2 TOMU-TOMUNDO' 8 - KITAB NU TUMPU ALLA LELE MA'IMAI'

Boune anu lengkat mae i Sunem ninsusule'mo i lipu' Israel

¹ Daagi' kino sa'angu' na tempo' Tumpu nonpotokamo mae balaa' kasusa'an i anu o kaan i lipu' nu Israel pinopitu' na taun na kinopinnyo. Ma'isa pe'e jinadi na aijo' pinoto'imo i Elisa hi boune anu lengkat mae i Sunem anu koko anaknyo po'ule' pinotumuu'nyo. I Elisa suele nonsaimo ia da molalinmo na aha iwi-iwi' salaigan da mamba i lipu' sangga'at.

² Boune aijo' nontulutimo apaa na anu pinoto'imo i Elisa ka' nambamo na aha i lipu' Filistin da jojoongmo kiijo' mae.

³ Salatan pinopitu'mo na taun, ia po'ule' mule' ninsusule' i Israel. Lantas ia nambamo tiba anaknyo hi tomundo' momoita da laigan ka' ale'nyo po'ule' osule' akon hi ia.

⁴ Tempo'nyo aitu i Gehazi posaihon i Elisa pinoitamo i tomundo' da monsisikakon hahan anu okabangangi anu binaumo i Elisa.

⁵ Ka' pinodongannyo boune anu lengkat mae i Sunem aijo' tinokamo nangadap hi tomundo' mompoto'i apaa na anu nu poita, i Gehazi tempo'nyo aitu nonsisikakonmo mosia na i Elisa po'ule' nompotumuu' samian na anak anu sinilakamo. Jadi koonyo i Gehazi, “Kita mian daka' anu talasanggo aiyamo na boune aitu ka' aiyamo na anak anu po'ule' pinotumuu' i Elisa!”

⁶ Lantas pinokilawamo i tomundo' ka' sinisikmo nu boune aijo' na anaknyo. Lapas aijo' i tomundo' nolagamo samian anu ko pangkatnyo ka' pinalentahkonnyomo da anu nu boune aijo' iwi-iwi' osule' akon hi ia, tiba oli nu isi nu ale'nyo anu pinopitu' na taun na kinopinnyo ia kiijo' mae i lipu' sangga'at.

I Elisa ka' i Tomundo' Benhadad anu lengkat mae i Siria

⁷ Daagi' kino sa'angu' na tempo' i Elisa nambamo i Damsyik. Tempo'nyo aitu i tomundo' Benhadad hau-haunyo nasakitmo salatan i hongo i tomundo' na i Elisa kiijo' i Damsyik,

⁸ pinoto'inyomo hi Hazael, samian na anu kopangkat, “Boai palasen na nabi kiijo', ka' poita da ia mompokilawakon hi Tumpu pa' aku aiya daagi' ma'alin kabai madi'mo.”

⁹ I Hazael nongalamo 40 na unta ka' pinaha posake'an apa-apaa na anu i humpak i kota Damsyik lantas nambamo hi Elisa. Salatan tinokamo i kajojoongan i Elisa, pinoto'imo i Hazael, “Posaihon nu belento i tomundo' Benhadad, nonsaimo mae aku da mompokilawakon pa' daagi' ia ma'alin kabai madi'mo.”

¹⁰ Tinaaman i Elisa, “Koonyo nu Tumpu hi belengku, ia silakamo. Panyo poto'i hi ia, ia daagi' ma'alin.”

¹¹ Lapas aijo' i Elisa nompotontongmo matanyo hi Hazael, sahingga i Hazael madi'mo sinanang na kinyonyoanyo. Manga-manga i Elisa i humangmo.

¹² “Kadaka' belento Tuan i humangmo?” na koonyo i Hazael. “Kalana sinumbu'kumo na beleyum mombaumo kalakuan anu ma'idek hi mian nu Israel.” na koonyo i Elisa. “Beleyum mompapumo to kota-kota' nu aha anu ko bentengnyo, mompateimo mian anu ma'ima' toto oli-olitau, ka' montekok to bunga-bunga mea', ka' mombohak kompong nu to boboune anu hau-haunyo poboa.”

¹³ “Ha, aku aiya ola mian anu madi' ko alati'nyo,” na koonyo i Hazael, “aku madi' ko kuasa anu sumo itina' na kodaka'nyo!” “Tumpu nompoto'imo hi belengku, tukoo-Nyo beleyum timbalimo tomundo' nu Siria,” na koonyo i Elisa.

¹⁴ Salatan i Hazael ninsusule'mo nambamo i laigan nu tomundo', pinokilawamo i Benhadad, “Mosia, na koonyo i Elisa?” “Pinoto'inyo mae tukoonyo belento Tomundo' daagi' ma'alin,” na koonyo i Hazael.

¹⁵ Panyo dodododopnyo i Hazael nongalamo sa'angu' na sabut ka' ilobongakonyo i uee lantas lako'mo pinokabonnyo hoso-hoson hi ohup i tomundo', sahingga ia kinotusmo ka' sinilakamo. Ka' i Hazael tinimbalimo tomundo' nu Siria nombolosakon i Benhadad.

I Yehoram tomundo' nu Yehuda

¹⁶ I Yehoram anak i Yosafat tinimbalimo tomundo' nu Yehuda tempo'nyo aitu i Tomundo' Yoram anak i Ahab nompalentahmo Israel i ngolima' na taun.

¹⁷ Tempo'nyo aitu i Yehoram umunnyo tolumpulu'mo ka' ohua' na taun ka' ia nompalentah Yerusalem kinopinnyo ingualu' na taun.

¹⁸ Ia no'osoa tiba anak i Ahab, ka' susumo apaa na anu lewa' nu bau nu aha sa'anakan mae i Ahab, ia binaladosa'mo hi Tumpu susumo to tomu-tomundo' nu Israel.

¹⁹ Panyo Tumpu madi' mombahayai Yehuda kalana Ia nojanji'mo hi Daud posaihonnyo, saba' tulunannyo tataap timbali tomundo'.

²⁰ I uno nu kapalentahan i Yehoram, Edom noto idekmo hi Yehuda, sahingga nosi potinjomo sa'angu' na kalaja'an.

²¹ Kalana aijo' nosabatmo na i Yehoram tiba iwi-iwi' na kareta anu lewa' bau pahampate mambamo mokiijo' i Zair. I kiijo' mae ia tinumbuhanmo nu gombuan nu suludadu nu Edom, panyo pihi-pihinyo ia tiba talenga' nu suludadunyo anu sinumake' ia kareta noko ala nontulu i tampat pahampatean tiba sampo bali', sahingga to sulu-suludadu nu aha nalaimo ka' nambamo i laigan nu aha.

²² Salatan pe'e aitu Edom madi'mo daagi' tinaaluk' hi Yehuda. Tempo'nyo aitu suele kota Libna noto idekmo.

²³ Sisikon anu sangga'at mongkona i Yehoram tinulismo i uno nu kitab Sisikon nu to tomu-tomundo' Yehuda.

²⁴ Ia sinilakamo ka' i lamunmo i polamunan to tomu-tomundo' i kota' Daud. I Ahazia anaknyo na nombolosi ia tinimbali tomundo'.

I Ahazia tomundo' nu Yehuda

²⁵ I Ahazia anak i Yehoram tinimbali tomundo' nu Yehuda tempo'nyo aitu i tomundo' Yoram anak i Ahab nompalentahmo Israel sinampulu' ka' ingohua' na taun.

²⁶ Tempo'nyo aitu i Ahazia umunnyo uampulu'mo ka' ohua' na taun, ka' ia nompalentah Yerusalem sinataun na kinopinnyo. Sanggo nu tinanyo i Atalya anak i tomundo' Ahab, ka' makumpu i Omri tomundo' nu Israel.

²⁷ Kalana nongosoaimo aijo' sahingga i Ahazia notojulumo tiba i Tomundo' Ahab. I Ahazia binaladosa'mo hi Tumpu susumo anu binaumo i Ahab ka' aha salaigan.

²⁸ I Tomundo' Ahazia suele nahampatemo nongsangalui Yoram tomundo' nu Israel nongewa i Hazael tomundo' nu Siria Aha nahampate i Ramot, da'erah Gilead. I Yoram binelaonmo tempo'nyo nahampate aijo',

²⁹ lantas ia ninsusule'mo i kota' Yizreel da opakuli'i lantas i Ahazia nambamo nontoa ia kiijo' mae.