2 TOMU-TOMUNDO' 7 - KITAB NU TUMPU ALLA LELE MA'IMAI'

¹ Tinaaman i Elisa, “Potombihing mae apaa na anu pinoto'i nu Tumpu! Dodop kila-kila sumo uuka na tempo'nyo. Ola sa'angu' na doi salaka mian timbalimo mongoli gandum totolu' na kilogram anu ma'ima' hondo kabai gandum sangga'at anom na kilogram.”

² Suludadu anu saja' monsangalui i tomundo' nontaami, “Iya na jadi, aijo' madi' minsoop i akan, maumo uukamo aiya na Tumpu montudunakon mae ujan daka' lengkat mae i langit!” “Nu toaje na han aijo' jadi saidi' mae, panyo beleyum madi'mo monyamit anu o kaan aijo' maumo ola sangkiding,” na tinaaman i Elisa.

Gombuan nu suludadu Siria ninsusule'mo

³ Sinaa aitu aha opat na mian ko panyakit kilit anu okabuhuk kiijo' i sambiha' nu sabatan nu kota' Samaria. Aha binasisikmo samian ka' samian, “Apaa na gunanyo kita lewa' sumuhang i aiya montanda'i kasilakanto?

⁴ De kita minsoopmo mokiijo' i kota' kita silakamo nu ohop; ka' de kita lewa' jojoong i aiya, kita suele silakamo. Sahanyo kita mamba mokiijo' i kemah nu mian Siria. De aha tahahumo pusa, kita nupatei nu aha. Panyo ihe na monsumbu' kita madi' opoposia.”

⁵ Salatan sinaa mulaimo pintung, aha nambamo i kemah nu mian Siria, panyo aha madi' nontoa mau pe'e ola samian i kiijo'.

⁶ Kalana, Tumpu nombaumo mian nu Siria da nohongomo lewo' susumo suludadu anu monsake'i ajahan ka' kareta montumbuhimo mae. Mian nu Siria haha aijo' nonsangkamo au'aitu tomundo' nu Israel nontamboimo i tomundo' Het ka' Mesir tiba suludadunyo nu aha da montumbuhi aha.

⁷ Kalana aitu pihi-pihimo aijo' aha nompala'imo momposalamat butong nu aha sahingga nompala'imo kemah, ajahan ka' kaledai nu aha pinojohokmo nu aha kiijo' i kemah.

⁸ Aha opa-opat anu ko panyakit kilit aijo' tinokamo i sohipi' nu kemah nu aha aijo' ka' ninsoopmo i sa'angu' na kemah. Aha nongkaanmo ka' nonginummo i kiijo' ka' nongalamo mosoni', salaka ka' to baju-baju' lantas nambamo pinosuluk nu aha. Lapas aijo' aha po'ule' mule' ninsusule' mae ka' nompinsoopi kemah sangga'at, lantas nombaumo mule' susumo anu binaumo nu aha.

⁹ Aha binasisikmo samian ka' samian, “Anu binauntomo aiya madi' ma'ima'. Lele aiya lele anu ma'ima' jadi tionyo ahi' osisikto! De otanda'into sampe tokaje dodop tantu kita o hukummo. Sahanyo kita mambamo i laigan nu tomundo' da opoto'i na han aiya hi tomundo'!”

¹⁰ Kalana aijo' aha ninsusule'mo namba i Samaria ka' nompoto'i hi mian anu monjagai sabatan daka' nu kota'; “Kami nambamo i kemah nu aha mian Siria, ka' tinokan mami madi'mo ko miannyo i kiijo' mae. Ajahan ka' keledai nu aha tinokan mami dagi' sego-segot, i tampatnyo, ka' kemah nu aha iwi-iwi' pinojohokmo nu aha ka' pinala'ianmo nu aha.”

¹¹ Aha anu monjagai sabatan daka' nu kota' noloboo'akonmo lele aijo' sahingga mian nompotokamo hi laigan nu tomundo'.

¹² Tempo'nyo aitu daagi' pihi, panyo i tomundo' suele nosabatmo i salipi' kinahoyotannyo ka' nompoto'imo hi to mia-mian anu mokalaja hi ia. “Potombihing! Sinumbu'kumo na tanga'an nu mian Siria haha aijo'! Sinumbu'mo nu aha na kita sinusa'mo i kaanon, kalana aijo' aha nompala'imo kemah ka' nambamo natisuluk i padang mongem kita da mamba molio anu o kaan. Lapas aijo' aha montumbuhimo mae kita ka' monjojoongi kota' to.”

¹³ Samian na anu ko pangkatnyo mokalaja hi tomundo' nompoto'imo, “O Tomundo', kita iwi-iwi' anu daagi' i kota' aiya uki'nyo pokakanamo susumo aha anu sinilakamo. Kalana aitu sahanyo kita monsai mian pa' aha sangkuka monsake'i olima' na ajahan haha aijo' anu daagi aijo' ka' mamba mokiijo' montoa apaa na anu jinadimo.”

¹⁴ Sahingga aha nompile'imo pa' aha sangkuka na mian lantas i tomundo' nonsaimo mian haha aijo' monsake'i ohua' na kareta anu lewa' bau pahampate mamba nonselidiki apaa na anu jinadimo i suludadu nu aha Siria.

¹⁵ Namba na aha tinoka i kaunyo nu Yordan. I tutuus na jalan pakean ka' to paka-pakakas nu aha mian Siria notanatamo iwi-iwi' aijo' memo pinaha bahetakon sumo aijo', nu aha mian Siria, kalana mian nu Siria nalaimo. To posa-posaihon ninsusule' ka' pinoto'inyomo hi tomundo'.

¹⁶ Jadi iwi-iwi' na mian nu Samaria nopadeka'mo nokiijo' i sambiha' nu kota' ka' nambamo nompahuhuakon anu i uno nu kemah nu aha Siria. Susumo apaa na anu pinoto'imo nu Tumpu, jinadimo saba' totolu' na kilogram na gandum anu ma'ima' kabai anom na kilogram na gandum sangga'atannyo olinyo ola ahi' sa'angu' na doi salaka.

¹⁷ Simpatuan tempo'nyo aitu suludadu anu saja' monsangalui itomundo' mokalaja monjagai sabatan daka' nu kota'. Ia sinilakamo i kiijo' pinahampeja'akonmo nu mian da'isan. Han aijo' jinadi sumomo anu tinaloakon i Elisa hi tomundo' salatan i tomundo' tinokamo hi ia.

¹⁸ I Elisa nontaloakonmo kila-kila dodop sinaa sumo uuka, totolu' na kilogram na gandum sangga'at pinobaluk i Samaria tiba olinyo sa'angu' na doi salaka.

¹⁹ Ka' tempo'nyo aitu suludadu anu saja' monsangalui tomundo' aijo' notataemo. “Iya na jadi! Aijo' madi' minsoop i akan, maumo tempo' uuka Tumpu montudunakonmo mae ujan mabohos lengkat mae i langit!” Lantas tinaamanmo i Elisa, “Nu toaje apaa na han anu jadi, panyo beleyum madi'mo montenten kaanon mau ola sangkiding.”

²⁰ Somo aitumo na anu jinadi hi mian aijo' – ia sinilaka kalana pinahampeja'akonmo nu mian da'isan i sabatan daka' nu kota'.