian bansa sangga'at aku saja' mompokinde'i da aha bolimo mombau to dosa-dosa' nu aha ka' tokamo hi Tumpu, tiba palesaya hi Tumpu Yesus.

²² Uuka aku mombatukimo palentah nu Roh nu Tumpu, mambamo mokiijo' i Yerusalem. Ka' aku madi' monsumbu' apaa na anu jadi' hi belengku kiijo' mae.

²³ Aku ola monsumbu' saba' i toto sa'angu' na kota' Roh nu Tumpu nompoto'imo totu-totu'u hi belengku, tukoonyo saidi' mae o talungku' ka' mongoa'i sansala.

²⁴ Panyo aku madi' mompajuli kantumuu'anku aiya, asan aku moko ala mompomingkot kalaja anu binee'mo nu Tumpu Yesus hi belengku ka' asan aku tulu-tulutan toka imihinyo nu kantumuu'anku mompolele Lele Ma'ima' aijo' mongkona balakat nu Tumpu.

²⁵ Aku nambamo nolenga to Utu-utus iwi-iwi' ka' nompolelemo suele mongkona mosia na Tumpu mompalentah susumo Tomundo'. Uuka ku oa'i madi'mo daagi' mompahakabot tiba to Utu-utus.

²⁶ Mokonyo aitu totu-totu'u hondo na kutaeyakon hi komiu sinaa uuka aiya, saba' de daagi' ko anu atina' hi komiu silaka saidi' mae, atina' misa' sala'ku.

²⁷ Madi' toho' aku mompala'i pakalaja'anku montutuhakon hi komiu iwi-iwi' na tanga'an nu Tumpu.

²⁸ Tionyo obala ingati na butong miu ka' otoa suele na jama'at iwi-iwi' anu binee'mo nu Roh nu Tumpu hi komiu da otoa; kalana komiu ingangkatmo da montoa jama'at aijo'. Tionyo komiu montoa jama'at nu Tumpu aijo' sumo polaya' montoa dombanyo, kalana Tumpu nompotimbalimo jama'at-Nyo, aijo'mo na sababnyo sahingga i Yesus Anaknyo sinilakamo.

²⁹ De Aku mambamo totu-totu'u tokaje' mae na to seri-serigala anu bahangihi moitina' hi komiu. Ka' to mia-mian anu ojagai miu aijo' timbalimo kaanon nu to seri-serigala haha aijo'.

³⁰ Aitu pe'e anu atina' hi to Utu-utus saidi' mae totinjomo na to mia-mian anu mompolele lele anu madi' totu'u. Aha mombau sumo aijo' da to mia-mian anu pinalesayamo hi Yesus timbali ponga' ka' mombatuki aha.

³¹ Kalana aijo' o bala'ingati! Inau' sabab totolu' na taun na kino pinnyo nonjujuhakon lolu', sinaa pihi aku madi' toho' milawe na mongajan komiu toto samian.

³² Uuka aiya ku bee'mo na komiu hi Tumpu da Ia na mompotuu' komiu ka' da komiu mintoong i lele nu balakat nu Tumpu Allah. Tumpu ko kuasa da mompohosonakon komiu ka' mombee'i komiu to bala-balakat anu noko posadia-Nyomo hi iwi-iwi' mian anu palesayamo hi Ia.

³³ Ma'isa toho' aku nongkamilui doi kabai pakean lengkat hi toto samian.

³⁴ Posi kita Utus monsumbu'mo, saba' ola posi lawengku na bakalaja bau pomposukup kapalaluanku ka' to sanga-sangalungku anu mombatuki aku.

³⁵ I iwi-iwi' na han, aku nombee'imo sonto' hi komiu saba' kalana mokalaja totu-totu'u montulungimo to mia-mian anu madi' mahoson. Kalana tionyo ahi' o inau'to apaa na anu pinosi taloakonmo i Tumpu Yesus, ‘Lebe sanang na mombee'i ka' de mule' ola montalima.’ ”

³⁶ Salatan i Paulus ilapas na notatae, ia dinumaladupumo tiba aha iwi-iwi' lantas binalado'a.

³⁷ Aha iwi-iwi' i humaang ka' nontanggogoli i Paulus ka' nontaloakon o pia mae i jalan.

³⁸ Aha talalomo molibos hondo, kalana i Paulus notatae, tukoonyo aha madi'mo daagi' montoa ia. Lantas aha nomboa ia tinoka i kapan.