2 TOMU-TOMUNDO' 6 - KITAB NU TUMPU ALLA LELE MA'IMAI'

Bobolo' anu po'ule' mule' i humpak

¹ Daagi kino sansinaan aha to nabi-nabi anu ingajanmo i Elisa notusa'mo hi ia. Aha notatae, “Kajojoonganto aiya talalomo soki!

² Pobee' mae na kami mamba montaa' kau' kiijo' mae koko kaunyo Yordan, ka' mombaumo kajojoonganto kiijo' mae.” “Sahanyo ii',” tinaaman i Elisa.

³ Daagi' ko samian anu aijo' hi aha nompakisa da i Elisa mombatuki ahi' aha. I Elisa situju na mombatuki.

⁴ Lantas aha nambamo hingga-hinggat. Salatan tinokamo i biwi nu kaunyo Yordan, aha nontampu'unimo lewa' nontaa'i kau'.

⁵ Madi' pinin sala' samian anu aijo' hi aha, nanabu'mo na bobolo' i uno nu uee. “Ibeh kita Tuuma!” na ia nolobo' hi Elisa, “Itina' bobolo' anu sinabon!”

⁶ “Iya mae na kinanabu'annyo?” na koonyo i Elisa. Mian aijo' nompotiju'mo anu kinanabu'annyo, lantas i Elisa nongkolongmo sangkolong na kau' ka' ilumbu'akonnyo i tampat aijo'. Sahingga i lubatmomae na matanyo nu bobolo' aijo' aita' i kili nu uee.

⁷ I Elisa notatae, “Toluk!” Mian aijo' nonguluakonmo limanyo ka' nontoluk mata nu bobolo' aijo'.

Suludadu nu Siria pinatundu'mo

⁸ Daagi' kino tempo' sa'angu' Siria nahampatemo nongewa Israel. Noko basale' tiba to sulu-suludadu nu aha anu toto tangka-tangkas na pangkatnyo, i tomundo' Siria nontantukanmo anu bakema'an nu aha.

⁹ Panyo i Elisa nompolelemo hi tomundo' Israel salaku nompokinde'i ia da boli mamba i tampat aijo' kalana mian nu Siria haha aijo' biasa montulu jalan i kiijo'.

¹⁰ Jadi pinokinde'mo i tomundo' Israel na to mia-mian anu jojoong koko i tampat aijo', da balajaga-jaga. Sumo aijo' na i Elisa nompokinde'i i tomundo' pa' pinimpian.

¹¹ Han aijo' nompo'idekmo kinyonyoa i tomundo' Siria, sahinga ia nolagamo to sulu-suludadunyo anu toto tangka-tangkas na pangkatnyo ka' pinokilawanyo, “Tantu aiya hi kita daagi' ko mian anu ko gau' ma'idek. Ihe na mian aijo'? Soba poto'i mae!”

¹² Sala' samian na suludadu anu aijo' i aha anu matangkas na pangkatnyo nontaami, “Mau pe'e ola samian i madi'an, kita Tomundo'. I Nabi Elisa na nompoto'i aijo'! Ia na saja' nompoto'i hi tomundo' Israel, apaa na anu nutaloakon i Tomundo', maumo aijo' ola o taloakon i salipi' kahoyotannyo.”

¹³ “Soba selidiki pa' iya mae na ia,” na pinalentahkon i tomundo' “da ku hakop na ia.” Mian nompoto'i hi aha tukoonyo i Elisa kiijo' mae i Dotan.

¹⁴ Lantas i tomundo' Siria nompalentahmo nokiijo' sagombu na suludadu manjoo' hondo ka' mule' ajahan ka' kareta anu bau pahampate. Aha tinoka i kota' aijo' pinihimo, lantas tinikumo nu aha na kota' aijo'.

¹⁵ Dodododopnyo subu-subu hondo salatan posaihon i Elisa nobulamo ka' nosabat tinoanyo na suludadu nu Siria nontumbuhimo mae kota' aijo', sinadiamo na kuda ka' kareta bau pahampate nu aha. Jadi ia ninsusule'mo nokiijo' hi Elisa ka' nompoto'i “Silakamo na kita Tuan! Apaa na anu obaunto?”

¹⁶ “Boli mabuhuk,” na koonyo i Elisa, “Anu monsangaja'i kita na lebe manjoo' molingkudui anu monsangaja'i aha.”

¹⁷ Lantan i Elisa binalado'amo, “O Tumpu, de timbali belento mombuka'akon mata nu posaihonku da ia timbali montoa!” Do'a i Elisa i hongomo nu Tumpu sahingga salatan posaihonnyo nontoamo nokiijo' tinoanyo na bungkutnyo aijo' nobuke'mo nu ajahan tiba kareta ko apunyo nontikubimo i Elisa.

¹⁸ Salatan mian nu Siria haha aijo' nontumbuhimo, i Elisa binalado'amo, “O Tumpu de timbali popahakon na mata nu mian haha aiya!” Do'a i Elisa i hongomo nu Tumpu, sahingga aha iwi-iwi' pinahamo.

¹⁹ Nokiij'mo na i Elisa ka' notatae, “Belemiu tinalasmo. Aiya misa' kota' anu o lio-lio nu belemiu. Imbo' batuki mae na aku, ku laya'je mamba hi mian anu nu lio-lio nu belemiu.” Lantas i laya'mo i Elisa na aha namba i Samaria.

²⁰ Salatan aha ninsoopmo i kota' aijo', i Elisa binalado'amo, “O Tumpu, de timbali buka'akon na mata nu aha aiya da aha montoa-toamo.” Do'a i Elisa i hongo-hongomo nu Tumpu, binuka'-Nyomo na mata nu aha haha aijo' sahingga aha binangangmo na nontoa kalana aha kiijo'mo i kota' Samaria.

²¹ Salatan i tomundo' Israel nontoamo mian nu Siria haha aijo' pinokilawanyomo, “O Elisa, pa' ku pateimo na mian haha aiya?”

²² Tinaaman i Elisa, “Boli. Sadang suludadu anu i hakop mae nu belento Tomundo' namba nahampate madi' pinatean nu belento Tomundo', sumo aitu suele na aiya. Bee'i mongkaan ka' monginum na aha, lantas pobee'mo na aha minsusule' hi tomundo' nu aha.”

²³ Sahingga i tomundo' Israel nombaumo bau-bauon daka' nolame'akon aha. Noko kaan ka' nonginum na aha, sinainyomo na aha da minsusule'mo hi tomundo' Siria. Mulai tempo'nyo aitu mian nu Siria haha aijo' madi'mo namba mae montumbuhi lipu' nu Israel.

Kota' Samaria tinumbuhanmo

²⁴ Madi' pinin i lapas na aijo' i Benhadad tomundo' nu Siria nomboamo suludadunyo iwi-iwi' da montumbuhimo Israel. Aha nontumbuhimo Samaria,

²⁵ sahingga anu okaan sinusa'mo i uno nu kota', sadang ubak nu keledai sa'angu' olinyo ualumpulu'mo na doi salaka, ka' ohua' na ons na kotolan nu malapati' olinyo olima' na doi salaka.

²⁶ Daagi' kino sansinaan tempo'nyo i tomundo' kino lalajang aita' i pagan mesen nu kota', samian na boune nomoita tulung, “Kita Tomundo', tulungi mae!”

²⁷ Tinaaman i tomundo', “De Tumpu madi' montulungi beleyum te aku moko ala montulungi? Aku madi' ko anggur kabai gandum anu o inum!

²⁸ Apaa na anu nu kasusa'akon?” Tinaaman nu boune aijo', “Sangalungku aiya nongendei aku da kami mongkaan, anaku pe'e na momona, lantas dodop anaknyomo na o kaan mami.

²⁹ Kalana aijo' kami nongunjangmo anaku momona lantas kinaanmo mami. Dodododopnyo salatan pinoitangkumo na anaknyo da o unjangmo mami, anaknyo pinosuluknyomo!”

³⁰ Nohongo han aijo', i tomundo' nombea-beakmo baju'nyo kalana ia sinusa'mo. Mian anu sika-sika tinjo haha aijo' koko pagan mesen nontoamo taalu' baju' anu aijo' i unonyo, te kalung na pinusoknyo.

³¹ I Tomundo' notataemo daka-daka', “Sinamo aiya na kapatean i Elisa. Pojohokmo da nupiboatimo nu Tumpu Allah na mohukum mae aku, panyo ku pateimo na i Elisa!”

³² Lantas i tomundo' nonsaimo samian namba momona hi laigan i Elisa. Tempo'nyo aitu i Elisa kiijo' i laigan, ka' to tu'a-tu'anyo hau-haunyo kiijo' hi ia. Ma'isa aha anu sinaimae i tomundo' aijo' tinoka, i Elisa notataemo hi to tu'a-tu'anyo haha aijo' “Soba tutugi! Anu mompatei aijo' nonsaimo mae mian da mompatei mae aku. De mian aijo' tokamo mae, tumban na sabatan ka' boli opobee' mae na ia minsoop, jadi saidi' mae posi i tomundo'je na toka mae.”

³³ Ma'isa pe'e ilapas na i Elisa notatae, i tomundo' tinokamo i kiijo' ka' nompoto'i, “Kasusa'an aiya, balaa' nu Tumpu hi kita! Jadi daagi' apaa na gunanyo aku montaha'imani da nu tulungi mae?”