2 TOMU-TOMUNDO' 16 - KITAB NU TUMPU ALLA LELE MA'IMAI'

I Ahas tomundo' nu Yehuda

¹ I taun ko sampulu'nyomo ka' popitu' na i Tomundo' Pekah anak i Remalya nompalentah Israel, i Ahas anak i Yotam tinimbalimo Tomundo' nu Yehuda.

² Tempo'nyo aitu umunnyo 20 mo na taun ka' ia nompalentah i Yerusalem 16 na taun na kinopinnyo. Ia madi' nontiho sonto' anu ma'ima' hi Tomundo' Daud, mompolee'nyo mae, panyo' ola ahi' mombau kalakuan anu madi' momposanang kinyonyoa nu Tumpu, Tumpu Allahnyo.

³ Ia tinumuu'mo susumo to tomu-tomundo' nu Israel, pakalaus mule' ia nonsombahkonmo anaknyo momo'ane salaku koloban hi pilogot susumo anu saja'mo nu bau nu to mia-mian padahan bauon aijo' ma'idek, anu lewa' nu bau nu aha anu ia laa'mo nu Tumpu da madi'mo jojoong i lipu' Kana'an tempo'nyo mian nu Israel tinokamo i lipu' aijo'.

⁴ I Ahas nonsombahkonmo koloban ka' nompapuimo kamangian i tampat haha aijo' anu lewa' ponsomban pilogot i bungkutnyo ka' i patu nu kau' anu toto tambo-tambok na honnyo.

^5-6 Tempo'nyo aitu i tomundo' Edom po'ule'mo nongkuasai kota' Elat ka' nolaa'mo to mia-mian Yehuda anu jojoong i kiijo'. Jadi tinokamo na mian nu Edom ka' jinojoongmo i kota' aijo' sampe sinaa aiya. Tempo'nyo aijo' suele na i Rezin tomundo' nu Siria ka' i Pekah tomundo' nu Israel nontumbuhi ka' nontikumo Yerusalem, panyo madi' pinoko patundu'na i Ahas.

⁷ I Ahas nonsaimo mian namba hi Tiglat-Pileser tomundo' nu Asyur, pinotuunyo sumo uuka, “Aku posaihon nu belento anu tulu-tulutan; kalana aijo' ku poita sabole-bole hondo toka mae potuu'akon na aku da boli nupatei i tomundo' Siria ka' i tomundo' nu Israel anu nontumbuhimo mae aku aiya.”

⁸ I Ahas mule' nongalamo mosoni' ka' salaka i laigan nu Tumpu, ka' pakakas anu i laigan nu tomundo' lantas pinakatunyomo salaku bau pompalaseni i Tomundo' Asyur.

⁹ I Tomundo' Tiglat-Pileser nongakuimo apaa na anu pinoto'i i Ahas, lantas nontumbuhimo ka' nongalamo Damsyik. Mian anu jojoong i kiijo' binoanyomo salaku mian anu i hakop ka' binoamo i Kir, ka' tomundo'nyo aijo'mo i Tomundo' Rezin, pinateannyomo.

¹⁰ Tempo'nyo i Tomundo' Ahas nambamo i Damsyik da singkabot tiba i tomundo' Tiglat-Pileser, ia nontoamo mezbah i kota' aijo'. Lantas pinakatunyomo na sonto' hi Imam Uzia kiijo' mae i Yerusalem ka' suele sukatannyo nu mezbah aijo' anu tionyo ahi' otiho totu-totu'u toto sa'angu' na sonto'nyo.

¹¹ Sahingga i Uzia nombaumo sa'angu' na mezbah tinihonyo susumo sonto' ka' sukatannyo anu tinalimanyomo aijo' ka' ma'isa pe'e i Ahas ninsusule' mae mezbah aijo' pinotimbalinyomo.

¹² Salatan ia tinokamo lengkat mae i Damsyik tinoamo i Ahas na mezbah aijo' tinimbalimo.

¹³ Lantas i mezbah aijo' sinombahkonnyomo na koloban binatang tiba koloban gandum. Ka' mule' dinudu'akonnyomo na anggur anu kinolobanakon ka' baso' nu koloban anu bau pompodame i mezbah aijo'.

¹⁴ I Ahas nontoamo taalu' mezbah tambaga anu bau ponsomban Tumpu pinotinjo i olotnyo nu Laigan nu Tumpu ka' mezbahnyo anu sala-sala'je binau. Klana aijo' mezbah tambaga aijo' i lalinmo lengkat aijo' i ahop nu Laigan nu Tumpu nokiijo' i sasu utara nu mezbahnyo anu sala-sala'je binau.

¹⁵ Lapas aijo' pinoto'inyomo hi Uzia, “Mezbahngkumo anu daka-daka' aiya na opake pontunuan koloban daagi' subu ka' koloban de malommo, anu nu sombahkonmo nu tomundo' ka' mule' mian da'isan, ka' dudu'akon i kiijo' na anggur anu nu okolobanakon nu mian da'isan. Ka' odudu'akon suele i mezbah aijo' na baso' iwi-iwi' nu binatang anu osombahkon. Ka' mezbah tambaga anu pini-pininmo aijo' akumo na mompake bau pontunde'anku hi to tomi-tominuat.”

¹⁶ Apaa na anu pinalentahkonmo i tomundo' aijo' binaumo i Uzia.

¹⁷ Lapas aijo' pinahabongkanmo i Ahas na kareta tambaga haha aijo' anu opake i Laigan nu Tumpu, ka' pinaha alanyomo na gumbang anu aijo' i kareta haha aijo'. Gumbang tambaga daka-daka' anu aita' i tundun nu sapi' sampu-sampulu' ka' ohua' aijo' ingalanyomo suele ka' pinaha pokokonyomo, i latasannyo nu batu.

¹⁸ Lantas da bau pongala kinyonyoa nu tomundo' Asyur, binongkanmo i Ahas na salipi' nu tomundo' anu kiijo' i Laigan nu Tumpu, ka' tumban pinsoopan anu ola samata-mata i tomundo' na minsoop i kiijo' pinimpi'mo i Ahas.

¹⁹ Sisikon sangga'at mongkona i Tomundo' Ahas tinulismo i kitab Sisikon nu to tomu-tomundo' Yehuda.

²⁰ I Ahas sinilakamo ka' i lamunmo i tampat pinolamunan to tomu-tomundo' i kota' Daud. I Hizkia anaknyomo na tinimbali tomundo' nombolosakon ia.