SISIKON NU TO RASUL-RASUL 16 - KITAB NU TUMPU ALLA LELE MA'IMAI'

I Timotius nombatukimo i Paulus ka' i Silas

¹ I Paulus i lumajang mule' nokiijo' i Derbe, lapas aitu nokiijo'mo i Listra. I kiijo' daagi' ko samian na anu saja' mombatuki Yesus sanggonyo i Timotius. Tinanyo mian nu Yahudi, anu pinalesayamo hi Yesus; panyo tuumanyo mian nu Yunani.

² Anu i kiijo' to mia-mian anu palesayamo anu jojoong i Listra ka' i Ikonium, i Timotius tinalasangmo, mian anu ma'ima'.

³ I Paulus mongkahanda'i da i Timotius mombatuki ia; mokonyo aitu ia nonsunat i Timotius. Ia nombau aijo', kalana to mia-mian Yahudi i da'erah aijo' iwi-iwi' monsumbu' saba' tuumanyo i Timotius mian nu Yunani.

⁴ I to kota-kota anu tinokamo nu aha, aha nompotokakonmo hi to mia-mian anu palesayamo, iwi-iwi' na kaputusan anu tinantukanmo nu to rasul-rasul ka' to pola-polaya' i Yerusalem. Aha nompokinde'i to Utu-utus anu pinalesayamo aijo' da mombatuki atulan haha aijo'.

⁵ Sahingga nompaka padodomo na iman, nu to jama-jama'at aijo', ka' toka nu sansina-sinaa nompaka pintuangmo manjoo' na konjoo'nyo.

I Troas daagi' ko anu tinoa i Paulus

⁶ Roh nu Tumpu madi' mompobee' i Paulus ka' i Silas mompolele potatae nu Tumpu i Provinsi Asia. Jadi aha i lumajang lau-lausmo nokiijo' i tano' Frigia ka' i Galatia.

⁷ Salatan tinokamo i potempasan nu Misia, aha nompi pinsoopmo mokiijo' i Provinsi Bitinia, panyo Roh i Yesus nontewa' aha mamba mokiijo'.

⁸ Jadi aha noliu-liu Misia ka' i lau-laus nokiijo' i Troas.

⁹ Pihi-pihinyo i kiijo', i Troas, ko anu tinoa i Paulus. I uno nu anu tinoanyo aijo', ia nontoa samian na mian nu Makedonia tinuminjo i ahopnyo ka' pagala nongkakase da ia mamba mokiijo' i Makedonia da montulungi aha.

¹⁰ Salatan i Paulus nontoa anu tinoa aijo', kami balo nosadia namba mokiijo' i Makedonia. Kalana kami nompalesayamo totu-totu'u taalu' Tumpu nonsaimo kami, sahingga kami nongala sa'angu' na kaputusan mamba mompolele Lele Ma'ima' hi to mia-mian kiijo' mae.

Kiijo' i Filipi: i Lidia pinalesayamo hi Tumpu

¹¹ Kami nompala'i Troas ka' tinalabut lau-laus nokiijo' i Samotrake, ka' dodododopnyo nokiijo'mo i Neopolis.

¹² Lengkat i kiijo' kami nokiijo'mo i Filipi, sa'angu' na kota Kacamatan anu momona otokai i Makedonia. Filipi pinalentah nu kalaja'an Roma. I kiijo' mae kami jinojoong tino pia-pian sinaa.

¹³ I sinaa nu Sabat kami namba nokiijo' i biwi nu kaunyo i sambiha' nu sabatan daka' nu kota, kalana otutugi mami i kiijo' daagi' ko tampat balado'a nu mian Yahudi. Lantas kami sinumuhangmo ka' binasisik tiba to bouboune anu sinihuk i tampat aijo'.

¹⁴ Samian anu lengkat aijo' hi aha, aijo'mo na anu lewa' mompobaluk hude mingkamumu', sanggonyo i Lidia nolengkat mae i Tiatira. Ia mongkalibosi Tumpu, sahingga Tumpu nohenggoakon kinyonyoanyo da ia montalima apaa na anu no ajanakon i Paulus hi ia.

¹⁵ I Lidia ka' aha iwi-iwi' isi nu laigannyo pinalamandikanmo. Noko palamandikan ia nolagamo kami. Ia notatae, “De to Utu-utus mongoa'i aku totu-totu'u pinalesayamo hi Tumpu Yesus, imbo'mo da sonsoo' i laiganku.” Lantas ia sabole-bole nompoita kami da otuluti na pongka'oho'nyo.

I Paulus tinalungku'mo i Filipi

¹⁶ Daagi' kino sansinaan tempo'nyo kami hau-haunyomo namba nokiijo' i tampat balado'an, kami nompahakabotmo tiba samian na boune; ia posaihon. Boune aijo' kinuasanmo nu roh ma'idek anu moko ala mongkila-kila apa-apaa na anu timbali saidi' mae. Kalana moko ala mongkila-kila sisi' nu mian, boune aijo' mombee'i ka'untungan anu daka' hi anu pongalapannyo tambo.

¹⁷ Boune aijo' saja'mo nombatuki i Paulus ka' kami saja'mo moloboo'akon, “Mian haha aiya posaihon nu Tumpu anu Daka'! Aha tinoka da mompoto'iakon hi to Utu-utus mosia na jalannyo komiu timbali salamat!”

¹⁸ Tino pia-pian sinaa na kopinnyo boune aijo' saja'mo moloboo' sumo aijo'. I Paulus madi'mo kino kasabalannyo, sahingga ia nosiloi lantas notatae hi roh ma'idek aijo', “Tiba sanggo i Yesus Kristus aku mompalentah oko mosabat lengkat i boune aiya!” Tempo'nyo aijo' mule' roh aijo' nompala'imo boune aijo'.

¹⁹ Salatan anu pongalapannyo tambo tinolo sukapmo, saba' kasampatan nu aha da pohumpakan doi anu i madi'mo, aha nohakopmo i Paulus ka' i Silas, lantas i hela' ua-ua'aha nokiijo' i natan nu mian anu ko pangkatnyo.

²⁰ Aha nompopangadap i Paulus ka' i Silas hi to pangka-pangkat pamalentah nu Roma, lapas aijo' notatae, “To mia-mian aiya mian nu Yahudi. Aha nompotasibu'mo i kota'to.

²¹ Aha nompoto'i mian mombau adat anu saja' o bau anu mompaha sala' tiba to atu-atulanto, to mia-mian nu Roma. Kita madi' timbali montalima kabai mombatuki adat anu saja' o bau aijo'!”

²² Mian da'isan suele monsangaja'imo montumbuhi i Paulus ka' i Silas; ka' to pangka-pangkat pamalentah nombeakmo baju' i butong nu ua-ua'aha na rasul aijo' lantas nompokaumo mian momboboti aha ohu-ohua'.

²³ Pinoko bobotan na aha tala-talalomo hondo, aha pinosoopmo uno nu talungku'. Kapala nu talungku' pinokau monjagai aha totu-totu'u boli lenta.

²⁴ Kalana palentah aijo', kapala nu talungku' aijo' nomposoopmo aha i kaman nu talungku' anu i uno-unonnyo hondo, ka' nompungu tengke nu aha i balak.

²⁵ Kila-kila tonga' pahu, i Paulus ka' i Silas hau-haunyo balado'a ka' nonyanyi mompuji-puji' Tumpu. To mia-mian nu talungku' sangga'at hau-haunyo mompotombihing aha manyanyi.

²⁶ Madi' pinin tinokamo na luulu' daka' hondo, sampe mesen nu talungku' aijo' ginayu'an. Iwi-iwi' na tumban nu talungku' tinontuhea' ka' lante-lante' anu pinompungu iwi-iwi' mian nu talungku' nobotu-botu'.

²⁷ Kapala nu talungku' aijo' tinolokengkeng nobula. Salatan ia nontoa pontumban nu talungku' haha aijo' tinontuhea'mo, ia nombubutmo bajaknyo kahanda'mo minoo', kalana ia monsangka to mia-mian nu talungku' nalaimo iwi-iwi'.

²⁸ Panyo i Paulus noloboo' hoso-hoson, “Boli minoo'! Kami iwi-iwi' daagi' i aiya!”

²⁹ Kapala nu talungku' aiya nompoita sulu' lantas nopadeka' i unonyo, ka' i lakatnyomo na ia dinumaladupu i ahop hi Paulus ka' hi Silas.

³⁰ Lapas aitu ia nomboa aha nosabat ka' notatae, “To Tuan-tuan, apaa na anu tionyo ku bau da aku o posalamat?”

³¹ Tinaaman i Paulus ka' i Silas, “Palesayamo hi Tumpu Yesus! Beleyum timbali salamat – beleyum ka' iwi-iwi' mian anu i laiganum!”

³² Lantas i Paulus ka' i Silas nonsisikakon mana-manasa potatae nu Tumpu hi kapala nu talungku' aijo' ka' hi iwi-iwi' nu mian anu daagi' i laigannyo.

³³ Tempo'nyo tonga' pahu aijo' suele, kapala nu talungku' nomboa aha lantas nombaso'i bela nu aha haha aijo'. Sahingga ia ka' iwi-iwi' mian anu kiijo' i laigannyo lau-laus pinalamandikan.

³⁴ Lapas aijo' ia nomboa i Paulus ka' i Silas nokiijo' i laigannyo ka' nombee'i nongkaan aha. Ia ka' iwi-iwi' to Utu-utusnyo sinanangmo hondo kalana aha uuka aiya pinalesayamo hi Tumpu.

³⁵ Dodododopnyo daagi' subu-subu, to pangka-pangkat pamalentah nu Roma nonsai pulisi nokiijo' i talungku' da mompotokakon palentah, da i Paulus ka' i Silas o sabatakonmo.

³⁶ Kapala nu talungku' nompoto'iakon han aijo' hi Paulus. Ia notatae, “To Tuan-tuan, to pangka-pangkat pamalentah nombee'imo palentah da molapasakon to Tuan-tuan. Uuka aiya to Tuan-tuan timbalimo minsusule'. Higahi, i jalan!”

³⁷ Panyo i Paulus notatae hi to pangka-pangkat pulisi aijo', “Kami minsoop i layat nu negara Roma. Madi' pilenje o putusi, kami binala tobatmo i ahop nu mian da'isan ka' pinosoopmo i uno nu talungku'. Ka' uuka aha nompokaumo kami mamba hoko-hokot? Kami madi' mongka'oho'! Pokau mae na to pangka-pangkat pamalentah aijo' da aha na mosi toka mae i aiya monsabatakon kami.”

³⁸ To pangka-pangkat pulisi nompotokakon han aijo' hi to pangka-pangkat pamalentah nu Roma. Salatan to pangka-pangkat aijo' nohongo taalu' i Paulus ka' i Silas minsoop layat negara nu Roma, aha nabuhukmo.

³⁹ Lantas aha namba nompoita ampun hi Paulus ka' hi Silas, lapas aijo' aha nomboa ua-ua'aha aijo' nosabat lengkat i talungku' ka' nompoita da aha mamba mompala'i kota aijo'.

⁴⁰ I Paulus ka' i Silas nompala'imo talungku' aijo' lantas nambamo nokiijo' i laigan i Lidia. Salatan nompahakabotmo tiba to mia-mian anu palesayamo i kiijo' mae, ka' nombee'imo pikilan hi aha, i Paulus ka' i Silas nambamo.