2 TOMU-TOMUNDO' 5 - KITAB NU TUMPU ALLA LELE MA'IMAI'

I Naaman na'alinmo

¹ I Naaman talenga' nu suludadu nu Siria anu nu kalibosi hondo ka' nu angga'i i tomundo' Siria. Kalana tibaje i Naaman sahingga Tumpu nombee'ije ka'untungan nahampate na suludadu Siria. I Naaman samian na talenga' anu baani hondo panyo ia ko panyakitnyo i kilit anu okabuhuk hondo.

² Daagi' kino sansinaan mian nu Siria nontumbuhimo lipu' nu Israel. Tempo'nyo nahampate aijo' samian na anak boune nu Israel i hakopmo ka' binoamo salaku mian anu pinalaiakon, lantas tinimbalimo posaihon nu bengkele' i Naaman.

³ Daagi' kino sansinaan notatae na posaihon aijo' hi kajojoongannyo, “O Pontina'on, de ituan mamba singkabot tiba nabi anu jojoong kiijo' mae i Samaria nabi aijo' mompo'alin panyakit i tuan;”

⁴ Salatan i hongomo i Naaman na aijo' ia nambamo hi tomundo' ka' sinisiknyomo apaa na anu pinoto'i nu boune aijo'.

⁵ Koonyo nu tomundo' “Timbali lako'mo hi tomundo' nu Israel ku tulisje na sulat toka hi ia.” Jadi nambamo na i Naaman nomboa doi salaka' 30.000, doi mosoni' 6.000 ka' baju' toto ima-ima' 10 na pan.

⁶ Sulat anu binoanyo aijo' onyi'nyo sumo uuka: “I uno nu sulat aiya aku momposumbu' suludadungku anu matangkas na pangkatnyo, i Naaman, hi belento Tuan da belento Tuan mompa'alinakon panyakitnyo.”

⁷ Salatan tomundo' nu Israel nombasa'mo sulat aijo', binea-beaknyomo na baju'nyo kalana nabuhukmo, ka' notatae, “Silakamo na uuka kadaka' i tomundo' Siria aijo' nompoitamo mae aku da mompa'alinakon mian aijo'? Aku misa' Tumpu Allah anu ko kuasa timbali mompotumuu' kabai mompatei mian! Tantu tomundo' nu Siria aijo' ola mompobau-bau aku!”

⁸ Han aijo' i hongomo i nabi Elisa, ka' pinotuunyomo hi tomundo' Israel, “Kadaka' nabuhukmo? Sai mae na mian itina' hi belengku da nu sumbu' nu mian itina', na aiya i Israel daagi' ko nabi samian!”

⁹ Kalana aijo' nambamo na i Naaman sinumake'mo i kareta anu nu hela' nu ajahannyo namba hi laigan i Elisa sampe tinokamo i ahop nu sabatan.

¹⁰ I Elisa nonsaimo samian na posaihonnyo da mompoto'i sumo uuka hi Naaman, “Lako' na belento Tuan mindi' pimpitun i kaunyo Yordan sahingga belento Tuan ma'alinmo totu-totu'u.”

¹¹ Nohongo han aijo' i Naaman notambuha'mo ka' notatae, “Tinutuganku ia ahi' na mamba mae monsingkaboti aku ka' mondo'akon hi Tumpu, Tumpu Allah-nyo, ka' monsapuakon limanyo aiya i butongku anu ko ko panyakitnyo lantas aku ma'alinmo.

¹² Kaunyo Abana ka' Parpar anu kiijo' i Damsyik lebe ma'ima' molingkudui maumo pa'iyaya mae i Israel! Aku timbali mindi' i kiijo' mae ka' timbali ma'alin!”

¹³ Panyo to posa-posaihonnyo nongohanimo ia ka' nompoto'i, “O Tuan, sadang belento Tuan opokau mombau anu mahan, han aijo' obaumo nu belento Tuan. Ka' mule' aiya ia ola monsai belento Tuan mamba mindi' da ma'alin!”

¹⁴ Kalana aijo' nambamo na i Naaman i kaunyo Yordan lantas lako'mo nongkiobakon butongnyo i kaunyo aijo' pinimpitun susumo anu pinokaumo i Elisa. Sahingga na'alinmo na i Naaman. Butongnyo po'ule'mo na'ima' susumo butong nu olitau.

¹⁵ Lantas ia ka' iwi-iwi' na anu nombatuki ia po'ule'mo namba hi Elisa. “Uuka aiya sinumbu'kuje,” na koonyo i Naaman hi Elisa. “Taalu' i songko-songko na dunia ola samian na Tumpu Allah. Aijo'mo Tumpu Allah anu osombah nu mian Israel. Kalana aijo' belento Tuan sanang ahi' mae na mongala anu ku bee' aiya.”

¹⁶ Tinaaman i Elisa “I uno nu sanggo nu Tumpu anu tuumu', anu kuku hongo-hongo na palentah-Nyo, madi' aku mongala maumo pa'apaa na anu o bee'.” Sabole-bolemo sinesehakon i Naaman da o alamo na anu nu bee'mo aijo', panyo i Elisa madi' ahi' mongala.

¹⁷ Lantas notataemo na i Naaman, “De belento Tuan madi' ahi' mongka'oho' mongala anu ku bee' aiya, yo pobee' mae na aku momboa tano' konjoo'nyo ola saimbanggan anu nupoko ala nu boa nu bagal sapan. Kalana mulai uuka aku monsombahkonmo koloban samata-mata hi Tumpu ka' madi'mo hi pilogot sangga'at.

¹⁸ De aku sabole-bole monsangalui i tomundo'ku mamba balado'a i kuil Rimon pilogot Siria, o' amalakon da Tumpu mongampuni Aku.”

¹⁹ I Elisa notataemo, “Lako'mo ma'i-ma'ima'.” Lantas i Naaman nambamo. Madi' pinin salatan i Naaman nambamo,

²⁰ i Gehazi posaihon i Elisa, binapikinmo, “Ibeh kadaka' ia pinobee'mo namba madi' nombayan? Sabenannyo Tuan aku mongala ahi' anu pinombayan nu mian Siria aijo'. I uno nu sanggo nu Tumpu anu tumuu', tionyo ku loloi'mo na ia, da mohumpak apa-apaa mae hi ia!”

²¹ Lantas i Gehazi nololoi'mo i Naaman. Salatan tinoamo mae i Naaman daagi' ko mian anu tokamo mae, ia nintatau' mo i keretanyo ka' nompokilawa, “Mosia!”

²² “Ampun Tuan aku pinokau mae mompoto'i hi belento Tuan, tukoonyo ko nabi ua'aha daagi' olitau sala'je tinoka lengkat mae i da'erah bungkutnyo Efraim. O Tuan, ku poita da belento Tuan mombee'i mae 3.000 na doi salaka ka' baju' anu ma'ima' ohua' na paan da obee' hi nabi anu ua'aha kiijo'.”

²³ “Yo ii'!” na koonyo i Naaman. Ka' ia sabole-bole sinale'an i Gehazi momboa 6.000 na doi salaka. I Naaman nolupi' mo doi aijo' pino'ohua'nyo na botutu ka' nongala baju' anu toto iama-ima' ohua' na paan. Iwi-iwi' aijo' binee'nyomo hi mian ua'aha na posaihonnyo anu pinokaunyo mamba pe'e momona i Gehazi mambaje i mihi.

²⁴ Salatan tinokamo i bungkutnyo tampat kajojoongan i Elisa, i Gehazi nongalamo doi'ka' baju' aijo' hi to posa-posaihon i Naaman, lapas aijo' pino'una'nyomo i laigan. Posaihon haha aijo' pinokaunyomo ninsusule',

²⁵ lantas po'ule'mo ia ninsoop nokiijo' i laigan. I Elisa nompokilawamo, “Beleyum lengkat mae iya?” “Madi' pa' namba noyaya kita Tuan!” na pinoto'inyo.

²⁶ Panyo i Elisa notataemo, “Kinyonyoangku kiijo' mae tempo'nyo i Naaman nintatau'mo i karetanyo nonsingkaboti beleyum. Uuka misa'mo tempo'nyo na mongala doi ka' bau pongoli ale' nu zaitun, ale' nu anggur, domba ka' sapi' tiba to posa-posaihon!

²⁷ Kalana beleyum nongalamo anu binee'nyo aijo' beleyum suele nongalamo panyakit i Naaman. Ka' mule' sampe toka sidu-sidutu' lee' nu beleyum suele nu konamo nu panyakit aijo'!” Salatan i Gehazi nosabatmo lengkat kiijo', ia kinonamo nu panyakit kilit – kilitnyo nopute'mo hondo.