2 TOMU-TOMUNDO' 19 - KITAB NU TUMPU ALLA LELE MA'IMAI'

I Tomundo' nomoitamo pokinde' hi Nabi Yesaya

¹ Tempo'nyo i Tomundo' Hizkia nohongomo lele anu pinotokamo nu aha totolu' na mian aijo', ia nombea-beakmo baju'nyo ka' nompusokmo hude kalung tandanyo ia talalomo sinusa', lantas ia nambamo i Laigan nu Tumpu.

² Lapas aitu ia nonsaimo i Elyakim, kapala nu laigan nu Tomundo', i Sebna julutulis nu negara, ka' to ima-imam anu i langkai'mo da mamba hi nabi Yesaya anak i Amos. Aha suele nompusokmo hude kalung.

³ Sumo uuka na potuunon i Hizkia anu pinotoka nu aha hi Yesaya. “Sinaa uuka aiya sinaa nu mian susa'; kita aiya i hukumo ka' ingambanganmo. Kita aiya sumomo boune anu kahanda'mo mompohampe anak panyo butongnyo i lundengmo.

⁴ Tomundo' Asyur nonsaimo mae samian na suludadu anu matangkas na pangkatnyo da mompopo ambang Tumpu Allah anu tumuu'. Ihe na monsumbu' Tumpu Allah nu belemiu nohongomo pinompopo'ambang aijo' ka' mohukumo aha anu nontaeakon! Kalana aijo' do'akonmo hi Tumpu Allah na mianto haha aijo' anu daagi' tutuu'.”

⁵ Salatan nohumpakmo potuunon lengkat mae hi Tomundo' Hizkia aijo',

⁶ i Yesaya nonsaimo mian haha aijo' mompotokakon anu salaku bau pontaami sumo uuka “Tumpu notataemo, belento Tomundo' bolimo mabuhuk na mohongo potatae nu to posa-posaihon mae i tomundo' Asyur aijo' kalana Tumpu madi' molapasakon kita.

⁷ Nu bauje nu Tumpu hi tomundo' Asyur da mohongo sa'angu' na lele anu madi' totu'u sahingga ia ninsusule'mo i kampungnyo ka' i kiijo' mae ia opateimo.”

Mian nu Asyur nompolele mule' lele sangga'at anu mompopobuhuk

⁸ Suludadu nu Asyur anu matangkas na pangkatnyo aijo' nohumpakmo lele au'aitu tomundo'nyo nompala'imo Lakhis ka hau-haunyo mahampate nongewa kota' Libna, madi'mo majo'on lengkat i kiijo'. Sahingga nambamo na suludadu anu matangkas na pangkatnyo aijo' nokiijo' da singkabot tiba tomundo'nyo aijo'.

⁹ Tomundo' nu Asyur nohumpakmo lele au' aitu tompukan nu suludadu nu Mesir anu sinangaluan mae i Tirhaka tomundo' nu Sudan hau-haunyo nambamo mae da mompatundu'mo aha. Kalana aitu tomundo' Asyur nompakatumo sulat hi Hizkia tomundo' nu Yehuda.

¹⁰ Sumo uuka na onyi' nu sulat aijo', “Boli nu akali nu palajanjian nu Tumpu Allah anu otakabunakon nu belemiu aijo', au'aitu belemiu madi' ku poko ala kupatundu'.

¹¹ I hongomo nu beleyum na batu-batu kampung anu tinumbuhanmo nu to to tomu-tomundo' nu Asyur ingideanmo iwi-iwi'. Boli beleyum monsangka au'aitu beleyum madi' mohumpak kasilaka'an!

¹² Tempo'nyo mompolee'ku nongideimo kota' Gosan, Haran tiba Rezef, ka' mule' nompateimo mian nu Eden anu jojoong i Telasar madi' ko sa'angu' pe'e na to pilo-pilogot nu aha na noko ala nomposalamat aha.

¹³ I yamo na to tomu-tomundo' nu kota' Hamat, Arfat, Sefarwaim, Hena tiba Iwa?”

¹⁴ I Hizkia nontalimamo sulat aijo' hi mian anu sinai, lantas binasa'nyomo. Lapas aijo' ia nambamo nokiijo' i Laigan nu Tumpu ka' binokanyomo na sulat aijo' hi ahop nu Tumpu,

¹⁵ lantas binalado'amo, ia notatae, “Tumpu, Tumpu Allah Israel anu jojoong kiita' i suluga', Belentomo na sa'a-sa'angu'nyo anu mongkuasai silina na kalaja'an i dunia aiya. Belentomo na anu mompodaagi' langit tiba tano' aiya.

¹⁶ Tumpu palahatikan mae apaa na anu hau-haunyo jinadimo aiya hi kami. Hongoakon mae na i Sanherib nompopoambangmo belento Tumpu Allah anu tumuu'.

¹⁷ Sinumbu'mo mami iwi-iwi' o Tumpu, na to tomu-tomundo' nu Asyur nompateimo manjoo' na bansa ka' nongideimo iwi-iwi' na lipu' nu aha.

¹⁸ To pilo-pilogot nu aha suele pinapuan ka' ingidean kalana pilogot haha aijo' memang madi' ko kuasanyo. Aha ola patong kau' na binau ka' batu, manusia na nombau.

¹⁹ O Tumpu, Tumpu Allah mami, lapasakon mae na kami aijo' hi aha to mia-mian nu Asyur da iwi-iwi' na bansa i dunia aiya monsumbu' taalu' ola ahi' belento sa'a-sa'angu'nyo na Tumpu Allah.”

I Yesaya nompotuunmo hi tomundo'

²⁰ Lapas aijo' i Yesaya nompotuunmo hi Tomundo' Hizkia, saba' salaku pontaami do'a i tomundo'.

²¹ Tumpu notatae, “Kota' Yerusalem nongkokojoimo ka' nompopoambangmo belento Sanherib.

²² Beleyum nonsumbu'mo pa' ihe na inguda-udahanmo ka' pinopoambangmo nu beleyum aijo'? Akumo na Tumpu Allah nu Israel, Tumpu Allah anu Susi'! Kobubuun hondo na langkas nu beleyum hi belengku.

²³ Beleyum nonsaimo mae mian da toka mae ko bubun au'aitu kalana manjoo' na kareta anu bau pahampate nu beleyum sahingga nongkuasai to bungku-bungkutnyo anu matangkas i Libanon. Beleyum kinobubuunmo kalana beleyum nonta'imo kau' lontio' anu to mata-matangkas ka' ma'ima' hondo ka' nompinsoopimo alasnyo iwi-iwi' anu toto daka-daka' na kau'nyo.

²⁴ Beleyum mule' tinakabunmo kalana beleyum nongkekemo bubung ka' nonginummo uee i kampung-kampung nu mian anu isalipu'an, ka' to sulu-suludadu nu beleyum nompampeja'akonmo Kaunyo Nil sampe no'oti.

²⁵ Ma'isa toho' beleyum nohongo, na iwi-iwi' aijo' tinanga'an-Kumo daagi' pe'e u'utu mae? Ka' uuka aiya kubaumo. Akumo na mombee'i kuasa' hi beleyum da mongidei iwi-iwi' na kota' anu ko bentengnyo sahingga memo tu'onyo.

²⁶ Aha to mia-mian anu jinojoong i kiijo' madi' noko ala nombau apa-apaa, aha tinolokengkengmo ka' nabuhukmo. Aha susumo hemput i padang kabai hemput anu tumuu' aita' i atop nu laigan, de nupuhimo nu mombun anu lengkat mae i kabete'an ka' makansang hondo, tantu ia manggasmo.

²⁷ Panyo Ku sumbu' na apa-apaa anu atina' i butong nu beleyum. Ku sumbu' apaa na anu nu bau ka' moyaya na beleyum mamba.

²⁸ Ku sumbu' na beleyum pinusamo hondo hi belengku, ka' i hongong-Kumo na beleyum talalomo kinobubu. Uuka aiya Ku pokonaimo kait i sung nu beleyum ka' tambang i nganga' nu beleyum da ku hela' na beleyum minsusule' po'ule' montulu jalan anu tinuluanmo mae nu beleyum.”

²⁹ I Yesaya nompoto'imo potunonnyo hi Hizkia, “Aiyamo na bau tanda hi beleyum. Taun uuka aiya ka' taun aiya mae i ahop, mian mongkaanmo gandum anu mosi tumuu'. Panyo lapas aijo' aha timbalimo motugan gandum tiba anggur atina'je ka' nu kaan nu aha na hasinnyo.

³⁰ Mian nu Yehuda anu daagi' tumuu' timbalimo sanang susumo sosu'anon anu maleeng hondo na bakatnyo ka' mimbua'mo.

³¹ I Yerusalem tiba aita' mae i bungkutnyo nu Sion daagi' ko to mia-mian anu salamat kalana Tumpu nontantukanmo han aijo' tionyo ahi' jadi.

³² Aiyamo na anu tinaloakon nu Tumpu mongkona i tomundo' nu Asyur; ‘Ia madi' minsoop i Yerusalem kabai mompeletakon pana' mokiijo' sasu kota' aijo'. To sulu-suludadu anu ko kantanyo madi' ko anu moko ala mongohani kota' aijo' ka' titikupnyo madi' otambuli nu tano' da bau pontumbuhian.

³³ I Tomundo' Asyur minsusule' montulumo jalan anu tinuluannyomo mae tempo'nyo u'utu ia tinoka mae madi' pilenje minsoop i kota' aijo'. Aku Tumpu, notataemo,

³⁴ Kota' Yerusalem Ku tinjohakonmo ka' Kujagaimo kalana kaholomatan-Ku, ka' kalana palajanjian-Ku hi posaihon-Ku i Daud.’ ”

³⁵ Pihi-pihimo aitu na Malaikat nu Tumpu tinoka i kemah nu aha mian Asyur, ka' nompatei 185.000 na suludadu. Dodo-dodopnyo subu-subu bangke' nu aha haha aijo' paha-paha bahangkangmo.

³⁶ Sahingga tinolosule'mo na i Sanherib tomundo' nu Asyur ka' ninsusule'mo namba i Niniwe.

³⁷ Daagi' kino sansinaan hau-haunyo ia monsombah i uno nu kuil pilogot Nisrokh, ia natemo tinabas i Adramelekh nu bajak tiba i Sarezer, tiba to ana-anaknyo momo'ane. Lapas aijo' aha nalaimo i lipu' Arafat. Sahingga i Esarhadan, anaknyo mo'ane sangga'at na tinimbali tomundo' nombolosakon ia.