SISIKON NU TO RASUL-RASUL 10 - KITAB NU TUMPU ALLA LELE MA'IMAI'

I Petrus ka' i Kornelius

¹ I Kaisarea daagi' ko samian na mo'ane sanggonyo i Kornelius. Ia samian na kapiteng nu “Tompukan nu Suludadu nu Italia.”

² Ia mian anu mabuhuk hi Tumpu ka' iwi-iwi' na to utu-utusnyo monsombah Tumpu. Ia saja' montulungi mian nu Yahudi anu kasiasi, ka' ia saja' balado'a hi Tumpu.

³ Daagi' kino sansinaan kila-kila jam totolu' ohanimo mopatas ia nontoa manasa hondo samian na Malaikat nu Tumpu tinoka ka' nolaga ia, “Kornelius!”

⁴ I Kornelius nontonto'i Malaikat aijo' ka' nabuhukmo lantas notatae, “Daagi' ko apaa Tuan?” Tinaaman nu malaikat aijo', “Do'aum ka' ka'ima'an nu kinyonyoaum tinalimamo nu Tumpu ka' Tumpu nonginau'mo beleyum.

⁵ Uuka aiya saimo na mian mokiijo' i Yope molaga i Simon anu sanggonyo ahi' hondo-hondo i Simon Petrus.

⁶ Ia daagi' sinonsoo' sasaingoni' i laigan nu topo ka'ut kilit sanggonyo i Simon, anu jojoong i sonibi nu bone'.”

⁷ Salatan nambamo na malaikat anu bina-binasisik ka' i Kornelius aijo', i Kornelius nolaga ua'aha na mian posaihonnyo i uno nu laigan ka' samian na suludadu anu saja' monsangalui ia ka' pa'agama.

⁸ I Kornelius nonsisikakon hi aha apaa na anu jinadimo, lantas nonsai aha mokiijo' i Yope.

⁹ Dodododopnyo sina-sinaa, hau-haunyo aha lumajang ka' malia'mo toka i Yope, i Petrus noliba' nokiita' i laigan ka' binalado'a.

¹⁰ Ia talalomo no'ohop ka' ka'oho'mo mongkaan. Hau-haunyo momposadia anu o kaan, ia nontoa sa'angu' na han anu pinotoa nu Tumpu.

¹¹ Tinoanyo langit tinabuka'mo ka' sumo hude anu bolaa inguluakon i dunia, kala-kalayo' i opat na pasu'nyo.

¹² I unonyo aijo' ko binatang manjoo' na ngahannyo anu opat na tengkenyo, iwi-iwi' binatang anu jumolo, ka' to tomo-tomonsi' anu ma'ela'.

¹³ Lantas daagi' kino lewo' notatae hi ia, “Petrus pobulamo! Kolotmo ka' kaanmo!”

¹⁴ Tinaaman i Petrus, “Madi', Tumpu! Ma'isa toho' aku nongkaan apa-apaa anu madi' timbali o kaan kabai anu pahengas.”

¹⁵ Panyo lewo' aijo' notatae mule' hi ia, “Apaa na anu tinaloakonmo nu Tumpu timbali o kaan, bolimo nu sangka aijo' madi' timbali o kaan.”

¹⁶ Anu pinotoa aijo' pino uli-ulit sampe pinintolun, lapas aitu hude aijo' tinohangkatje nokiita' i suluga'.

¹⁷ I Petrus biningungmo na mompotutugakon apaa na alati'nyo nu anu tinoanyo aijo'. Hau-haunyo i Petrus mompotutugakon, to mia-mian anu sinai mae i Kornelius nolio pa' iya na laigan kinasonsoo'an i Simon tempo'nyo aijo' aha anu nolio kiijo'mo i ahop nu tumban.

¹⁸ Lantas aha nolaga mian ka' nompokilawa, “Apaa daagi' ko mian anu sinonsoo' i aiya, sanggonyo i Simon Petrus?”

¹⁹ Hau-haunyo i Petrus daagi' solaa' mompotutugakon da nu sumbu' na alati'nyo nu anu tinoanyo aijo', Roh nu Tumpu notatae hi ia, “O, Petrus, daagi' ko aha totolu' hau-haunyo molio beleyum.

²⁰ Inda lia-lia' pintau' mokaiyong boli bata-bata na mombatuki aha, kalana Akumo na nonsai mae aha.”

²¹ Sahingga i Petrus nintau' nokaiyong ka' notatae hi mian haha aijo', “Akumo na anu nulio nu to Utu-utus. Te ko makisut apaa na to Utu-utus toka mae uuka?”

²² Tinaaman nu aha, “Kapiteng Kornelius nonsai mae kami toka mae i uuka. Ia samian anu ma'ima' ka' mabuhuk hi Tumpu, tiba talalo otabea'i nu iwi-iwi' mian Yahudi. Samian na malaikat nu Tumpu nonsai ia mompoita i Tuan toka pe'e i laigannyo kalana, salaku bau pontaami do'anyo, ia sinai mohongo apaa na anu otaloakon i Tuan hi ia.”

²³ I Petrus nolaga aha minsoop da sonsoo' pe'e i kiijo'. Dodododopnyo i Petrus nobula ka' namba hingga-hinggat tiba aha. To pia-piangkuka na mian anu palesaya lengkat mae i Yope nombatukmo suele.

²⁴ Sinansinaa aha tinokaje i Kaisarea. I kiijo' mae aha saja'mo tinanda'an i Kornelius tiba to Utu-utusnyo ka' to sanga-sangalunyo anu mompahakanaya anu i laganyomo.

²⁵ Salatan i Petrus tinokamo, i Kornelius nambamo nolabot ia ka' nonsombah i ahopnyo.

²⁶ Panyo i Petrus nontulungi ia tinuminjo, lantas notatae, “Pobulamo! Aku pe'e suele ahi' mian.”

²⁷ Hau-haunyo basisik tiba i Kornelius, i Petrus ninsoopmo i uno nu laigan. I kiijo' ia nontoa da'isanmo na mian anu sinilimu'.

²⁸ Lantas ia notatae hi aha, “Posi to Utu-utus monsumbu' saba' mian nu Yahudi o tewa' nu agamanyo na mamba molenga kabai mompahasumbu' tiba to mia-mian lengkat i bansa sangga'at. Panyo Tumpu nompotoamo hi belengku, saba' aku madi' timbali monsangka mau pe'e ihe pahengas kabai madi' timbali o kaan.

²⁹ Aijo' na sababnyo salatan i Tuan nompoita da aku toka mae, aku madi' mombahakon. Jadi uuka aiya aku mongkahanda'i monsumbu', kadaka' i Tuan mompoita aku toka.”

³⁰ Tinaaman i Kornelius, “Tolunsinaamo ka' uuka kila-kila tempo'nyo sumo uuka aiya, aku hau-haunyo balado'a i laigan jam totolu' ohanimo malom. Monti-montiik samian na mo'ane tinuminjo i ahopku. Baju' nu mian aijo' jongkilaban.

³¹ Ia notatae, ‘Kornelius! Tumpu nontalimamo do'a nu beleyum ka' monginau' ka'ima'an nu kinyonyoaum.

³² Jadi saimo na mian mokiijo' i Yope molaga mian anu sanggonyo i Simon Petrus. Ia daagi' sinonsoo' i laigan nu samian anu topo ka'ut kilit sanggonyo i Simon; laigannyo aijo' i sonibi nu ambai.’

³³ Aijo' na sababnyo aku nalia-lia' nonsai mian mamba molaga i Tuan. Ka' i Tuan totu'u ma'ima' na kinyonyoa da toka mae. U'uka aiya kami iwi-iwi' silimu'mo i ahop nu Tumpu, da mohongo iwi-iwi' anu osaiakon nu Tumpu da otaloakon i Tuan hi kami.”

Pidatu i Petrus

³⁴ Lantas i Petrus notatae, “Uuka aiya aku totu-totu'u sininsumbu'mo taalu' Tumpu mombau iwi-iwi' mian pokakana.

³⁵ Mian anu mabuhuk hi Tumpu ka' mombau anu ma'ima', mian aijo' otalima nu Tumpu, madi' mompile'i ia bansa apaa.

³⁶ Sinumbu'mo nu to Utu-utus na isi nu lele anu pinotoka nu Tumpu hi bansa Israel. Lele aijo' aitumo Lele Ma'ima', mongkona paladamean hi Yesus Kristus, aitumo Tumpu nu iwi-iwi' mian.

³⁷ Komiu nonsumbu'mo apaa na anu jinadimo i songko-songko na Yudea, aijo'mo anu mulai lengkat i Galilea noko lapas na palamandian anu pinoto'i i Yohanes.

³⁸ Komiu nonsumbu'mo saba' Tumpu nompile'imo i Yesus mian nu Nazaret aijo' ka' nombee' hi Ia Roh nu Tumpu ka' kuasa. Komiu mule' nonsumbu'mo saba' i Yesus namba iyaya mae da mombau anu ma'ima'; Ia nompa'alin iwi-iwi' mian anu kinuasanmo nu Ibilis, sabab Tumpu mongkalibosi Ia.

³⁹ Kamimo aiya na to mia-mian anu nosi toamo sagala apa-apaa anu binaunyo i kampung nu mian Yahudi ka' i Yerusalem. Mau pe'e sumo aijo' aha nonsalibmo ka' nompateimo Ia.

⁴⁰ Panyo i sinaa ko totolu'nyo Tumpu po'ule'mo nompo tumuu' Ia lengkat i kasilakannyo ka' nompotoa Ia hi mian;

⁴¹ madi' hi iwi-iwi' na mian, sambiha'nyo ola posi kami anu pinile'anmo nu Tumpu i momonanyo da timbali to saki-sakisi-Nyo: Kami nongkaan ka' nonginum tiba Ia, salatan Ia po'ule'mo tinumuu' lengkat i kasilakan-Nyo.

⁴² Ka' Ia nonsai kami mompolele Lele Ma'ima' aijo' hi to mia-mian ka' nombee'i katalangan koonyo Iamo na anu i hangkat nu Tumpu da timbali Mian Kopian nu to mia-mian anu daagi' tumuu' ka' to mia-mian anu sinilakamo.

⁴³ Iwi-iwi' to nabi-nabi motatae mongkona Ia. Aha notatae tukoonyo iwi-iwi' mian anu palesaya hi Yesus, o ampunije na dosa'nyo nu kakuasa'an lengkat hi Yesus.”

To mia-mian misa' Yahudi mohumpak Roh nu Tumpu

⁴⁴ Hau-haunyo i Petrus daagi' basisik, Roh nu Tumpu nintatau'mo ka' nongkuasaimo iwi-iwi' mian anu nohongo lele aijo'.

⁴⁵ To mia-mian nu Yahudi anu palesayamo hi Yesus ka' nombatukimo i Petrus lengkat i Yope, iwi-iwi' binangang na nontoa Tumpu nombee'i suele Roh-Nyo hi to mia-mian bansa sangga'at anu misa' Yahudi.

⁴⁶ Sabab aha nohongo to mia-mian aijo' notatae i uno nu lupa-lupa nu basa' ka' mompuji-puji' Kadaka'an nu Tumpu. Lantas i Petrus notatae,

⁴⁷ “Soba toa, to mia-mian aiya nohumpakmo Roh nu Tumpu sumo kita. Jadi moko ala na mian montewa' aha o palamandikan nu uee?”

⁴⁸ Sahingga i Petrus nonsai aha da o palamandikan nu sanggo i Yesus Kristus. Ilapas aijo' pinoita nu aha da i Petrus jojoong tiba aha to pia-pian sinaa na kopinnyo.